بۇگىن تاڭەرتەڭ الماتى وبلىسى ۇيعىر اۋدانى شونجى اۋىلىندا قاقتىعىس شىعىپ، بەس ادام پىشاقتالدى دەگەن بەيرەسمي اقپارات تارادى.

بەيرەسمي اقپاراتتار بويىنشا، ەكى كۇن بۇرىن قازاق-ۇيعىر جاستارى اراسىندا جانجال تۋىپ، توبەلەسكەن. سالدارىنان بەس ادام پىشاقتالعان. ونىڭ ۇشەۋى قازاق، ەكەۋى ۇيعىر ازاماتى. وسى ماسەلەگە بايلانىستى اۋىل جاستارى جاستار اكىمشىلىگىنە جينالعان. قازىرگى ۋاقىتتا وبلىس اكىمى شونجىدا جينالىس وتكىزىپ جاتىر. جينالىستا اۋدان اتاۋىن وزگەرتۋ ۇسىنىلعان. اتالعان ماسەلەنى زەرتتەۋ ماقساتىندا ءتىلشىمىز وقيعا ورىن العان جەرگە جونەلتىلدى. تولىق، راستالعان اقپاراتتى الداعى ۋاقىتتا سايتىمىزدان وقي الاسىزدار.

9 ماۋسىمدا سايتىمىزدا ۇيعىر اۋدانىنداعى ماسەلە بويىنشا الماتى وبلىسىنىڭ اكىم اماندىق باتالوۆتىڭ نازارىنا ارنايى ماتەريال جاريالانعان بولاتىن. ماتەريالدا ۇيعىر اۋدانىنا قاراستى اقتام جانە تيىرمەن اۋىلدارىنداعى ۇلتارالىق تاتۋلىققا جىك ءتۇسىرۋى مۇمكىن جايتتار تۋراسىندا بايان ەتىلدى. سونىڭ نەگىزىندە اۋدان كولەمىندە يدەولوگيا، جاستار تاربيەسى، جاستاردى وتانسۇيگىشتىككە باۋلۋ ىستەرىنىڭ اقساپ تۇرعانىن ەسكەرتىپ، ۇلتارالىق ارازدىق تۋدىرۋى مۇمكىن ىقتيمال قاتەرلەر جونىندە وبلىس اكىمىنىڭ نازار اۋدارۋىن تالاپ ەتكەن ەدىك. كەيىننەن وبلىس اكىمىنىڭ ءباسپاسوز حاتشىسى عالمۇرات جۇكەل رەداكتسيامىزعا ۇيعىر اۋدانىنداعى ماسەلە بويىنشا وبلىس تارابىنىڭ رەسمي جاۋابىن بەردى.

رەسمي حاتتا: «ۇيعىر اۋدانىنداعى ماسەلەگە قاتىستى وبلىستىق كوميسسيا قۇرىلىپ، وڭىردە جۇمىس جۇرگىزدى. ناتيجەسىندە اقتام ورتا مەكتەبىنىڭ ديرەكتورى يزماحۋنوۆ وكتيابر تۋرگانوۆيچ، ديرەكتوردىڭ تاربيە ءىسى جونىندەگى ورىنباسارى قاپسالاموۆ مۇقامەتقالي لاۋازىمدارىنان بوساتىلدى. سونىمەن بىرگە اتالمىش مەكتەپتىڭ بيولوگيا ءپانىنىڭ مۇعالىمى كاحاروۆا ءتۇرديبۋۆي دە قىزمەتىنەن بوساتىلدى. بۇدان بولەك اقتام اۋىلدىق وكرۋگى اكىمى اپپاراتىنىڭ سپورت جونىندەگى ادىسكەر- نۇسقاۋشىسى كاماەۆ سابيرجان سۋنياتسۋنوۆيچ جانە تيىرمەن اۋىلدىق وكرۋگى اكىمى اپپاراتىنىڭ جاستار ءىسى جونىندەگى ادىسكەر- نۇسقاۋشىسى ياكياروۆا ۋميدا قىزمەتىنەن بوساتىلدى»، – دەلىنگەن.

"The Qazaq Times"