پارلامەنت ءماجىلىسىنىڭ توراعاسى نۇرلان نىعماتۋليننەن كوروناۆيرۋس انىقتالدى.

سپيكەر قازىر وقشاۋلانعان. تومەنگى پالاتا توراعاسى كارانتين تالاپتارىن قاتاڭ ساقتاپ، سوڭعى ايدا قاشىقتان جۇمىس ىستەگەن. ءاربىر پلەنارلىق وتىرىستىڭ الدىندا كوروناۆيرۋسقا تەست تاپسىرعان.

9 ماۋسىمدا نۇرلان نىعماتۋليننىڭ دەنساۋلىق ساقتاۋ مينيسترىمەن كەزدەسكەنى ءمالىم بولدى. ەلجان ءبىرتانوۆتان دا كوروناۆيرۋس تابىلعان سوڭ ءماجىلىس توراعاسى كەشە تاعى ءبىر مارتە تەست تاپسىرعان.

نۇرلان نىعماتۋليننەن انىقتالعان ۆيرۋس سيمپتومسىز. قازىر ول قاشىقتان جۇمىس ىستەپ جاتىر. ال بۇگىنگە جوسپارلانعان ءماجىلىستىڭ پلەنارلىق وتىرىسىن توراعانىڭ ورىنباسارى وتكىزبەك.

نىعماتۋللين كوروناۆيرۋس جۇققان العاشقى شەنەۋنىك ەمەس. بۇعان دەيىن ءماجىلىس دەپۋتاتى بەكبولات تىلەۋحان، پرەزيدەنتتىڭ ءباسپاسوز حاتشىسى بەرىك ءۋالي، الماتى قالاسىنىڭ دەنساۋلىق ساقتاۋ باسقارماسىنىڭ باسشىسى، بۇرىنعى دەنساۋلىق ۆيتسە-ءمينيسترى كامالجان نادىروۆ، دەنساۋلىق ساقتاۋ ءمينيسترى ەلجان ءبىرتانوۆتان كوروناۆيرۋس انىقتالدى.

"The Qazaq Times"