ەلىمىزدە ءالى دە كوروناۆيرۋس جۇقتىرۋ قاۋپى جويىلعان جوق. وسىعان وراي استانا قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا COVID-19 ۆيرۋسىنىڭ تارالۋىنىڭ نەگىزگى وشاعى رەتىندە وتباسى قارالىپ وتىرعانىن ەسكەرتتى.

وعان سەبەپ جاڭادان تىركەلگەن جاعدايلاردىڭ كوبىنىڭ وتباسىلىق ىندەت وشاقتارىنا بايلانىستى بولۋى. باسقارما باسشىسى: «ينفەكتسيانىڭ جاڭا وشاقتارى بايقالادى. بۇل - وتباسىلىق وشاقتار. كۇن سايىن ءبىز اۋرۋدى جۇقتىرعان وتباسىنىڭ ەكى نەمەسە كەيدە 5-7 مۇشەسىنەن ۆيرۋس تابامىز. وتباسىلىق مەرەكەلەردى وتكىزۋ كەزىندە ىندەت جۇقتىرعاندار بايقالدى، بۇعان مۇلدەم جول بەرۋگە بولمايدى. كەي ادامداردىڭ سانيتارلىق نورمالاردى ساقتاماعان جاۋاپسىز ارەكەتى كىشكەنتاي بالالار، قارتتار مەن جۇكتى ايەلى بار وتباسىنىڭ بارلىق مۇشەلەرىنىڭ جۇقتىرۋىنا اكەلىپ سوعادى. ءتىپتى Covid-19 دياگنوزىمەن تۇسكەن جۇكتى ايەلدىڭ ءسابيى دە كوروناۆيرۋسپەن تۋعان كەزى بولدى. بالالاردى انالارىنان بولەك ۇستاۋعا تۋرا كەلدى. كەي ادامدار ءوز دەنساۋلىعىن كۇتپەسە دە، جاقىندارىن ويلاۋى ءتيىس. تاجىريبە سوزىلمالى اۋرۋى جوق، دەنى ساۋ ادامنىڭ ءوزى كوروناۆيرۋستان جاتىپ قالۋى مۇمكىن ەكەنىن كورسەتىپ وتىر. اعزا ينفەكتسيامەن كۇرەسە الماعان سوڭ جاساندى جەلدەتۋ اپپاراتىنا قوسۋعا تۋرا كەلدى. ەشبىر جاعدايدا ءوزىن-ءوزى ەمدەۋگە بولمايدى»، – دەدى.

بارلىق ينفەكتسيا جۇقتىرعانداردىڭ 75%-ى 18 بەن 59 جاس ارالىعىنداعىلار.

كوروناۆيرۋس پاندەمياسى باستالعاننان بەرى ەل استاناسىندا 2543 ادام ينفەكتسيا جۇقتىردى: 34 ناۋقاستىڭ جاعدايى اۋىر بولسا ونىڭ 12-ءسى وتە اۋىر جاعدايدا، وكپەنى جاساندى جەلدەتۋ اپپاراتىنا قوسىلعان، 10 ناۋقاس ىندەتتەن كوز جۇمدى. 1679 ناۋقاس (66 %) جازىلىپ شىقتى.

سانيتارلىق نورمالاردى قاتاڭ ساقتاۋ كەرەكتىگىن اتاپ وتكەن باسقارما باسشىسى: اسا قاجەتتىلىك بولماسا ادام كوپ جينالاتىن جەرلەرگە بارماۋىن، قوعامدىق ورىندا ماسكا كيىپ، اراقاشىقتىق ساقتاپ جانە انتيسەپتيك پايدالانۋ كەرەك ەكەندىگىن ەسكەرتتى.

"The Qazaq Times"