ء"ۇنسىز" نارازىلىقتىڭ ءۇنى. استانا، 8 ماۋسىم، 2020 جىل. فوتو: Sputnik / ۆلاديسلاۆ ۆودنەۆ

استانادا كوپبالالى انالار ءۇنسىز نارازىلىق اكتسياسىن وتكىزدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ الدىنا كەلگەن 15 شاقتى ايەل ءوز شاعىمىن پلاتكاتقا جازىپ ءبىلدىردى.

سونىڭ ىشىندە باستاپقى جارناسىز جانە جالدامالى باسپانا بەرۋ، ءار بالاعا 21 مىڭ تەڭگە بەرۋ، مۇقتاج حالىقتىڭ كرەديتىن كەشىرۋ سياقتى ناقتى تالاپتار بار. بۇدان وزگە، كوپبالالى انالار ۆاكتسيناعا قارسى ەكەنىن ءبىلدىردى. «اشتىق جاريالايمىز!» دەگەن پلاكات تا بار. كوپبالالى انالار ناقتى شارا قولعا الىنباسا، اشتىق جاريالاپ، ءۇنسىز پيكەتتە وتىرا بەرەمىز دەيدى.

قالا اكىمىنىڭ كەڭەسشىسى داۋرەن بابامۇراتوۆتىڭ ايتۋىنشا، جەرگىلكتى بيلىك پيكەتكە شىققان ءاربىر انامەن جەكە-جەكە كەزدەسۋگە دايىن. كەڭەسشى پيكەتكە شىققاندارعا باسپانانىڭ بەرىلمەۋ سەبەبىن ءتۇسىندىرىپ جاتقانىن ايتتى.

«قازىر ەلوردادا ءۇي كەزەگىندە 46 مىڭنان استام ادام تۇر. بىراق ءبىر نارسەنى ءتۇسىنۋ كەرەك، 2008-2010 جىلداردان بەرى ءۇي كەزەگىندە تۇرعان ازاماتتار بار. ولار ءالى ءۇي العان جوق. ال بۇل كىسىلەردىڭ كوپشىلىگى 2019 جىلى كەزەككە تۇرعان»، – دەدى بابامۇراتوۆ.

ونىڭ سوزىنە قاراعاندا، پيكەتكە شىققان انالار «باقىتتى وتباسى» باعدارلاماسى ارقىلى كرەديتتىك باسپانا الۋعا قۇقىلى. بىراق ونىڭ ءوزى كەزەك بويىنشا بەرىلەدى.

«استانادا «باقىتتى وتباسى» بويىنشا 2,6 مىڭنان استام ادام ءوتىنىش بەرگەن. ولاردىڭ 414-ءى جولداما العان. تۇرعىن ءۇي قۇرىلىس جيناق بانكى بارلىعىنا بىردەي كرەديت بەرمەيدى. ياعني، ونىڭ ىشىنەن تاعى ارتىلۋى مۇمكىن. سوندا ودان كەيىن كەزەكتە تۇرعان ازاماتتارعا ۇلەستىرىلەدى. قالا اكىمشىلىگى «باقىتتى وتباسى» بويىنشا كۆوتانى ۇلعايتۋ ماسەلەسىن كوتەرىپ جاتىر»، – دەگەن شەنەۋنىكتىڭ ءسوزى كوپتى يلاندىرا المادى.

بىلتىر اقپان ايىنان بەرى قازاقستاننىڭ كوپبالالى جانە مۇگەدەك بالا تاربيلەپ وتىرعان ايەلدەر بيلىكتىڭ جۇرگىزىپ وتىرعان الەۋمەتتىك ساياساتىنا كوڭىلى تولمايتىنىن، ەڭ اۋەلى باسپانا جانە نەسيە ماسەلەسىن شەشىپ بەرۋىن تالاپ ەتىپ، ءارتۇرلى نارازىلىق جيىندارىن وتكىزىپ كەلەدى. دەسە دە وسىعان ۇقساس، كەيىنگى جىلى بەلەڭ العان قارسىلىق كوڭىل-كۇيدىڭ كۇشەيگەنىنە قاراماستان، ءالى كۇنگە دەيىن ەلدىڭ تۇرمىسى مەن ءال-اۋقاتىن ارتتىراتىن جۇيەلى-ىرگەلى مەحانيزم جاسالىپ بولعان جوق.

"The Qazaq Times"