الماتىدا ميتينگكە جينالعانداردى كۇشپەن ۇستاۋ باستالدى

بۇگىن قازاقستاننىڭ بىرقاتار قالالارىندا ميتينگ وتەدى دەگەن كۇنى پوليتسيا بەلسەندىلەردى كۇشپەن ۇستاپ جاتىر.

وقيعا ورنىندا جۇرگەن تىلشىلەرىمىزدىڭ حابارلاۋىنشا، الماتىداعى اباي-نازارباەۆ كوشەلەرىنىڭ قيىلىسىندا شامامەن 150-گە تارتا ادام جينالعان. 15 شاقتى ادامدى پوليتسيا ۇستاپ اكەتتى. ۇستالعاندار قاتارىندا ازاماتتىق بەلسەندى اسيا تۋلەسوۆا دا بار. شەرۋگە شىققاندار «نازارباەۆ جۇيەسى قۇرىسىن!»، «جەر ساتىلماسىن!»، «نۇر وتان پارتياسى تاراتىلسىن!» دەپ ايقايلادى. جاپپاي ۇستالۋلار استانادا دا جالعاسىپ جاتىر.

فوتو: QT

الماتىداعى اباي الاڭى ماڭىنا جينالعان نارازى جۇرتپەن تىلدەسۋ ماقساتىندا الەۋمەتتىك ءال-اۋقات باسقارماسىنىڭ باسشىسى دانيار الكەبايۇلى مەن مەدەۋ اۋدانىنىڭ اكىمى سۇلتانبەك ماكەجانوۆ كەلدى. شامامەن ساعات 11.25-تە دەمپارتيا كوشباسشىسى جانبولات ماماي دا نارازى توپ قاتارىنا قوسىلدى. بەلگىلى جۋرناليست ەرمۇرات ءباپي دە شەرۋگە شىققان.

فوتو: QT

ميتينگكە قاتىسۋشىنىڭ ءبىرى: «بۇگىنگى ءبىز بيلىككە ءوز تالاپتارىمىزدى ايتۋعا كەلدىك. بيلىكتە وتىرعان ەسكى جۇيەنى قولداۋشى شالدار ورنىنان كەتسىن. 80-90 جاسقا كەلىپ، ءالى ەل باسقارىپ وتىر. حالىقتا بار ماسەلە، ۋايىم-قايعى ولاردا جوق. ەندى جاستارعا ورىن بەرسىن»، – دەيدى.

فوتو: QT

6 ماۋسىم تاڭەرتەڭنەن بەرى دوستىق داڭعىلى مەن قۇرمانعازى كوشەسىنەن جوعارى قاراي جاياۋ جۇرگىنشىلەر قوزعالىسى شەكتەلدى. سونىمەن قاتار اباي مەن نازارباەۆ، قۇرمانعازى مەن قوناەۆ قيىلىسىنا بەكەتتەر قويىلعان. وپپوزيتسيا ميتينگىلەرىنىڭ ءداستۇرلى ورنىنا اينالعان «استانا» جابىلدى. اتالعان جەردە دە پوليتسەيلەر مەن اۆتوزاكتار تۇر.

فوتو: QT

بۇگىن الماتى قالاسىنىڭ باس سانيتار دارىگەرى جانداربەك بەكشيننىڭ تاپسىرماسىمەن قالادا ادامدار كوپ جينالاتىن ورىنداردى دەزينفەكتسيالاۋ جۇمىستارى باستالعان. ءبىر قىزىعى، بۇل شارا «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپتىڭ جەتەكشىسى جانبولات ماماي مەن وپپوزيتسيالىق ساياساتكەر مۇحتار ءابليازوۆ جوسپارلاعان ميتينگ كۇنىمەن قاتار كەلىپ وتىر.

ءۇش ايعا سوزىلعان كارانتيننەن كەيىن العاش رەت ميتينگ جوسپارلانىپ وتىر. سوڭعى رەت 1 ناۋرىزدا قازاقستاننىڭ بىرنەشە قالاسىندا بەلسەندىلەر ۇيىمداستىرماق بولعان ميتينگى ورنىنا جاقىنداعانداردى دا پوليتسيا جاپپاي الىپ كەتكەن.

"The Qazaq Times"