كەز-كەلگەن ادام تابىسقا جەتىپ، اتاقتى بولىپ، ومىردە ءوزىنىڭ ءىزىن قالدىرىپ كەتۋدى ارماندايدى. بىراق بۇل ارمانعا قول جەتكىزۋ تەك مىڭنان بىرەۋىنىڭ  عانا قولىنان كەلەتىنى راس. سوندا ومىردە تابىسقا جەتۋدىڭ جولى قانداي جانە ارماننىڭ ورىندالۋى ءۇشىن نە ىستەۋ كەرەك دەگەن قاراپايىم سۇراقتار تۋىنداماق. بۇل سۇراقتارعا جاۋاپ ىزدەۋ ماقساتىندا، الەمدەگى ەڭ تانىمال جانە ارمانىن اقيقاتقا اينالدىرا بىلگەن تۇلعالاردىڭ قاعيدالارىمەن تانىستىرا وتىرساق. نازارلارىڭىزعا الەمدەگى ەڭ باي ءارى تانىمال جازۋشى دجوان روۋلينگتىڭ ماقساتقا جەتۋدەگى نەگىزگى ەرەجەلەرى مەن جەتىستىگىنىڭ قۇپياسىمەن بولىسە وتىرۋدى ءجون كوردىك. 

1. ەگەر ءسىز ءبىر دۇنيەنى باستاساڭىز، ونى مىندەتتى تۇردە اياعىنا دەيىن جەتكىزىڭىز. ءسىزدى "ەشكىم وقىمايدى", "كورمەيدى", "تىڭدامايدى" دەگەن وي مازالاعانىنا قاراماستان، تۋىندىڭىزدى جارىققا شىعارۋعا تىرىسىڭىز.
2. ەگەر ءسىزدىڭ تۋىندىڭىز ءوزىنىڭ اۋديتورياسىن تابا الماسا دا، ءسىز باسقا ەش جەردەن الا المايتىن تاجىريبەگە يە بولاسىز.
3. سونىمەن قاتار، ەگەر ءسىزدىڭ جۇمىسىڭىز نازاردان تىس قالسا دا، ول ونىڭ ناشار ەكەندىگىنىڭ دالەلى ەمەس. تالاپ پەن ەڭبەك - كەز-كەلگەن ءىستى سوڭىنا دەيىن جەتكىزەتىن دۇنيە. تۋىندىڭىزدى  اياقتاساڭىز، ءوزىڭىزدىڭ تالاپتى ءارى ەڭبەكقور ەكەندىگىڭىزگە كوز جەتكىزە الاسىز.
4. ءسىز جۇمىسىڭىزدى اياقتاعاننان كەيىن، ءوزىڭىزدىڭ تاعى دا جاساي الاتىندىعىڭىزعا كوزىڭىز جەتەدى. بۇل كەرەمەت شابىت بەرەتىن سەزىم. ەڭ باستىسى ەشتەمەنى جارتى جولدا تاستاپ كەتپەڭىز جانە ساتسىزدىكتەردەن قورىقپاڭىز.
5. مۇمكىن ءسىزدىڭ ەكىنشى، بەسىنشى، ءتىپتى سەگىزىنشى كىتابىڭىز نەمەسە ءانىڭىز، تۋىندىڭىز توپتى جارىپ شىعاتىن شىعار. بىراق ءسىز ءبىرىنشىسىن جازىپ بىتىرمەسەڭىز ونى بىلە المايسىز. باستىسى - ساعىڭىزدى سىندىرىپ الماڭىز.                                                                                                                                   “The Qazaq Times”