«پارلامەنتتەگى وپپوزيتسيا» ساعىمى: سەنات توقاەۆ ۇسىنىسىن ماقۇلداپ، اقورداعا جولدادى

پارلامەنت سەناتورلارى ادەتتەگىدەي «پارلامەنتتىك وپپوزيتسيا» تۋرالى زاڭ جوباسىن ءبىراۋىزدان ماقۇلدادى.

سەناتورلار وتىرىسىندا ەكى زاڭ جوباسىن قاراستىردى. بىرەۋى پارلامەنت كوميتەتتەرi مەن كوميسسيالارى تۋرالى بولسا، ەكىنشىسى پارلامەنتتىك وپپوزيتسيا ماسەلەلەرى بويىنشا وزگەرىس پەن تولىقتىرۋلار ەنگىزۋگە ارنالدى. دەپۋتاتتار ەكى زاڭدى دا ءبىراۋىزدان قابىلدادى.

سەنات توراعاسى ماۋلەن اشىمباەۆتىڭ ايتۋىنشا، زاڭ جوبالارى ۇلتتىق قوعامدىق سەنىم كەڭەسىنىڭ ەكىنشى وتىرىسىندا پرەزيدەنت ۇسىنعان بىرقاتار ساياسي رەفورما اياسىندا ازىرلەنگەن

«سوعان سايكەس، ەلىمىزدە دەموكراتيالىق ۇردىستەردى ارى قاراي دامىتۋ ماقساتىندا قولدانىستاعى زاڭناماعا «پارلامەنتتىك كوپشىلىك» جانە «پارلامەنتتىك وپپوزيتسيا» ەنگىزىلىپ وتىر. زاڭمەن ماجىلىسكە سايلاناتىن پارلامەنتتىك وپپوزيتسيانىڭ وكىلەتتىلىكتەرى جانە ولاردىڭ جۇمىسىن قامتاماسىز ەتۋ تەتىكتەرى ناقتى ايقىندالدى. مەملەكەت باسشىسىنىڭ ۇسىنىسىمەن قابىلدانعان جاڭا زاڭنامالىق نورمالار ەلىمىزدە پارلامەنتتىك وپپوزيتسياعا كەپىلدىك بەرەدى جانە قازاقستانداعى كاسىبي پارلامەنتاريزمنىڭ جاڭا كەزەڭىنە جول اشادى دەپ سەنەمىز»، – دەدى سۋ جاڭا سەنات سپيكەرى.

ءماجىلىس دەپۋتاتى ازات پەرۋاشەۆتىڭ ايتۋىنشا، پارلامەنتتىك وپپوزيتسيا پارلامەنتتىك كوپشىلىككە ەنبەيدى. ال ساياسي جانە الەۋمەتتىك-ەكونوميكالىق ماسەلەلەرگە قاتىستى باسقا پوزيتسيانى ۇستانادى.

رەسمي حابارعا قاراعاندا، «زاڭ جوباسىندا پارلامەنتتىك وپپوزيتسياعا مىناداي قۇقىقتار بەرىلىپ وتىر:

• ءبىر سەسسيا ىشىندە كەمىندە ءبىر رەت مەملەكەت پەن قوعامنىڭ تىنىس-تىرشىلىگىنە قاتىستى وزەكتى ماسەلەلەر بويىنشا پارلامەنتتىك تىڭداۋ وتكىزۋگە باستاماشىلىق جاساۋ;
• پارلامەنتتىك سەسسيادا كەمىندە ەكى رەت ۇكىمەت ساعاتتارىنىڭ كۇن ءتارتىبىن بەلگىلەۋ;
• وپپوزيتسيا ماقۇلدامايتىن ۇكىمەتتىك زاڭ جوبالارىنا التەرناتيۆتى زاڭ جوبالارىن ەنگىزۋ.

سونىمەن قاتار وپپوزيتسيالىق فراكتسيالاردىڭ باسشىلارى نەمەسە وكىلدەرى پارلامەنت پالاتالارىنىڭ بىرلەسكەن وتىرىستارىندا، ءماجىلىستىڭ جالپى وتىرىستارىندا، تۇراقتى كوميتەتتەردىڭ، جۇمىس توپتارىنىڭ وتىرىستارىندا، پارلامەنتتىك تىڭداۋلار مەن باسقا دا شارالاردا ءسوز سويلەي الادى».

ال وسى زاڭعا ىلەسپە زاڭ جوباسى بويىنشا ءماجىلىستىڭ ءبىر تۇراقتى كوميتەتىنىڭ توراعاسى تەك وپپوزيتسيا دەپۋتاتتارىنىڭ اراسىنان سايلانادى. ءماجىلىستىڭ تۇراقتى كوميتەتىنىڭ ەكى حاتشىسىن دا پارلامەنتتىك وپپوزيتسيا ىشىنەن سايلاۋ ۇسىنىلىپ وتىر.

بىلتىر ماۋسىمدا جاپپاي قارسىلىقپەن جانە مىڭداعان ادامنىڭ قاماۋعا الىنۋىمەن وتكەن پرەزيدەنت سايلاۋىندا جەڭدى دەپ ەسەپتەلگەن قازاقستان پرەزيدەنتى قاسىم-جومارت توقاەۆ ۇلتتىق قوعامدىق سەنىم كەڭەسىن قۇرىپ، ساياسي رەفورمالارعا باستايتىن زاڭدار قابىلداۋعا شاقىراتىنىن مالىمدەگەن. جاقىندا توقاەۆ قۇقىق قورعاۋشىلار مەن قوعام بەلسەندىلەرى «الدارقاتۋ» دەپ باعالاپ، قاتاڭ سىنعا العان «بەيبىت جيىندار تۋرالى»، «ساياسي پارتيالار تۋرالى»، «سايلاۋ تۋرالى» زاڭعا قول قويعان.

"The Qazaq Times"