بۇگىن قازاقستان پارلامەنتىنىڭ تومەنگى پالاتاسى «پەداگوگ مارتەبەسى تۋرالى» زاڭ جوباسىن ماقۇلدادى.

ءبىلىم جانە عىلىم ءمينيسترى اسحات ايماعامبەتوۆ 19 باپتى قامتيتىن زاڭ جوباسى ءبىر جارىم ميلليوننان استام مۇعالىمنىڭ جۇمىسىنا قاتىستى ماڭىزدى قۇجات. زاڭ جوباسى نەگىزىنەن ءتورت باعىت بويىنشا وزگەرىس جاساۋدى كوزدەيدى: جۇكتەمەنى ازايتۋ، پەداگوگ قىزمەتىنە تالاپتى كۇشەيتۋ، ماتەريالدىق تۇرعىدا ىنتالاندىرۋ جانە ماتەريالدىق ەمەس مەحانيزمدەر.

ءمينيستردىڭ ايتۋىنشا، وقىلىم كەزىندە زاڭ جوباسىنداعى مۇعالىمدەر ەلدىڭ قوعامدىق ەكونوميكالىق دامۋىنا ۇلەس قوسۋى كەرەك دەگەن بولىك الىنعان، سەبەبى زاڭنىڭ بۇل بولىگىن كەيبىر باسشىلار «اسىرا پايدالانۋى مۇمكىن» دەگەن كۇدىك ايتىلعان.

ەندى «مۇعالىمدەردى ءوز مىندەتىنە كىرمەيتىن باسقا جۇمىسقا تارتقان نەمەسە ورىنسىز ەسەپ بەرۋىن تالاپ ەتكەن كەز كەلگەن باسشى نە قىزمەتركەرلەرگە 20-دان 120 اەك-كە دەيىن ايىپپۇل سالىنباق».

مينيستر ايماعامبەتوۆتىڭ سوزىنشە، قازىر مۇعالىمدەر ورتاشا جالاقى كولەمىنىڭ 65%-ىن عانا الادى. ەگەر زاڭ جوباسى جىل سوڭىنا دەيىن قابىلدانسا، كەلەسى جىلدان باستاپ، مۇعالىمدەردىڭ جالاقىسىن 25%-دان باستاپ ءوسىرۋ قاراستىرىلعان.

– مۇنداي جۇمىستار قاڭتار ايىنان باستالادى. سىنىپ جەتەكشىسى بولعانى ءۇشىن جانە داپتەر تەكسەرگەنى ءۇشىن ۇستەماقىنى ەكى ەسەگە ۇلعايتۋ بۇل 182 مىڭ پەداگوگتى قامتيدى. سونىمەن بىرگە مۇعالىمدەردىڭ دەمالىسىن 56 كۇنگە دەيىن ۇلعايتۋ كوزدەلگەن. قازىر ولار 42 كۇن دەمالادى، – دەدى باس مۇعالىم.

ال زاڭدى جۇزەگە اسىرۋعا بەس جىل ىشىندە 5,3 تريلليون تەڭگە قاراجات قاجەت كورىنەدى. ءمينيستردىڭ ءوزى مويىنداعانداي، ادەتتە قازاقستاندا مۇعالىمدەر قاۋىمى اكىمشىلىك ءىس-شارالارعا ءماجبۇرلى تۇردە (2017 جىلعى ەكسپو، سايلاۋ ناۋقاندارى مەن ساناقتار) قاتىستىراتىنىن، ديرەكتورلار بيلىكتىك گازەت-جۋرنالدارعا قيناپ جازدىراتىنىن ايتىپ، ءجيى شاعىمدانادى. ەل ىشىندە «ۇكىمەتتىڭ قول بالاسى» دەپ اتالىپ كەتكەن پەداگوگتاردىڭ تۇرمىسى مەن كاسىبي بىلىگىن دامىتۋعا مۇمكىندىگى جەتىڭكىرە بەرمەيتىنى كوپ تالقىلانىپ كەلەدى. مۇعالىم قىزمەتىنە بيلىك پەن بۇحارا قۇرمەتپەن قاراۋدى «زاڭ كۇشىمەن ىسكە اسىرۋ مۇمكىن ەمەس» دەيدى كەي ساراپشىلار.

جازدان بەرى «كوپتىڭ قىزۋ تالقىسىنا تۇسكەن» زاڭ جوباسىن ءماجىلىس دەپۋتاتتارى ءبىرىنشى وقىلىمدا ماقۇلداپ قابىلدادى. جوبا سەنات تالقىلاۋىنا وتەدى. زاڭ جوباسىنىڭ تولىق ءماتىنىن مىنا جەردەن وقي الاسىز.

"The Qazaq Times"