پرەزيدەنت ترامپتىڭ يمپيچمەنتى ىسىندەگى سوتتا اقش سەناتى ترامپقا اراشا ءتۇستى. بۇعان قوسا كونگرەسس يمپيچمەنت تۋرالى ەكى ەرەجەنى بۇزعاندىقتان دەموكراتتاردىڭ ترامپتى قۇلاتۋ ءۇشىن 4 ايعا جالعاسقان يمپيچمەنت ارەكەتى ءساتسىز اياقتالدى.

اقش جەرگىلىكتى ۋاقىتىمەن سارسەنبى كۇنى تۇستەن كەيىن جوعارى سوت توراعاسى جون روبەرتستىڭ توراعالىعىمەن سەناتورلار پالاتاسىندا 100 سەناتور ءوز داۋىستارىن ءبىر-بىرلەپ جاريالادى. ناتيجەسىندە، ترامپتىڭ بيلىگىن تەرىس پايدالانۋ ايىبىن 52 داۋىس تەرىستەدى، 48 ادام راستادى. سونداي-اق، باسىم داۋىس كونگرەس شەشىمىن تەرىستەپ داۋىس بەرگەن.

وسىدان كەيىن ترامپ ءوزىنىڭ «تۆيتتەر» پاراقشاسىنا: «ەلىمىز يمپيچمەنتتىك فارستى جەڭدى!»، – دەپ جازعان. ول جانە بۇل تۋرالى اق ۇيدە بەيسەنبى كۇنى ارنايى ءباسپاسوز ءماجىلىسىن وتكىزەتىنىن ايتقان.

سونىمەن، اقش تاريحىندا العاش رەت پرەزيدەنت مەرزىمىنەن بۇرىن قىزمەتىنەن كەتۋى مۇمكىن دەگەن بولجاۋلى وقيعا بولماي قالدى. كوپشىلىك سەناتورلار «ترامپ قانداي قاتەلىك جاساسا دا پرەزيدەنتتىك تاريحتا تۇڭعىش رەت قىزمەتىنەن بوساتىلۋىنا ەشقانداي سەبەپ جوق» دەستى. ءتىپتى، وسىعان بايلانىستى كەيبىر سەناتورلار دەموكراتيالىق پارتيانى دا ايىپتادى.

ايتا كەتەيىك، اقش-تىڭ 243 جىلدىق تاريحىندا پرەزيدەنتكە قارسى يمپيچمەنت وسىمەن ءۇش رەت بولعان. وكىلدەر پالاتاسى پرەزيدەنت ەندريۋ دجەكسون (1868 جىلى) مەن پرەزيدەنت بيلل كلينتونعا (1998 جىلى) قارسى يمپيچمەنت جاريالاعان. بىراق، ولاردى دا سوڭىندا سەنات اقتاپ، وكىلەتتى مەرزىمىن تولىق اياقتاعان. دەمەك، اقش تاريحىندا پرەزيدەنتى مەرزىمىنەن بۇرىن تاقتان تايدىرۋ ارەكەتى بولعان ەمەس. سونىمەن، يمپيچمەنتتەن قۇتىلعان ترامپ ەندى كەزەكتى پرەزيدەنت سايلاۋعا دايىندالماق.

“The Qazaq Times”