وزبەكستاندا ساردوبا سۋ بوگەتى بۇزىلىپ، بىرنەشە اۋىلدى سۋ الدى. فوتو: اشىق دەرەككوز

تۇركىستان وبلىسىنىڭ ماقتاارال اۋدانىندا سۋ تاسقىنى سەبەپتى تج جاريالاندى. 

تۇركىستان وبلىسىنا قاراستى ماقتاارال اۋدانىنىڭ اكىمى باقىت اسانوۆ تۇنگى ساعات 00:00-دە توتەنشە جاعداي جاريالاۋعا تاپسىرما بەردى.

بۇگىن، 2 مامىر تاڭعى ساعات 04:30-دا ماقتاارال اۋدانىنىڭ شەكاراسىنداعى ورتالىق دالالىق كوللەكتورىنان (وتكىزۋ قۋاتى - سەكۋندىنا 120 تەكشە مەتر) سۋ توگىلىپ، جەڭىس جانە جاڭا تۇرمىس اۋىلدارىن سۋ الدى. «سونداي-اق وبلىستىق ماندەگى «مىرزاكەنت - جەڭىس - جاڭا تۇرمىس» تاسجولىن سۋ باسقان. كولىك ءجۇرۋى مۇمكىن ەمەس» دەلىنگەن اكىمدىك حابارلاماسىندا. سونداي-اق بۇگىن ساعات 11:30 شاماسىندا اتالعان اۋدانعا قارايتىن فەرداۋسي اۋىلى دا سۋ استىندا قالعانى حابارلاندى.

ازاماتتاردى اپاتتى ايماقتان كوشىرىپ جاتىر. فوتو: اشىق دەرەككوز

قازىرگى تاڭدا اپاتتىق-قۇتقارۋ جۇمىستارى ءجۇرىپ جاتىر. ازىرگە 5400 ادام ءارتۇرلى جولمەن ەۆاكۋتسيالانعان. جاڭا تۇرمىس، جەڭىس، نۇرلى جول ەلدى مەكەندەرىنىڭ تۇرعىندارى اۋدان ورتالىعى مىرزاكەنتتە ورنالاسقان مىرزاكەنت مەكتەپ-گيمنازياسىنا (600 ورىن), س.راحىموۆ اتىنداعى جالپى ورتا مەكتەبىنە (700 ورىن), پۋشكين (400 ورىن), ابىلايحان ورتا مەكتەپتەرىنە (500 ورىن) ەۆاكۋاتسيالانىپ، وعان 6 اۆتوبۋس جۇمىلدىرىلعان. ماقتاارال اۋدانىنىڭ اكىمى، اۋداندىق توتەنشە جاعداي شتابىنىڭ توراعاسى باقىت اسانوۆتىڭ توراعالىعىمەن 2 مامىر تۇنگى 00:00-دە ارنايى جيىن ءوتىپ، توتەنشە جاعداي جاريالاۋ جونىندە تاپسىرما بەرىلدى.

تۇركىستان وبلىسىنداعى سۋ العان ەلدى مەكەندەگى كورىنىس. فوتو: اشىق دەرەككوز

قازىرگى تاڭدا جوعارىدا اتالعان اۋىلداردان باسقا  مىرزاكەنت، جانتاقساي ەلدى مەكەنىنىڭ تۇرعىندارىن ەۆاكۋاتسيالاۋ ماسەلەسى قاراستىرىلىپ جاتىر.

;feature=emb_title

تۇركىستان وبلىسىنىڭ اكىمى ومىرزاق شوكەەۆ شۇعىل شتابتىڭ جۇمىسى بويىنشا ارنايى مالىمدەمە جاسادى. ايماق باسشىسى ەشبىر ازاماتتىڭ زارداپ شەكپەگەنىن، مال باسىنىڭ امان ەكەنىن ايتىپ سەندىرۋگە تىرىستى.

قىزىل سۋدىڭ تاسقىنىن توقتاتۋدا ارنايى تەحنيكا قولدانىلىپ جاتىر. فوتو: تۇركىستان وبلىسى اكىمدىگى

وزبەكستاننىڭ سىرداريا وبلىسىندا ورنالاسقان "ساردوبا" سۋ قويماسى تولاسسىز جاۋعان جاۋىن مەن قاتتى داۋىلدان سوڭ بوگەت بۇزىلعان. كوممۋنيكاتسيا جەلىلەرى مەن ەگىستىك القابىن، بىرنەشە اۋىلدى سۋ الىپ، سالدارىنان 11,5 مىڭ وزبەكستاندىق ەۆاكۋاتسيالانعان.  وسىعان بايلانىستى كەشە تۇسقايتا، ساعات 16:00 شاماسىندا تۇركىستان وبلىسىنىڭ ماقتاارال اۋدانىنىڭ بىرنەشە ەلدى مەكەنىندە ورنالاسقان كوللەكتورلارعا سۋ تولعان.

وزبەكستانداعى سۋ اپاتى بولعان اۋماق. فوتو: اشىق دەرەككوز

2010-2017 ج.ج. ارالىعىندا جەتى جىل بويى سالىنعان ساردوبا سۋ قويماسىنىڭ سىيىمدىلىعى 922 ملن تەكشە مەترگە شىعادى.  جۋىردا عانا مۇندا 2022 جىلى قولدانىلىسقا بەرۋ جوسپارلانعان قۋاتتىلىعى 10,7 مۆت گەس قۇرىلىسى باستالعان.

"The Qazaq Times"