ماقتارال اۋدانىنداعى سۋ تاسقىنى. فوتو: تۇركىستان وبلىسى وڭىرلىك كوممۋنيكاتسيا قىزمەتى

ماقتارال اۋدانىنداعى قىزىل سۋدان تونگەن قاۋىپتەن 31,6 مىڭ ادامدى كوشىرۋگە تۋرا كەلدى.

ماقتارال اۋدانىندا 2 مامىردان بەرى 31 606 ادام ەۆاكۋاتسيالانعانى حابارلاندى. باسپاناسىز قالعان حالىق اتاكەنت ەلدى مەكەنىندە قۇرىلعان 24 ەۆاكۋاتسيالىق بولىمگە ورنالاستىرىلعان. بۇگىنگى جاڭارتىلعان اقپارات بويىنشا، جاڭاتۇرمىس (46 ءۇي), جەڭىس (130 ءۇي), فيردوۋسي (250 ءۇي), ورگەباس (194 ءۇي), دوستىق (11 ءۇي) ەلدى مەكەندەرىندە جالپى سانى 631 ءۇي سۋ استىندا قالىپ قويعان.

اپاتتان قۇتقارۋ جۇمىستارىنا جالپى سانى 986 ادام، 4 قايىق، 180 دانا تەحنيكا تارتىلعان.

3115 ءىرى قارا مال، 1101 ۇساق مال، 585 جىلقى، 34 تۇيە كەلەس اۋدانىنا، 1797 ءىرى قارا مال، 6029 ۇساق مال، 689 جىلقى، 381 تۇيە، 165 شوشقا ماقتارال اۋدانىنداعى سۋ باسۋ قاۋپى جوق جەرگە جەتكىزىلدى.

ماقتارال اۋدانىندا سۋ باسۋ قاۋپى بار ەلدىمەكەندەر اينالاسىنا بوگەتتەر تۇرعىزىلۋدا.

  • نۇرلى جول ەلدى مەكەنىندە ۇزىندىعى 2,5 م، بيىكتىگى 1,5 م.،
  • ورگەباس اۋىلىندا ۇزىندىعى 20 م، بيىكتىگى 1 م.،
  • ىرىستى ەلدى مەكەنىندە بيىكتىگى 0,5 م، ۇزىندىعى 40 م.،
  • جانتاقساي ەلدى مەكەنىندە ۇزىندىعى 800 م. بولاتىن بوگەت تۇرعىزىلدى.
  • ال فيردوۋسيدان مىرزاكەنتكە قاراي 3 كوللەكتور ورنالاستىرىلسا، قوعالى اۋىلىنداعى كۇرە جولدىڭ بويىندا ۇزىندىعى 500 مەتردەن اساتىن بوگەت سالىنىپ جاتىر.

ماقتارال اۋدانىنىڭ 10 ەلدى مەكەنى قاۋىپتى ايماقتا ورنالاسقان. ونىڭ 5-ەۋى، ياعني جاڭاتۇرمىس، جەڭىس، فيردوۋسي، ورگەباس، دوستىق اۋىلدارى سۋ استىندا قالسا، باسقا 5 ەلدى مەكەن قاۋىپسىزدەندىرىلگەن. وبلىس اكىمىنىڭ ورىنباسارى ساكەن قالقامانوۆتىڭ حابارلاۋىنشا, 14 مىڭنان استام حالقى بار مىرزاكەنت ەلدى مەكەنى قىزىل سۋدان امان قالدى.

1 مامىر كۇنى تاڭعى ساعاتتا 5:55-تە پايدالانۋعا بەرىلگەنىنە ءالى ءۇش جىل بولا قويماعان، «عاسىر جوباسى» اتالعان ساردوبا سۋ قويماسى كەيىنگى كۇندەرى تولاسسىز جاۋعان نوسەر مەن قاتتى داۋىلدىڭ كەسىرىنەن جارىلىپ، اۋقىمى ۇلگەن اپاتقا ۇلاسقان. سالدارىنان سىرداريا وبلىسىنىڭ ساردوبا، اقالتىن جانە مىرزاوبود اۋداندارىنداعى 22 ەلدى مەكەننىڭ 70 مىڭنان استام تۇرعىنى ەۆاكۋاتسيالانعان. مامىردىڭ 2-سىنە قاراعان ءتۇنى سۋ قازاقستانعا ءوتىپ، ماقتارال اۋدانىندا جەرگىلىكتى كولەمدە تج جاريالانعان ەدى.

"The Qazaq Times"