قازىرگى ۋاقىتتا شەتەلدە ساياحاتتاپ جۇرگەن 5 مىڭعا جۋىق قازاقستاندىق بار. كوروناۆيرۋس دەرتىنىڭ ءورشۋى سەبەپتى ولار ەلگە چارتەرلىك رەيس ارقىلى قايتارىلادى. بۇل تۋرالى پرەمەر-ءمينيستردىڭ ورىنباسارى ەرالى توعجانوۆ ايتتى.

ونلاين رەجيمدەگى بريفينگ كەزىندە رەسمي وكىل: «ءبىز شەتەلدەگى 5 مىڭعا تارتا وتانداسىمىزدى ەلگە قايتارۋىمىز كەرەك. بۇكىل الەمدە رەيستەر ايتارلىقتاي ازايىپ كەتكەندىكتەن ولاردى چارتەرلىك رەيسپەن ەلگە قايتارۋ جۇمىسى جۇرگىزىلىپ جاتىر. دەگەنمەن، بۇل ءىس مەملەكەت ەسەبىنەن جۇرگىزىلمەيتىنىن ەسكە سالامىن. ونى تۋريستىك قور ءوز مىندەتىنە الادى»، – دەدى.

مالىمەتتەر بويىنشا، 23 ناۋرىزعا دەيىن 4 مىڭعا تارتا وتانداستارىمىزدى قايتارۋ ءۇشىن 18 رەيس ورىندالماق.

19 ناۋرىزدان باستاپ الماتى مەن استانادا كارانتين رەجيمى ورناتىلدى. قالاعا كىرىپ-شىعۋعا شەكتەۋ قويىلدى. 22 ناۋرىزدان باستاپ قالاعا قاتىنايتىن جولاۋشىلار پويىزى مەن اۆتوبۋستار، ىشكى رەيستەر توقتايدى. قازاقستاندا قازىر 860 ادام اۋرۋحانا، 2611 ادام ءۇي كارانتينىندە (بارلىعى 3471 ادام). ال ۆيرۋس جۇقتىرعاندار سانى – 49.

"The Qazaq Times"