يتاليانىڭ سولتۇستىگىندەگى چينتو-ەۋگانەو اتتى شاعىن قالادا ارنايى ەكسپەريمەنت كومەگىمەن كوروناۆيرۋستى جۇقتىرۋدىڭ جاڭا جاعدايلارى توقتاعان. ۆەنەتسيا ماڭىندا ورنالاسقان كوممۋنا COVID-19 ۆيرۋسىنىڭ ەپيتسەنترىنە اينالعان ساتتە بارلىق تۇرعىندارعا مەديتسينالىق تەستىلەۋ جۇرگىزىلگەن. يتاليا بيلىگىنىڭ بۇل شەشىمى قازىر وزگە مەملەكەتتەرگە ۇلگى بولىپ وتىر.

22 اقپاندا يتاليا بويىنشا كوروناۆيرۋستان كوز جۇمعان العاشقى ادام چينتو-ەۋگانەودا تىركەلگەن. وقيعادان كەيىن قالالىق دەنساۋلىق ساقتاۋ ورگاندارى ينفەكتسيانىڭ تارالۋىن تولىق توقتاتۋ ماقساتىندا ءبىرشاما ەكسپەريمەنت جۇرگىزدى.

Imperial College London ۋنيۆەرسيتەتىنىڭ پروفەسسورى اندرەا كرەسانتي كىشىگىرىم قالادا ۆيرۋسقا جۇقتىرعاندار سانىنىڭ كۇرت ازايۋى جايىندا جەرگىلىكتى باسىلىمدارعا سۇحبات بەرگەن. ونىڭ ايتۋىنشا، قالانىڭ بارلىق 3,4 مىڭ تۇرعىنى ۆيرۋس سيمپتومدارىنىڭ بولۋ-بولماۋىنا قاراماستان كوروناۆيرۋسقا تەست تاپسىرادى. دياگنوزى راستالعاندار مەن ولار بايلانىستا بولعان ادامداردىڭ بارلىعى قاتاڭ كارانتينگە جىبەرىلىپ، وقشاۋلانعان. 10 كۇن وتكەن سوڭ، وقشۋلانعانداردىڭ بارلىعىن قايتادان مەديۋينالىق سىناقتان وتكىزگەن. ناتيجەسىندە سىرقاتتانعانداردىڭ سانى 90%-عا ازايعان.

قالا مەرى دجۋليانو مارتيني بريتاندىق Financial Times گازەتىنە بەرگەن سۇحباتىندا تۇرعىنداردا ۆيرۋس سيمپتومدارىنىڭ جوقتىعىنا قاراماستان، مەديتسينالىق تەست تاپسىرۋ مىندەتتى دەيدى. سەبەبى چينتو-ەۋگانەودا جۇرگىزىلگەن سىناق كەزىندە قارا حالقىنىڭ 3%-نان ۆيرۋس انىقتالعان. ۆيرۋس تابىلعانداردىڭ قاتارىندا اۋرۋ سيمپتومدارى جوق ادامدار دا بولعان.

وسى اپتادا دۇنيەجۇزىلىك دەنساۋلىق ساقتاۋ ۇيىمى وڭتۇستىك كورەيا، يتاليا مەن تايۋان ۇلگىلەرىنە سۇيەنە وتىرىپ، حالىقتى كوروناۆيرۋسقا بەلسەندى تۇردە تەستىلەۋگە شاقىردى.

يتاليا اۋماعىندا كوروناۆيرۋستان ءبىر تاۋلىكتە 475 ادام كوز جۇمعان. بۇل – ەپيدەميا باستالعالى رەكوردتىق ءولىم كورسەتكىشى. قازىرگى ۋاقىتتا يتاليادا كوروناۆيرۋستى 35 713 ادام جۇقتىرىپ، قايتىس بولعاندار سانى مىڭعا جۋىقتادى. ءولىم كورسەتكىشى ەلدىڭ سولتۇستىگىندە الدەقايدا جوعارى.

الەم جانە كوروناۆيرۋس

Bing.com دەرەگىنشە، الەمدە 218 مىڭنان استام ادام ۆيرۋس جۇقتىرىپ، 8,5 مىڭعا جۋىق ادام قايتىس بولعان. ۆيرۋس دەرەگى انىقتالعان ەلدەر بىرقاتار شارالاردى قولعا الدى.

  • اقش-تا پرەزيدەنت ترامپ قورعانىس مينيسترلىگىنە ميلليون رەسپيراتورلىق ماسكا، وكپەنىڭ جاساندى ۆەنتيلياتسياسى اپپاراتىنان 2 مىڭ جانە باسقا دا جابدىقتاردى ءوندىرۋ تۋرالى بۇيرىق بەردى. قازىرگى ۋاقىتتا امەريكالىق عالىمدار كورونۆيرۋسقا قارسى ەكپەنى سىناقتان وتكىزىپ جاتىر. ەگەر ەكپە ءساتتى ناتيجە كورسەتسە، الەمنىڭ باسقا مەملەكەتتەرىنە 12 اي ىشىندە جەتكىزىلۋى مۇمكىن.
  • اقش پەن كانادا اراسىنداعى شەكارا جابىلادى. مۇنى ەكى ەلدىڭ كوشباسشىلارى راستادى.
  • ۇلىبريتانيادا سوڭعى تاۋلىكتە 700 ادامنان ۆيرۋس تابىلدى. جۇقتىرعانداردىڭ جالپى سانى 2600-گە دەيىن ءوسىپ، 104 ادام قايتىس بولعان. 20 ناۋرىزدا بارلىق مەكتەپتەر جابىلادى. ەمتيحاندار باسقا ۋاقىتقا اۋىستىرىلادى.
  • رەسەيدە ءبىر تاۋلىك ىشىندە تاعى 33 اۋرۋ تىركەلدى. ۆيرۋس جۇقتىرعانداردىڭ جالپى سانى 147-گە جەتكەن. ەلدە كوروناۆيرۋستىق ينفەكتسيانىڭ تارالۋىمەن كۇرەس جونىندەگى جەدەل شتاب جۇمىس ىستەيدى، بىراق ايماق تۇتاستاي كارانتينگە جابىلعان جوق.
  • يسپانيادا بارلىق قوناق ۇيلەر جابىلدى. ال يتاليا بيلىگى 9 ناۋرىزدا بۇكىل ەل بويىنشا كارانتين ەنگىزدى. ەل بيلىگى ۆيرۋستىڭ تارالۋىمەن كۇرەس جۇرگىزۋ ماقساتىندا ادامداردى ۇيدەن شىقپاۋعا مىندەتتەدى.
  • وسى اپتادا ەۋروپالىق وداق پەن شەنگەن ايماعى ەلدەرى شەكارالارىن 30 كۇنگە جاپتى. فرانتسيا بيلىگى حالىقتىڭ قوزعالىستار مەن جينالىستار وتكىزۋ ەركىندىگىن شەكتەيتىن توتەنشە سانيتارلىق جاعداي ەنگىزدى. سوڭعى رەت مۇنداي رەجيم 2015 جىلى 13 قاراشادا ءىرى تەراكت وقيعاسىنان كەيىن ەنگىزىلگەن.
  • افريكادا ساحاراداعى بۋركينا-فاسودا ۆيرۋستان كوز جۇمعان العاشقى ادام تىركەلدى. ۇلتتىق اسسامبلەياسىنىڭ ۆيتسە-پرەزيدەنتى، 62 جاسار روۋز ماري كومپاورە دەرتتەن قايتىس بولعان.
  • مامىرعا جوسپارلانعان «ەۆروۆيدەنيە» حالىقارالىق مۋزىكالىق بايقاۋى مەن ۇلىبريتانياداعى «گلاستونبەري» مۋزىكالىق فەستيۆالى وتكىزىلمەيتىن بولدى.

"The Qazaq Times"