اقش-تىڭ مەملەكەتتىك حاتشىسى مايك پومپەو قىتاي بيلىگى بۇعان دەيىن ۋحان قالاسىنان COVID-19 كوروناۆيرۋسىن جۇقتىرعان جۇزدەگەن مىڭ ادامنىڭ شەكارا اسۋىنا ماقساتتى تۇردە مۇمكىندىك بەردى دەپ سانايدى. اقش-تىڭ سىرتقى ساياسات ۆەدومستۆوسىنىڭ باسشىسى بۇل مالىمدەمەنى Fox News حابارىندا ايتتى.

پومپەو قىتاي بيلىگىنىڭ بۇل ارەكەتى «تەك قىتايلىقتارعا ەمەس، بۇكىل الەم ءۇشىن قاۋىپ ءتوندىرىپ، دەرتكە شالدىققاندار سانىنىڭ ارتۋىنا سەپ بولدى» دەيدى. مەملەكەتتىك حاتشىنىڭ پايىمداۋىنشا، قىتاي بيلىگى كوروناۆيرۋس پاندەمياسىنان تونەتىن قاۋىپ تۋرالى ءبارىن بىلگەن، «بىراق جۇزدەگەن مىڭ ادامنىڭ شەتەلگە كەتۋىنە، قازىر وراسان زور زارداپ شەگىپ وتىرعان يتاليا سىندى مەملەكەتتەرگە بارۋىنا مۇمكىندىك بەردى».

«قىتاي بيلىگى ۆيرۋسقا كەدەرگى كەلتىرۋدىڭ ورنىنا، اقپاراتتىڭ الەمگە تارالۋىنا جول بەرمەۋگە تىرىستى»، – دەيدى پومپەو.

قازىرگى ۋاقىتتا رەسمي بەيجىڭ ۇسىنىپ وتىرعان اقپاراتتارعا سەنۋگە بولا ما دەگەن ساۋالعا پومپەو: «بۇل ەڭ ماڭىزدى ماسەلەلەردىڭ ءبىرى. ۆيرۋس انىقتالدى دەگەن ۋاقىتتا ءبىز دەرەۋ ەڭ ۇزدىك دارىگەر، ساراپشى ماماندارىمىزدى جىبەرمەك بولدىق. وسى ماسەلەنى دۇنيەجۇزىلىك دەنساۋلىق ساقتاۋ ۇيىمىمەن دە تالقىلادى. الايدا قىتاي تاراپى رۇقسات بەرگەن جوق. قىتاي بيلىگى جەتكىلىكتى دارەجەدە ترانسپارەنتتى بولعان جوق. اقپارات تاراتۋدا دا ءدال سولاي. ەگەر ءبىز بۇل قاتەلىكتى تۇزەتپەسەك، ۆيرۋستىڭ تارالۋىنا توسقاۋىل بولماساق، بۇل جاعداي قايتالانۋى مۇمكىن»، – دەدى.

2019 جىلدىڭ سوڭىندا قىتايىڭ حۋبەي پروۆينتسياسىنان تاراعان كوروناۆيرۋس 140-قا جۋىق ەلگە تارالىپ، دۇنيەجۇزىلىك دەنساۋلىق ساقتاۋ ۇيىمى دەرتتى پاندەميا دەپ تانىدى. سوڭعى مالىمەتتەر بويىنشا، الەمدە 218 مىڭنان استام ادام ۆيرۋس جۇقتىرىپ، 8,5 مىڭعا جۋىق ادام قايتىس بولعان.

"The Qazaq Times"