دەنساۋلىق ساقتاۋ مينيسترلىگى قازاقستاندا كوروناۆيرۋس شالدىققان ازاماتتاردىڭ باسىم بولىگى شەتەلدەن كەلگەندىگىن ايتادى. فوتو: اشىق دەرەككوز

العاش ناۋقاس تىركەلگەن 13 ناۋرىزدان باستاپ دەنساۋلىق ساقتاۋ مينيسترلىگى تاراتقان اشىق كوزدەردەگى اقپاراتتار بويىنشا قاتەرلى دەرت جۇقتىرعاندار جونىندەگى دەرەك تولىققاندى ەمەس. 

شتاتتىق رەجيمدە جۇمىسقا كىرىسكەن ۆەدومستۆونىڭ الەۋمەتتىك جەلىلەردەگى اككاۋنتتارىندا دەنساۋلىق ساقتاۋ ءمينيسترى ەلجان ءبىرتانوۆ پەن مينيسترلىكتىڭ رەسمي وكىلى دياس ازمەتشارىپ كەزەكتەسىپ جاڭا دەرەكتەردى ءبولىسىپ وتىر. دەگەنمەن، جاۋاپتى شەنەۋنىكتەر بىرنەشە پاتسيەنت تۋرالى حابارلاعاندا كەلۋ باعىتى، مەرزىمى تۋرالى ناقتى اقپارات بەرسە، كەشەگى 19 ناۋقاس تىركەلگەنى تۋرالى مالىمدەمەدە ساناق تۇرىندە قىسقا قايىردى. ازىرگە ولاردىڭ قايدان قاشان نەندەي جاعدايدا ورالعانى ايتىلمادى. كەيبىر ناۋقاستىڭ جاسى، الەۋمەتتىك ستاتۋسى بەلگىسىز.

دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ مالىمدەۋىنشە، ەلدە كەشە كەشكىسىن، 18 ناۋرىز ساعات 09:00-دە كوروناۆيرۋس تابىلعان ناۋقاستار سانى 35-كە جەتتى. ونىڭ 17-ءسى الماتىدا، 18-ءى استانادا تىركەلدى.

№ ناۋقاس تۋرالى جاسى / تۋعان جىلى راستالعان كۇنى قازاقستانعا كەلگەن كۇنى رەيس / تىركەلگەن قالا
1 ەر  ادام 46 (1974) 13 ناۋرىز 9 ناۋرىز بەرلين-الماتى
2 ايەل 36 (1984) 13 ناۋرىز 9 ناۋرىز بەرلين-الماتى
3 ايەل * 13 ناۋرىز 12 ناۋرىز ميلان-ماسكەۋ-استانا
4 ايەل * 13 ناۋرىز 9 ناۋرىز بەرلين-الماتى
5 ەر ادام 62 (1958) 14 ناۋرىز 10 ناۋرىز ماسكەۋ-الماتى
6 ايەل * 14 ناۋرىز 10 ناۋرىز ۆارشاۆا-استانا
7 ەر ادام 25 (1995) 15 ناۋرىز 14 ناۋرىز سەۋل-الماتى
8 ايەل 61 (1959) 15 ناۋرىز 10 ناۋرىز ماسكەۋ-الماتى
9 قىز بالا 12 (2008) 15 ناۋرىز * بەرلين-الماتى
10 ايەل 34 (1986) 16 ناۋرىز 15 ناۋرىز ستامبۇل-الماتى
11 نارەستە قىز بالا 2 (2018) 17 ناۋرىز 13 ناۋرىز بەرلين-مينسك-الماتى
12 ەر ادام 54 (1966) 17 ناۋرىز 10 ناۋرىز ماسكەۋ-الماتى
13 ەر ادام 64 (1956) 17 ناۋرىز 10 ناۋرىز ماسكەۋ-الماتى
14 19 ادام * 17 ناۋرىز * 4-ەۋى الماتى

15-ءى استانا
15 ايەل 37 (1983) 17 ناۋرىز 17 ناۋرىز استانا تۇرعىنى
16 ستۋدەنت قىز 22 (1998) 18 ناۋرىز 15 ناۋرىز ستامبۇل-الماتى
17 ايەل 46 (1974) 18 ناۋرىز 10 ناۋرىز ماسكەۋ-الماتى

ساراپشىلار تەك ەۋروپا ەلدەرى، تۇركيا، وڭتۇستىك كورەيادان ورالعان ناۋقاستاردان عانا كوروناۆيرۋس تابىلعانىنا كۇمانمەن قارايدى. ولاردىڭ سوزىنشە، 6 قاڭتاردان بەرى قىتاي شەكاراسىنان قازاقستانعا وتكەن ونمىڭداعان ازاماتتىڭ ءبارى «ءدىن امان بولۋى كۇدىكتى جايت». ال ۇقك شەكارا قىزمەتىنىڭ اي باسىندا جاريالاعان دەرەگىنە سايكەس، بيىل 1-29 اقپان ارالىعىندا قازاقستانعا مەملەكەتتىك شەكارانىڭ وتكىزۋ پۋنكتتەرى ارقىلى سىرتتان 1 539 744 ادام كەلگەن.

بۇگىن شەتەلدە تۋريست رەتىندە جۇرگەن 235 قازاقستاندىق ورالعانى حابارلاندى. سونداي-اق الماتى قالاسىنىڭ پوليتسيا دەپارتامەنتى «ينفەكتسيا جۇقتىرعان ازاماتتارمەن بايلانىستا بولعان 798 ادام انىقتالىپ، مەديتسينا مەكەمەسىنە جەتكىزىلگەنىن» مالىمدەدى. سوڭعى دەرەكتەرگە قاراعاندا، ءالى ەلگە قايتىپ ۇلگەرمەگەن 4 مىڭداي قازاقستاندىق الەمنىڭ باسقا مەملەكەتتەرىندە ءجۇر.

قازاقستاندا COVID-19 كوروناۆيرۋس پاندەمياسى دياگنوزىمەن تىركەلگەن ادامداردىڭ سانى. ينفوگرافيكا: QT

"The Qazaq Times"