كورنەكى سۋرەت. فوتو: اشىق دەرەككوز

پرەزيدەنتتىڭ ءباسپاسوز حاتشىسى بەرىك ءۋالي ەلىمىزدە ناۋرىز مەيرامى مەن جەڭىستىڭ 75 جىلدىعىنا ارنالعان اسكەري پارادتى كەيىنگە شەگەرگەنىن مالىمدەدى.

ول ءوزىنىڭ Facebook پاراعىندا پرەزيدەنت توقاەۆ ەلىمىزدە كورونوۆيرۋستىڭ الدىن الۋ ماقساتىندا ناۋرىز مەيرامىن، جەڭىستىڭ 75 جىلدىعىن، سونىمەن قاتار جوسپارلانعان باسقا دا حالىقارالىق فورۋمداردىڭ ۋاقىتىن وزگەرتۋدى  تاپسىرعانىن جازدى.

«مەملەكەت باسشىسى ەلىمىزدە كوروناۆيرۋستىڭ تارالۋىنا جول بەرمەۋگە بايلانىستى ناۋرىز مەرەكەسىنە ارنالعان قوعامدىق شارالاردى جانە ەلوردادا جەڭىستىڭ 75 جىلدىعىنا ارنالعان اسكەري پارادتى وتكىزبەۋ تۋرالى شەشىم قابىلدادى. سونىمەن قاتار بۇعان دەيىن جوسپارلانعان حالىقارالىق فورۋمداردى كەيىنگە شەگەرۋدى تاپسىردى»، – دەپ جازدى بەرىك ءۋالي.

مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا،  توقاەۆتىڭ قاتىسۋىمەن وتەتىن «شىمكەنت – تمد ەلدەرىنىڭ مادەني استاناسى» سالتاناتتى جيىنى كەيىنگە قالدىرىلعان.

"The Qazaq Times"