تۇركيادا العاشقى كوروناۆيرۋس دەرەگى تىركەلدى

تۇركيادا كوروناۆيرۋستىڭ جاڭا ءتۇرىن (COVID-19) جۇقتىرعان العاشقى جاعداي تىركەلدى، – دەپ حابارلايدى «انادولى» اگەنتتىگى.

ەلدىڭ دەنساۋلىق ساقتاۋ ءمينيسترى فاحرەتتين كودجا: «بۇگىن كەشكە كوروناۆيرۋس جۇقتىردى دەگەن كۇدىك بويىنشا ەلىمىزدىڭ ازاماتىنا تەست جاسالدى. تەست بويىنشا ونىڭ كوروناۆيرۋس جۇقتىرعاندىعى انىقتالدى»، – دەدى.

ۆيرۋس جۇقتىرعان ەر ادام جاقىندا عانا ەۋروپادان ساياحاتتان ورالعان. ونىڭ دەنساۋلىق جاعدايى قاناعاتتانارلىق دەڭگەيدە دەپ باعالانعان. قازىرگى ۋاقىتتا پاتسيەنت كارانتيندە. سونىمەن قاتار، ناۋقاستىڭ وتباسى مۇشەلەرى، سونداي-اق ونىمەن بايلانىستا بولعان ادامدار باقىلاۋعا الىندى.

ايتا كەتەيىك، قىتايدىڭ حۋبەي پروۆينتسياسىنان شىققان ۆيرۋستى جۇقتىرعاندار سانى الەم بويىنشا 100 مىڭنان استى. قاۋىپتىڭ جوعارى دەڭگەيىنە ەنگىزىلگەن ەلدەر قاتارىندا قىتاي، وڭتۇستىك كورەيا، يران جانە يتاليا بار.

"The Qazaq Times"