قازاقستان پرەزيدەنتى قاسىم-جومارت توقاەۆ. 27 جەلتوقسان 2019 جىل. ەلوردا. فوتو: اقوردا

مەملەكەت باسشىسى قاسىم-جومارت توقاەۆ الماتى ماڭىنداعى ۇشاق اپاتىنا بايلانىستى شۇعىل كەڭەيتىلگەن  كەڭەس وتكىزدى.

اقوردا رەزيدەنتسياسىندا پرەمەر-مينيستر، پرەزيدەنت اكىمشىلىگى باسشىلىعى، قاۋىپسىزدىك كەڭەسى حاتشىسىنىڭ، باس پروكۋرور، ۇقك توراعاسى، ىشكى ىستەر جانە اقپارات مينيسترلەرى، دەنساۋلىق ساقتاۋ ءمينيسترىنىڭ قاتىسۋىمەن الماتى اۋەجايى ماڭىنداعى ۇشاق اپاتى جونىندەشۇعىل كەڭەس ءوتتى.

اقوردانىڭ حابارلاۋىنشا, توقاەۆ قازاقستان حالقىنىڭ جانە جەكە باسىنىڭ اتىنان قازا بولعان ازاماتتاردىڭ تۋىستارى مەن جاقىندارىنا كوڭىل ايتتى. جيىندا قايتىس بولعانداردى ءبىر مينۋت ۇنسىزدىكپەن ەسكە الدى.

اقورداداعى كەزەكتەن تىس كەڭەس. 27 جەلتوقسان 2019 جىل. ەلوردا. فوتو: اقوردا

پرەزيدەنت ۇكىمەت باسشىسى اسقار ءماميننىڭ، باس پروكۋرور عيزات نۇرداۋلەتوۆتىڭ، ىشكى ىستەر ءمينيسترى ەرلان تۇرعىمباەۆتىڭ جانە دەنساۋلىق ساقتاۋ ءمينيسترى ەلجان ءبىرتانوۆتىڭ ەسەپتەرىن تىڭدادى.

ول ۇكىمەتكە الماتى قالاسى مەن الماتى وبلىسى اكىمدىكتەرىمەن بىرلەسىپ قازا بولعان ازاماتتاردىڭ وتباسىنا 4 ميلليون تەڭگە كولەمىندە ماتەريالدىق كومەك كورسەتۋدى تاپسىردى. مارقۇمداردىڭ جاقىندارىنا پسيحولوگيالىق جانە مەديتسينالىق قولداۋ كورسەتىلەدى. سونىمەن قاتار زارداپ شەككەندەردىڭ بارلىعىنا قاجەتتى كومەك بەرىلمەك.

28 جەلتوقساندى جالپىۇلتتىق ازا تۇتۋ كۇنى دەپ جاريالاعان پرەزيدەنت ەلىمىزدەگى مەملەكەتتىك تۋدى تۇسىرۋگە جانە بارلىق ويىن-ساۋىق شارالارىن توقتاتۋعا تاپسىرما بەردى.

مەملەكەت باسشىسى كەڭەس بارىسىندا:

- ۇشاق اپاتىن تۋدىرعان سەبەپتەردى ساپالى ءارى وبەكتيۆتى تۇردە تەكسەرۋگە;
- قازاقستاننىڭ اۆياتسيالىق اكىمشىلىگى اق بىلىكتى ماماندارمەن قامتۋ جۇمىستارىن تولىق اياقتاۋ شارالارىن قابىلداۋعا;
- قاۋىپسىزدىك تالاپتارىنا سايكەستەندىرۋ ءۇشىن بارلىق اۋە كومپانيالاردىڭ جۇمىسى مەن اۆياتسيالىق ينفراقۇرىلىم نىسانىن تەكسەرۋگە تاپسىرما بەردى.

باس پروكۋراتۋرا مەن ىشكى ىستەر مينيسترلىگىنە قوزعالعان قىلمىستىق ءىس اياسىندا ۇشاق اپاتىنا سوقتىرعان سەبەپتەردى انىقتاۋ، كىنالىلەردى زاڭعا سايكەس جاۋاپكەرشىلىككە تارتۋ، سونداي-اق، الماتى اۋەجايىنىڭ اۋماعىنا جاقىن جەردەگى جەكە قۇرىلىستاردىڭ زاڭدىلىعىن زەرتتەۋ جونىندە تاپسىرما جۇكتەدى.

"The Qazaq Times"