يران پارلامەنتى ءماجىلىسى كوروناۆيرۋس دەرتىنىڭ ۋشىعۋىنا بايلانىستى بىرقاتار جۇمىستى كەيىنگە شەگەردى. بۇل تۋرالى پارلامەنت پرەزيديۋمىنىڭ مۇشەسى موحامماد الي ۆاكيلي حابارلادى.

«پرەزيديۋم كوروناۆيرۋستىڭ تارالۋ قاۋپىنە بايلانىستى كەلەسى اپتادا قوعامدىق تىڭداۋ وتكىزبەۋ تۋرالى شەشىم قابىلدادى»، — دەيدى. دەپۋتاتتىڭ ايتۋىنشا، بيۋدجەت جوباسىن قاراۋ دا كەلەسى اپتاعا قالدىرىلادى.

يران دەنساۋلىق ساقتاۋ مينيسترلىگى 19 اقپاندا ەلدە جاڭا كوروناۆيرۋس جۇقتىرۋدىڭ العاشقى جاعدايلارى تۋرالى حابارلادى. رەسمي اقپاراتقا سايكەس، يراندا ۆيرۋس جۇقتىرعاندار سانى 388-گە جەتىپ، كەم دەگەندە 34 ادام قايتىس بولعان.

ۆيرۋستىڭ كەڭ تارالۋىنا بايلانىستى تۇركيا، تاجىكستان يرانمەن اراداعى شەكارانى جاۋىپ، اۋە قاتىناسىن توقتاتتى. بۇل ماسەلە جونىندە تۇركيا دەنساۋلىق ساقتاۋ ءمينيسترى فاحرەتتين كوجا: «يرانداعى كوروناۆيرۋستى جۇقتىرعاندار سانىنىڭ ارتۋىنا بايلانىستى كورشىلەس ەلمەن شەكارامىزدى جابۋ جونىندە شەشىم قابىلدادىق. جاعدايعا قاتىستى سىرتقى ىستەر، ۇلتتىق قورعانىس، ىشكى ىستەر، كولىك، ساۋدا جانە باسقا دا ءتيىستى مينيسترلىكتەرمەن قاجەتتى شارالاردى قابىلدادىق. سونداي-اق بۇعان دەيىن يراننان كەلگەن بارلىق جولاۋشىلاردىڭ مەديتسينالىق ساراپتامالاردان وتكەندىگىن جەتكىزگىم كەلەدى»، – دەدى.

"The Qazaq Times"