رەسەيدەگى قىتاي ازاماتتارى باقىلاۋعا الىنعان. فوتو: VOA

قىتايدىڭ رەسەيدەگى ەلشىلىگى ماسكەۋ اكىمشىلىگىنىڭ كوروناۆيرۋسقا قارسى كۇرەسۋ ءۇشىن قىتاي ازاماتتارىنا باعىتتالعان ساقتىق شارالارى ديسكريميناتسيالىق سيپاتقا يە دەپ باعالادى. سونداي-اق، رەسەيدەگى قىتاي ازاماتتارىنا باعىتتالعان مۇنداي ارەكەتتەردى توقتاتۋىن تالاپ ەتتى. قىتاي ەلشىلىگىنىڭ ايتۋىنشا، ماسكەۋ ۇكىمەتىنىڭ بۇل ارەكەتى ەكى ەلدىڭ قارىم-قاتىناسىنا نۇقسان كەلتىرۋى مۇمكىن.

قىتاي ەلشىلىگىنىڭ بۇنداي شاعىم حاتىن رەسەيلىك باسىلىم بۇدان ەكى كۇن بۇرىن جاريا ەتكەن بولاتىن. بۇعان دەيىن ماسكەۋ اكىمشىلىگى قوعامدىق كولىكتە قاتىنايتىن جولاۋشىلاردان قىتايلىق ازاماتتاردى كورگەن جاعدايدا پوليتسياعا حابار بەرۋىن تالاپ ەتكەن. بۇعان قوسا رەسەي ورتالىق قالاسىندا ۆيرۋستىڭ ىقتيمال تاسىمالداۋشىلارىن تابۋ ءۇشىن قىتايلىق ازاماتتاردى، اسحانالار مەن قوناقۇيلەردى ارالاپ تەكسەرۋ جۇرگىزگەن. سونداي-اق، قىتاي ازاماتتارىن تەز ارادا انىقتاۋ ءۇشىن بەت-ءجۇزدى اۆتوماتتى تانۋ جۇيەسىن ىسكە قوسقان.

رەسەي مەن قىتاي تىعىز ساياسي-ەكونوميكالىق جانە اسكەري قارىم-قاتىناستاعى ەلدەر. رەسەيدەگى قىتايلىق ەكى ازاماتتان كوروناۆيرۋس انىقتالىپ وقشاۋلانعاننان كەيىن، ماسكەۋ بيلىگى ەپيدەمياعا قارسى قاتاڭ شارالاردى قابىلدادى. سول شارالاردىڭ قاتارىندا قىتايمەن شەكارانى جابۋ جانە رەسمي، اسكەري، گۋمانيتارلىق قاتىناستاردان تىس بارلىق ۆيزانى شەكتەگەن بولتىن.

رەسەيدەگى قىتاي ەلشىلىگى شاعىم حاتىندا، قوعامدىق كولىكتەردە قىتاي ازاماتتارىن اڭدۋ شاراسى قىتايمەن كىربەڭ كۇيدە تۇرعان اقش پەن وزگە دە باتىس ەلدەرىندە دە بولمايتىنىن العا تارتقان. ەكى ەلدىڭ سىرتقى ىستەر مينيسترلىگى بۇل ماسەلەگە بايلانىستى ارنايى تۇسىنىك بەرگەن جوق. بىراق، كرەمل تارابى قىتاي ەلشىلىگىنىڭ بۇل شاعىمى تۋرالى بىلمەيتىنىن، ەكى ەلدىڭ قارىم-قاتىناسىن بۇلدىرەتىن قانداي دا ءبىر ارەكەتتەرگە جول بەرمەيتىنىن ايتقان.

“The Qazaq Times”