اباقتىدا كوز جۇمعان ازاماتتىق بەلسەندى دۋلات اعادىلدى جەرلەۋ كەزىنەن. 27 اقپان 2020 جىل. تالاپكەر اۋىلى، اقمولا وبلىسى. فوتو: الەۋمەتتىك جەلىدەن

جۋىردا عانا 43 جاسقا تولعان، ء"ولىمىنىڭ ساياسي استارى بار" دەلىنەتىن استانالىق ازاماتتىق بەلسەندى دۋلات اعادىلدىڭ جانازاسىنا مىڭنان استام ادام جينالدى.

اقمولا وبلىسىنداعى تالاپكەر اۋىلىنىڭ مەشىتىندە وتكەن جانازا كەزىندە بىرقاتار بەلسەندىلەر ارنايىلاپ ءسوز سويلەدى. بەلگىلى جۋرناليست رىسبەك سارسەنبايۇلى "37 جىلعى قۋدالاۋدىڭ قايتا جاندانعانىن" ەسكە الىپ، "دۋلات اعادىلدىڭ ءولىمى سۇراۋسىز قالمايدى" دەپ ەسكەرتتى.

مارقۇم اعادىلدىڭ تۋ وراعان تابىتىن ەلدىڭ ءار وڭىرىنەن جينالعان ازاماتتار ءبىر شاقىرىم جەردەگى زيراتقا جاياۋ كوتەرىپ باردى. اشىنعان جۇرت "ادىلدىك", "جۇيە قياناتى", "بوستاندىق", "شال، كەت" دەپ ايقايلاپ ۇرانداستى.

مارقۇمدى ەسكە الۋعا ارنالعان قارالى جيىن جاۋىن سىركىرەپ تۇرعان الماتىدا دا ءوتىپ جاتىر.

سوڭعى بەينەۇندەۋىنىڭ بىرىندە ء"وزىنىڭ ىشىمدىك ىشپەيتىنىن، تەمەكى تارتپايتىنىن، بيلىك كەز كەلگەن ادىسپەن ءولتىرۋى مۇمكىن ەكەنىن" ەسكەرتكەن دۋلات اعادىلدىڭ بەلسەندىلەر ونىڭ بۇرىن سوڭدى «جۇرەك تالماسىمەن» اۋىرماعانىن ايتادى.

بەلسەندىنىڭ قازا بولعانى حابار تاراعان كۇننەن بەرى استانادا، الماتى جانە شىمكەنت قالاسىندا جۇرت نارازىلىققا شىققان. العاشقى كۇنى-اق ەلوردادا ەلۋگە جۋىق بەلسەندىنى پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ باستاعان جاساق ءتورت اۆتوبۋسقا  كۇشپەن تيەپ الىپ كەتكەن ەدى. ال كەشكىلىك الماتىداعى تسەليننىي كينوتەاترىنىڭ ماڭىنا جينالعان 50-60 شاقتى بەلسەندى پرەزيدەنت قاسىم-جومارت توقاەۆ، قالا پروكۋرورى باۋىرجان جۇرەكباەۆ مەن ىشكى ىستەر ءمينيسترى ەرلان تۇرعىمباەۆتىڭ اتىنا تالاپ ارىز جازىپ, باق ارقىلى رەسمي تۇردە جاۋاپ بەرۋىن سۇراعان بولاتىن.

24 اقپان كەشكىسىن ساعات 20:48-دە فورماسىز كەلگەن ءبىر توپ پوليتسەي "سوتقا ءتىل تيگىزدى" دەگەن ايىپپەن  دۋلات اعادىلدى «ەشقايدا كەتپەۋ» تۋرالى شاراسى رەتىندە ۇيىنەن الىپ كەتكەن ەدى. بىراق بار بولعانى 30 شاقىرىمعا جەتەر-جەتپەس قاشىقتىقتاعى يزولياتورعا تۇنگى ساعات 00:00 شاماسىندا جەتكىزىپ، اباقتىعا جاپقان.

قۇزىرلى ورگاندار 25 اقپان كەشكىسىن وتكەن بريفينگتە ازاماتتىق قۇقىق پەن دەموكراتيالىق قۇندىلىقتاردىڭ ورىندالۋىن تالاپ ەتە ءجۇرىپ بىرنەشە رەت سوتتالعان بەلسەندى اعادىلوۆ ءولىمىنىڭ سەبەبىن «جۇرەك قان تامىرلارىنىڭ جەتىسپەۋشىلىگى» دەپ اتادى.

"The Qazaq Times"