وسىدان ءۇش اي بۇرىن استاناداعى تەرگەۋ يزولياتورىندا كوز جۇمعان ازاماتتىق بەلسەندى دۋلات اعادىلدىڭ ولىمىنە قاتىستى ءىس توقتاتىلدى. قوعامدىق رەزونانس تۋدىرىپ، كوپتى اشىندىرعان "جۇمباعى كوپ" قازا كۇتپەگەن جەردەن نەگە توقتادى؟ 

استانا پروكۋراتۋراسى ىستە قىلمىستىق قۇقىق بۇزۋشىلىق وقيعاسى انىقتالماعانىن حابارلادى.

"وعان ەشقايدا شىقپاۋ تۋرالى بۇلتارتپاۋ شاراسىن بۇزعانى جانە تەرگەۋ ورگانىنان جالتارعانى ءۇشىن ىزدەۋ جاريالانعان. وسى سەبەپتەرگە بايلانىستى اعادىلگە قاتىستى بۇلتارتپاۋ شاراسى قاماۋعا اۋىستىرىلدى. وسىلايشا، سوت ۇكىمىنىڭ مىندەتتى تۇردە ورىندالۋى تۋرالى زاڭ تالابى بويىنشا پوليتسيا ونى ۇستاپ، قاماۋعا الدى. اعادىلدى ۇستاۋ جانە ونى قاماۋعا الۋ زاڭ اياسىندا جۇزەگە اسىرىلدى. ءولىمنىڭ سەبەپتەرى مەن ءمان-جايلارىن تاجىريبەلى ماماندار مەن ارنايى كارديولوگتار كوميسسياسى مۇقيات زەرتتەدى. ولاردىڭ اراسىندا مارقۇمنىڭ جاقىن تۋىستارىنىڭ ءوتىنىشى بويىنشا تارتىلعان ساراپشىلار دا بولدى", – دەلىنگەن حابارلامادا.

پروكۋراتۋرانىڭ مالىمدەۋىنشە، ساراپشىلار اعادىلدىڭ دەنەسىندە دەنە جاراقاتتارىن تاپپاعان.

"اعادىلدىڭ ولىمىنە اسقىنعان ميوكارد ينفاركتى دياگنوزى سەبەپ بولدى. اۋرۋىنىڭ سالدارىنان قان ۇيىعىشتىعى بۇزىلىپ، سول جاق جۇرەك قارىنشاسىندا قان جەتكىلىكسىزدىگى بايقالعان. سونداي-اق ساراپشىلار اعادىلدىڭ دەنەسىنەن جاراقات بەلگىلەرىن تاپپاعان. وسىعان وراي، اعىمداعى جىلدىڭ 25 مامىرىندا اعادىلدىڭ ءولىمى تۋرالى قىلمىستىق ءىس قىلمىستىق قۇقىق بۇزۋشىلىقتىڭ بولماۋىنا بايلانىستى توقتاتىلدى».

بۇعان دەيىن 24 اقپان كەشكىسىن ساعات 20:48-دە فورماسىز كەلگەن ءبىر توپ پوليتسەي "سوتقا ءتىل تيگىزدى" دەگەن ايىپپەن  دۋلات اعادىلدى "ەشقايدا كەتپەۋ" شاراسى رەتىندە ۇيىنەن الىپ كەتكەن ەدى. بىراق نەبارى 30 شاقىرىمعا جەتەر-جەتپەس قاشىقتىقتاعى يزولياتورعا تۇنگى ساعات 00:00 شاماسىندا جەتكىزىلىپ، ەرتەڭىنە، ياعني اقپاننىڭ 25-ءى كۇنى قايتىس بولعان. قۇزىرلى ورگاندار سول كۇنى-اق ازاماتتىق قۇقىق پەن دەموكراتيالىق قۇندىلىقتاردىڭ ورىندالۋىن تالاپ ەتىپ، بىرنەشە رەت سوتتالعان بەلسەندىنىڭ ءولىم سەبەبىن "جۇرەك قان تامىرلارىنىڭ جەتىسپەۋشىلىگى" دەپ اتاعان.

الەۋمەتتىك جەلى قولدانۋشىلارى مەن دۋلات اعادىلدىڭ قازاسىن ازا تۇتقان استانا، الماتى، شىمكەنت، اقتوبە، ورال، تاراز قالالارىنا جينالعان بەلسەندىلەر ونى جۇرەكتەن قايتتى دەگەن «رەسمي نۇسقاعا» سەنبەيتىنىن، بۇرىن-سوڭدى دەنساۋلىعىنا قاتىستى شاعىمى بولماعانىن ايتىپ ەدى. اعادىلدىڭ رۋحىن جوقتاعان، ءىستىڭ ءادىل ءارى اشىق ءجۇرۋىن تالاپ ەتكەن جۇرت بىرنەشە كۇن بويى جينالىپ پرەزيدەنت توقاەۆتىڭ، ىشكى ىستەر ءمينيسترى تۇرعىمباەۆتىڭ اتىنا تالاپ-ارىز جولداعان. الايدا ەشقانداي رەسمي جاۋاپ بەرىلمەدى.

دۋلات اعادىلدىڭ «...سوتتالۋعا دا دايىنمىن. ءولتىرىپ تە، ۇرىپ تا، پىشاقتاپ تا كەتۋى مۇمكىن. مۇنى ىستەسە، ارنايى قىزمەتتەر عانا ىستەيدى. كوشەدەگى بىرەۋ ىستەمەيدى. ويتكەنى مەن كوشەدە بەتالدى جۇرمەيمىن، اراق ىشپەيمىن، تەمەكى شەكپەيمىن، باسقا بىرەۋدىڭ الا ءجىبىن اتتاعان ەمەسپىن، ۇرلىق جاسمايمىن. سوندىقتان مۇنداي اڭگىمەلەر بولىپ جاتسا، سابىرلىق ساقتاپ سەنبەڭىزدەر» دەپ بيلىكتىڭ ارنايى كۇشتىك قۇرىلىمىنان سەزىكتەنەتىن ءارى قاستاندىق جاسالۋى ىقتيمال ەكەنىن ايتقان بەينەۇندەۋى ينتەرنەتتە تاراعان.

ارتىندا 6 بىردەي بالاسى قالعان دۋلات اعادىل – الەۋمەتتىك پروبلەمالار جانە ازاماتتىق قۇقىقتى ساقتاۋ ماسەلەسىن كوتەرىپ جۇرگەن بەلسەندى. بيىل تامىز ايىنان بەرى بىرنەشە اكىمشىلىك جازاعا تارتىلىپ، كەم دەگەندە 60 تاۋلىك قاماۋدا وتىرعان.

"The Qazaq Times"