كورەيا بۇگىننەن باستاپ شەكارا بۇزعان قىتايلىق بالىقشىلار كەمەسىن ايامايتىنىن ەسكەرتتى

قىتاي مەن وڭتۇستىك كورەيا اراسىندا اقپاراتتىق سوعىس پەن ساياسي تەكە-تىرەس ورىن الۋدا. داۋدىڭ ءتۇبى «ساد» زىمىرانعا قارسى جۇيەسىنىڭ كورەيادا ورناتىلاتىنىنان باستالىپ وتىر. قىتاي تارابى كورەياعا ەكونوميكالىق قىسىم ءتۇسىرىپ، قىتاي بازارىنداعى كورەيالىق كاسىپورىنداردى ىعىستىرىپ وتىر. ەكى ەل ارا ءار ءبىر اسكەري ارەكەتتەرىن اڭدىپ، ءار قادامىنان ءمىن تابۋعا تىرىسىپ وتىر. ماقسات – تۇبەكتە ءوز دەگەنىن جۇرگىزۋ نەمەسە مۇددەسىن تاپتاتپاۋ.

جاقىندا قحر، قحرد جانە وڭتۇستىك كورەيا ءۇش ەل شەكارالاساتىن حانجياڭ وزەنى ماڭىندا كورەي قارۋلى قوسىنىنىڭ شارلاۋ جۇرگىزەتىنى تۋرالى حابار تاراتىلىسىمەن قىتاي اقپاراتتىق قۇرالدارى جاپپاي تالقىلاپ اكەتتى. ايتالىق، قىتايلىق «شينلاڭ» اقپاراتتىق سايتىندا بۇل تۋرالى كولەمدى ماقالا دا جاريالاندى.

وڭتۇستىك كورەيا باق-ى كەشە – 31 ناۋرىز كۇنى كورەي قارۋلى كۇشتەرى شىعارعان جاڭا قارارىن جاريا ەتتى. وندا كورەي قورعانىس كۇشتەرى قىتايلىق بالىقشىلار كەمەسىنىڭ حانجياڭ وزەنى سەكىلدى وڭتۇستىك-سولتۇستىك كورەيا اراسىنداعى شەكارالىق ايماقتاردا زاڭسىز بالىق اۋلاۋ ارەكەتىن بولدىرماس ءۇشىن، شارلاۋشى قوسىنداردىڭ سانى مەن قۋاتىن ارتتىراتىندىقتارى ايتىلعان. حابارعا قاراعاندا 30 قارۋلى جاساقتان قۇرام تاپقان شارلاۋشى قوسىن، شەكارالىق ايماقتا زاڭسىز قيمىلدىڭ بارلىق ءتۇرىن قاتاڭ باقىلايدى.

وتكەن جىلى ماۋسىم ايىندا كورەي تەڭىز شارلاۋشى قوسىنى مەن بۇۇ قارۋلى قوسىنى بۇل ايماقتارداعى قىتاي بالىقشىلار كەمەسىنىڭ قيمىلىن قاتاڭ تۇردە قۋدالاۋ جۇرگىزىپ، ءتورت كۇن ىشىندە 2 بالىقشىلار كەمەسىن ۇستاعان بولاتى. كورەيالىق «New Jersey» اقپاراتتىق اگەنتتىگىنىڭ حابارىنا قاراعاندا، حانجياڭ وزەنىنىڭ تومەنگى اعىسى قحدر مەن وڭتۇستىك كورەيا شەكاراسىنا جاقىن كەلەدى. ەكى ەل اراسىنداعى كىلتەڭ دە سەزىمتال اۋماقتارعا جاتادى. وتكەن جىلدان باستاپ سولتۇستىك كورەيانىڭ اۋماققا كىرىپ كەتۋىنەن الاڭداعان وڭتۇستىك كورەيا قورعانىس تاراۋلارى، بۇل اۋماققا قارۋلى قوسىن كىرگىزىپ، باقىلاۋعا الا باستادى. دەگەنمەن ول كەزدە قىتايمەن ارادا بۇگىنگىدەي ساياسي كىربەڭدىك بولماعان ەدى. اتالعان اگەنتتىكتىڭ حابارىندا، وتكەن جىلى وڭتۇستىك كورەيا الدىن الا قحدر تارابىنا حابار بەرىپ، ەسكەرتۋ جاساعان. الايدا، بيىلعى جىلدا جۇرگىزىلەتىن شارلاۋ ارەكەتى ءۇشىن رەسمي حابارلاما جولداماعان ەكەن. وتكەن جىلدىڭ قاراشاسىنان، بيىلعى جىلدىڭ ناۋرىز ايىنا دەيىن بالىق اۋلاۋ ماۋسىمى بولعاندىقتان، شارلاۋ تەبىنىن ازايتقان. الايدا بۇگىننەن 1 ساۋىردەن باستاپ بۇل اۋماقتا بالىق اۋلاۋعا قاتاڭ تيىم سالىنادى.

وڭتۇستىك كورەيانىڭ SBS تەلەارناسىنىڭ حابارىندا، وڭتۇستىك كورەيا ۇلتتىق اسسامبلەياسىنىڭ 30 ناۋرىز كۇىن «تەڭىز گارنيزون زاڭ-ەرەجەلەرىنە» تۇزەتۋلەر مەن تولىقتىرۋلار ەنگىزۋ ارقىلى، تەڭىز شارلاۋشى كۇشتەرىنە كوپتەگەن قۇقىقتار بەرگەن. ايتالىق، شەكارانى زاڭسىز بۇزۋ، قارۋلى شابۋىل سيپاتتى كەدەرگىلەر بولعان جاعدايدا، ءۇش رەتتەن كوپ ەسكەرتۋ جاسايدى. ەگەر قارسى جاق ەسكەرتۋدەن كەيىن دە قيمىلىن توقتاتپاسا بارلىق ءوت كۇشىن پايدالانىپ قورعانۋعا جانە قاۋىپتى نىساندى جويىپ جىبەرۋىنە قۇقىقتى دەپ تاپقان.

“The Qazaq Times”