ۆەنەتسيا كارناۆالىندا تۋريستەر قورعانىس بەتپەردەسىن تاعىپ تۇر. كوروناۆيرۋستىڭ ورشۋىنە بايلانىستى سوڭعى ەكى كۇنگى مەرەكە توقتاتىلدى. ۆەنەتسيا، يتاليا. 23 اقپان 2020 جىل. فوتو: Reuters / Manuel Silvestri

وشاعى قىتايدان باستالىپ الەمگە تاراعان قاتەرلى كوروناۆيرۋس ىندەتىنەن 2619 كىسى كوز جۇمىپ، 79,3 مىڭ ادام جۇقتىرعان.

قىتايدان تىس جەردە: فيليپپين، گونكونگ، جاپونيا، فرانتسيا، يتاليا، تايۆان، وڭتۇستىك كورەيا جانە يراندا 27 ادام ۆيرۋستان ايىعا الماي، كوز جۇمعان.

بۇگىن بەلگىلى بولعان دەرەككە سايكەس، 79 341 ادام ينفەكتسيا جۇقتىرىپ، 1868 ناۋقاس ۆيرۋستان قايتىس بولعانىن حابارلاندى.

ەل اۋماعىندا ەڭ كوپ زارداپ شەككەن حۋبەي پروۆينتسياسىندا كەشەگى ءبىر كۇننىڭ ىشىندە 398  ادامنىڭ دەرت جۇقتىرعانى، اۋرۋدان 149 ناۋقاستىڭ دەمى تاۋسىلعانى جانە 1439 ادام ساۋىعىپ شىققان دەسەدى. پروۆينتسيادا وسى ۋاقىتقا دەيىن ينفەكتسيا ينەسىنە ىلىككەندەر سانى 64287-گە جەتىپ، ونىڭ 16 738-ءى اۋرۋدان جازىلىپ شىقسا، 2495 ادام قايتىس بولعان.

ۆەنەتسيا كقشەسىندە كەيبىر "تاۋەكەلشىل" تۋريستەر "يمۋنيتەتشىل ساياحاتتان" باس تارتقىسى كەلمەيدى. فوتو: ۆۆس

يتاليا سولتۇستىگىندەگى كودونو مەن ۆەنەتسيادا كوروناۆيرۋس جۇقتىرعان ەكى قاريا كوز جۇمدى. ۆيرۋس تارالماۋى ءۇشىن كەيبىر قالالاردا دۇكەندەر مەن مەكتەپتەر جابىلدى. سوڭعى دەرەك بويىنشا، يتاليادا كوروناۆيرۋستى جۇقتىرعاندار سانى 130-دان اسقان. ال يراندا كوروناۆيرۋستان 6 ادام كوز جۇمىپ، 5 وبلىستان 28 ادامنىڭ قاتەرلى دەرتكە شالدىققانى انىقتالعان.

لومباردياداعى ەسكەرتۋ تاقتاسى. لومبارديا ، يتاليا. فوتو: اشىق دەرەككوز

دۇنيەجۇزىلىك دەنساۋلىق ساقتاۋ ۇيىمى مەن فلوريدا شتاتىنداعى ۋنيۆەرسيتەتتىك ينفەكتسيالىق اۋرۋلار ستاتيستيكاسى ورتالىعىنىڭ جەتەكشىسى، ساراپشى ايرا ءلونجينيدىڭ بولجاۋىنشا, «ادامزاتتىڭ جاۋى» اتانعان كوروناۆيرۋس دەرتىنەن جەر جۇرتشىلىعىنىڭ 3/1-ءى زارداپ شەگۋى مۇمكىن دەسەدى.

«ادامنان ادامعا جۇعۋ جولىن تويتارماساق، جاي باقىلاۋ جانە تاراتپاۋ ءادىسى ايتارلىقتاي ناتيجەگە جەتكىزە قويۋى نەعايبىل. وقاشاۋلاۋ مەن كارانتين ۆيرۋستى توقتاتۋعا قاۋقارسىز»، – دەيدى عالىم.

“The Qazaq Times”