الماتى قالاسىنداعى "استانا" ورتالىق الاڭىن پوليتسيا جۇرگىنشىلەردەن تازالاپ جاتىر. تولەبي جانە ابىلايحان كوشەلەرىنىڭ، تولە بي مەن پانفيلوۆ كوشەلەرىنىڭ اراسىندا ورنالاسقان الاڭ مەن پارك تولىقتاي جابىلعان.

تىلشىلەرىمىزدىڭ جىبەرگەن مالىمەتتەرىنە قاراعاندا، الاڭ ماڭىندا ۇيالى بايلانىس جەلىلەرى دۇرىس ىستەمەيدى، ينتەرنەت بۇعاتتالعان. ول جەردەن ونلاين حابار تاراتۋ مۇمكىن ەمەس. ورتالىق الاڭعا جاقىن بىرنەشە كوشەدە پوليتسيا قىزمەتكەرلەرى بەيبىت تۇرعىنداردى دا جۇرگىزبەي جاتىر. پوليتسيانىڭ بۇل ارەكەتتەرىنە كەلىسپەگەندەر كۇشتەپ كولىكتەرگە وتىرعىزىلىپ جاتىر.

قازىر ورتالىق الاڭعا جۋرناليستەردى دە قاتاڭ تەكسەرۋدەن كەيىن عانا وتكىزۋدە. تىلشىلەردىڭ حابارىنا قاراعان الاڭ ماڭىندا جۇزدەگەن پوليتسيا قىزمەتكەرلەرى ءجۇر.

ايتا كەتەيىك، بۇگىن 22 اقپاندا قازاقستان ۇكىمەتى جاعىنان ەكسترەميستىك ۇيىم رەتىندە ەلدە تىيىم سالىنعان "قازاقستان دەموكراتيالىق تاڭداۋى" قوزعالىسى نارازىلىق شاراسىن وتكىزبەك بولعان. بۇعان قوسا، ءالى رەسمي تىركەۋدەن ءوتىپ ۇلگىرمەگەن "دەموكراتيالىق پارتيا" دا نارازىلىق شاراسىنا شىعاتىنىن مالىمدەگەن. تۇستەن بۇرىن دەمپارتيانىڭ ازداعان وكىلى عانا قاتىسقان شارا پوليتسيا جاعىنان تاراتىلدى. ونداعان ادام ۇستالدى.

****

تىلشىلەرىمىزدەن كەلىپ تۇسكەن سوڭعى مالىمەتتەرگە قاراعاندا، پانفيلوۆ كوشەسى بويىنان 20-دان استام ادام ۇستالعان. ۇستالعانداردىڭ كوبى وزدەرىن جاي جۇرگىنشى ەكەنىن ايتقان، الايدا پوليتسيا ولاردى كۇشتەپ كولىكتەرگە وتىرعىزىپ الىپ كەتكەن.

"The Qazaq Times"