بۇگىن الماتىنىڭ «استانا» الاڭىندا ساعات 11:00 شاماسىندا دەمپارتيانىڭ ۇيىمداستىرۋ-باستاماشىل توبى وكىلدەرىن پوليتسيا كۇشتەپ ۇستاپ اكەتتى. ەڭ سوڭى بولىپ ۇستالعان جۋرناليست ينگا يمانباي ارادا 15-20 مينۋت وتكەننەن كەيىن قايتا بوساتىلدى. 

جۋرناليست، جاس الاش گازەتىنىڭ رەداكتورى ينگا يمانباي ءتىلشى ءارى اياعى اۋىر بولعانىنا قاراماستان، پوليتسيا كولىگى جولدىڭ ورتاسىنان قارسى بەتكە بۇرىلىپ، مەدەۋ اۋدانىنىڭ پوليتسيا بولىمشەسىنە بەت العان ونى وتىرعازىپ الىپ كەتتى. 15-20 مينۋت شاماسىندا يمانبايدى الاڭدا بوساتتى.

جۋرناليست ينگا يمانباي. الماتى قالاسى. 22 اقپان 2020 جىل. فوتو: QT

تاڭەرتەڭ الاڭعا باعىت العان 70 شاقتى بەلسەندىنىڭ ۇستالعانى ءمالىم بولدى. ولار «جانبولات مامايعا بوستاندىق!» دەپ ۇرانداتتى. الاڭداعى «ءاليا-مانشۇك» ەسكەرتكىشى الدىنا جينالعان توپ وكىلدەرى بيلىكتى سىنعا العان بولاتىن. ساياساتكەر تولەگەن جۇكەەۆ: «بيلىك پارتيانى تىركەتپەۋ ءۇشىن بار امالدى جاساپ وتىر، مۇنىڭ بارلىعى نۇرسۇلتان نازارباەۆتىڭ تاپسىرماسىمەن جاسالىپ جاتىر. توقاەۆتا بيلىك جوق، حالىقتى كوشەگە شىعارماۋ ارقىلى بيلىك رەجيمنىڭ ءومىرىن سوزعىسى كەلەدى»، – دەدى.

ارنايى جاساق. الماتى قالاسى. 22 اقپان 2020 جىل. فوتو: QT

22 اقپانعا قاراعان ءتۇنى باستاماشىل توپ جەتەكشىسى جانبولات مامايدى اكىمشىلىك سوت «رۇقسات ەتىلمەگەن ميتينگىگە شاقىردى» دەگەن ايىپپەن ءۇش تاۋلىككە قامادى.

قارتتار جاپپاي ۇستالدى. الماتى قالاسى. 22 اقپان 2020 جىل. فوتو: QT

دەموكراتيالىق پارتيا قۇرۋشىلار بۇگىن، ياعني 22 اقپاندا پارتيانىڭ العاشقى سەزد وتكىزۋدى جوسپارلاعان. الايدا وڭىرلەردەگى قوزعالىس بەلسەندىلەرىنىڭ نەگىزسىز جاپپاي ۇستالۋى سەبەپتى سەزد وتكىزۋدەن باس تارتىپ، جانە ونىڭ ورنىنا بەيبىت شەرۋ وتكىزەتىندەرىن جاريالاعان ەدى.

ۇستاۋ بارىسىنان. الماتى قالاسى. 22 اقپان 2020 جىل. فوتو: QT

سوڭعى كەزدەرى «حالىق ۇنىنە قۇلاق اساتىن مەملەكەت» قۇرۋدى كوزدەيتىن پرەزيدەنت قاسىم-جومارت توقاەۆتىڭ ءسوز ەركىندىگىنە رۇقسات بەرەتىن كەپىلدىگى ميتينگ قارساڭىندا ءوز كۇشىن جوعالتا باستادى. Facebook جەلىسىندەگى ازاماتتىق باستاماعا  مونيتورينگ جۇرگىزۋشىسى #IHaveAChoiسe #ActivistsNotExtremists  جانە  ادام قۇقىعىن قورعاۋعا ارنالعان Qaharman توبى ميتينگ قارساڭىندا، اقپان ايىنىڭ  6-21 ارالىعىندا 15 قالاداعى 64 بەلسەندىگە پوليتسيا تاراپىنان ءارتۇرلى شارا قولدانىلعانىن جاريالادى.

مەدەۋ اۋداندىق پوليتسيا بولىمشەسىنە بەت العان جۋرناليست ينگا يمانبايدىڭ قاسىنا ەرۋشى جاقتاستارى تۇگەل ۇستالدى. الماتى قالاسى. 22 اقپان 2020 جىل. فوتو: QT

الەۋمەتتىك جەلىلەردە ءبىرازدان بەرى ەكس-بانكير، قۋعىنداعى وپپوزيتسيالىق ساياساتكەر مۇحتار ءابليازوۆ جەتەكشىلىك ەتەتىن، ەلدە ەكسترەميستىك ۇيىم رەتىندە تانىلىپ،  قىزمەتىنە تىيىم سالىنعان «قازاقستاننىڭ دەموكراتيالىق تاڭداۋى»  قوزعالىسى ينتەرنەت ارقىلى ازاماتتاردى 22 اقپانعا جاپپاي ميتينگىگە شاقىرىپ كەلەدى. ءابليازوۆتىڭ جۇرتشىلىقتى ميتينگىگە ۇندەۋىمەن قاتار جارىسا پروفيلاكيكاعا قامداناتىن ءىىم قوعامدا «باسقاشا ويلايتىن» بەلسەندىلەردى ءارتۇرلى ايىپتارمەن ۇيدە نەمەسە يزولياتوردا قاماۋدا ۇستاۋدى ادەتكە اينالدىرعان.

قاريالاردى دا كۇشتەپ ۇستاپ جاتتى. الماتى قالاسى. 22 اقپان 2020 جىل. فوتو: QT

توقاەۆ وتكەن جىلى 5-6 جەلتوقسانداعى گەرمانيا ەلىنە مەملەكەتتىك جۇمىس ساپارى قارساڭىندا جەلتوقساننىڭ 4-ءى  Deutsche Welle  نەمىس باسىلىمىنىڭ ءتىلشىسى جاننا نەمتسوۆاعا بەرگەن سۇحباتىندا « بۇگىندە جەكە پيكەت جاساعانى ءۇشىن ەشكىم جازالانبايدى» دەگەن بولاتىن. سونداي-اق بىلتىر كۇزدىڭ باسىندا مەملەكەت باسشىسى توقاەۆ قازاقستان حالقىنا ارناعان جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن تانىستىرعان ەدى. بۇل «ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىنىن» ايتقان پرەزيدەنتتىڭ ءسوزى مەن ءىسىنىڭ تەڭدىگى تۋرالى قوعام پىكىرى ءار الۋان. توقاەۆ تۇڭعىش جولداۋىندا:

«بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى. سوندىقتان ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت»، – دەگەن بولاتىن.

ءبىر-ءبىرىن قولتىقتاسقان ارنايى جاساق تىزبەگى. الماتى قالاسى. 22 اقپان 2020 جىل. فوتو: QT

دەمپارتيا جاقتاستارى "جانبولات مامايعا بوستاندىق بەرىلسىن" دەپ ۇرانداستى. الماتى قالاسى. 22 اقپان 2020 جىل. فوتو: QT

بەلسەندىلەردىڭ جولىن بوگەپ تۇرعان اسكەري قىزمەتكەر. الماتى قالاسى. 22 اقپان 2020 جىل. فوتو: QT

ينگا يمانبايدى ۇستاۋ ءساتى. الماتى قالاسى. 22 اقپان 2020 جىل. فوتو: QT

جۋرناليست پوليتسيا كولىگىنىڭ ىشىندە. الماتى قالاسى. 22 اقپان 2020 جىل. فوتو: QT

ارادا 15 مينۋت وتپەي جۋرناليست ينگا يمانباي قايتا بوساتىلدى. الماتى قالاسى. 22 اقپان 2020 جىل. فوتو: QT

جۋرناليستيكا سالاسىندا ۇزاق جىلدار ۇستازدىق ەتكەن قاريا جۋرناليستەرگە جاسالعان قىسىمعا قىنجىلاتىنىن جەتكىزدى. الماتى قالاسى. 22 اقپان 2020 جىل. فوتو: QT

الاڭ ايماعىندا جۋرناليستەردىڭ كۋالىگىن قايتا-قايتا تەكسەرىپ، ەسكەرتۋ جاساپ جاتقان پوليتسەيلەر ەش رۇقساتسىز كۋالىكتى سۋرەتكە ءتۇسىرىپ الىپ جاتىر. الماتى قالاسى. 22 اقپان 2020 جىل. فوتو: QT

 

“The Qazaq Times”