استانادا اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ بۇرىنعى توراعاسى يسلام ابىشەۆ پەن سەرىك تۇكيەۆتىڭ ىسىنە بايلانىستى  سوت ۇكىم شىعاردى.

استانا سوتىنىڭ يسلام ابىشەۆتى بەس جىلعا باس بوستاندىعىنان ايىرۋى قوعامدا وتكىر سىن تۋدىرىپ ۇلگەردى. ابىشەۆ جازاسىن ەڭ تومەنگى قاۋىپسىزدىك مەكەمەسىندە وتەمەك. سونداي-اق «قازاق كۇرەسى» فەدەراتسياسىنىڭ بۇرىنعى ۆيتسە-پرەزيدەنتى سەرىك تۇكيەۆتى ءتورت جىلعا اباقتىعا جابۋ جازاسىنا كەستى.

تەرگەۋ نۇسقاسى بويىنشا، ابىشەۆ سوكولوۆتەگى سۋمەن جابدىقتاۋ جۇيەسىن سالۋ جانە بىرنەشە ەلدى مەكەندە جەلى جۇرگىزۋدە جالپى قۇنى 5,8 ميلليارد تەڭگە (15 ميلليون دوللار) بولاتىن مەملەكەتتىك ساتىپ الۋ تۋرالى شارت جاساسۋ ءۇشىن 60 ميلليون تەڭگە (160 مىڭ دوللار) كولەمىندە پارا العان-مىس. پارانىڭ ءبىر بولىگى، 10 ميلليون تەڭگە (26,5 مىڭ دوللار) تۇكيەۆ ارقىلى بەرىلىپتى دەگەندى العا تارتادى.

سوت پروتسەسى بارىسىندا ءجيى قوعام سىنىنا ۇشىراعان سۋديا قاجىمۇقان مەكەمتاس 11 ايدان استام تەرگەۋ يزولياتورىندا قاماۋدا بولعان كۇدىكتىلەر: ابىشەۆتى 5 جىلعا، تۇكيەۆتى 4 جىلعا باس بوستاندىعىنان  ايىرۋعا ۇكىم شىعاردى. سوت جاۋاپكەرشىلىكتى اۋىرلاتاتىن ءمان-جايدىڭ تابىلماعانىن جانە وسى ۋاقىتقا دەيىن قىزمەتتەگى جەتىستىكتەرىن ەسكەرە وتىرىپ، پروكۋروردىڭ ايىپتاۋ اكتىسىندە سۇراعان 11 جىلدى بەس جىلعا دەيىن قىسقارتىپتى.

ادۆوكات ابدۋراحمانوۆ ا.، قۇسپان ا.، ەسقاراەۆ م.، ءجۇنىسباي س. يسلام ابىشەۆ پەن سەرىك تۇكيەۆتى قورعاۋعا بارىن سالدى. ۇكىمگە نارازى ادۆوكات ابزال قۇسپان «ادۆوكاتتىق ليتسەنزيامدى تاپسىرىپ، ادىلدىكتى كوشەدەن ىزدەيمىن» دەپ سوت تورەلىگىنە قارسىلىعىن ءبىلدىردى. قورعاۋشىلاردىڭ سوزىنشە، قىلمىستىق قۇرام مەن موتيۆ، سالماقتى دالەلدىڭ جوقتىعىنا قاراماستان، قايسىبىر مۇددەلى توپتىڭ ىقپالىمەن وسىنداي شەشىم قابىلدانعان بولۋى ىقتيمال.

يسلام ابىشەۆ 2012 جىلى اشم سۋ رەسۋرستارى كوميتەتىنىڭ توراعاسى قىزمەتىنە تاعايىندالدى. 2013 جىلدىڭ شىلدەسىندە قىزمەتىنەن الاستاتىلدى. 2014 جىلدىڭ شىلدەسىندە قايتادان كوميتەت توراعاسى قىزمەتىنە كەلدى. ال 2019 جىلعى 14 ناۋرىزدا ابىشەۆتى سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى تۇتقىندادى.

بۇعان دەيىن «پارا الۋعا ىڭعاي تانىتتى» دەگەن ايىپپەن بەلگىلى شەنەۋنىك يسلام ابىشەۆ كۇدىككە ءىلىنىپ، تەرگەۋ امالدارى اياقتالىپ، ءىس سوتقا جولدانعان. ەل ىشىندە «كوپ سەريالى كۇزگى كومەديا» اتانعان ىسكە قاتىستى قۇقىق قورعاۋشىلار ابىشەۆتىڭ «بولىنگەن قاراجاتتى ۇلكەن ويىنشىلارمەن بولىسپەي، بيۋدجەتكە كەرى قايتارعانى» ءۇشىن «ارنايى تاپسىرىس بەرىلگەن ستسەنراي» بويىنشا ايىپتاپ جاتقانىن ايتقان بولاتىن. ابىشەۆ سوتىنا تورەلىك ەتكەن سۋديانىڭ ادۆوكات ابزال قۇسپان «پروكۋروردان دا وتكەن ايىپتاۋشى» ەكەنىن مالىمدەگەن ەدى. ءار سوت وتىرىسىن تىكەلەي ەفيردەن ۇزبەي قارايتىن ازاماتتىق قوعام وكىلدەرى سۋديا قاجىمۇقان مەكەمتاستىڭ سوت وتىرىسىندا ءوزىن ۇستاۋى مەن مەملەكەتتىك ءتىلدى جەتىك مەڭگەرگەنىنە كۇمانمەن قارايدى. بۇعان سەبەپ سۋديا مەكەمتاس وقىعان ەكى بەت قاۋلىدا 70-كە تارتا قاتە تابىلعان. مۇنى ابىشەۆتىڭ ادۆوكاتتارى مەن قورعاۋشىلارى تەكسەرىپ انىقتاعان.

"The Qazaq Times"