Astanada auıl şaruaşılığı ministrligi Su resurstarı komitetiniñ bwrınğı törağası Islam Äbişev pen Serik Tükievtiñ isine baylanıstı  sot ükim şığardı.

Astana sotınıñ Islam Äbişevti bes jılğa bas bostandığınan ayıruı qoğamda ötkir sın tudırıp ülgerdi. Äbişev jazasın eñ tömengi qauipsizdik mekemesinde ötemek. Sonday-aq «Qazaq küresi» federaciyasınıñ bwrınğı vice-prezidenti Serik Tükievti tört jılğa abaqtığa jabu jazasına kesti.

Tergeu nwsqası boyınşa, Äbişev Sokolovtegi sumen jabdıqtau jüyesin salu jäne birneşe eldi mekende jeli jürgizude jalpı qwnı 5,8 milliard teñge (15 million dollar) bolatın memlekettik satıp alu turalı şart jasasu üşin 60 million teñge (160 mıñ dollar) köleminde para alğan-mıs. Paranıñ bir böligi, 10 million teñge (26,5 mıñ dollar) Tükiev arqılı berilipti degendi alğa tartadı.

Sot procesi barısında jii qoğam sınına wşırağan sud'ya Qajımwqan Mekemtas 11 aydan astam tergeu izolyatorında qamauda bolğan küdiktiler: Äbişevti 5 jılğa, Tükievti 4 jılğa bas bostandığınan  ayıruğa ükim şığardı. Sot jauapkerşilikti auırlatatın män-jaydıñ tabılmağanın jäne osı uaqıtqa deyin qızmettegi jetistikterin eskere otırıp, prokurordıñ ayıptau aktisinde swrağan 11 jıldı bes jılğa deyin qısqartıptı.

Advokat Abdurahmanov A., Qwspan A., Esqaraev M., Jünisbay S. Islam Äbişev pen Serik Tükievti qorğauğa barın saldı. Ükimge narazı advokat Abzal Qwspan «advokattıq licenziyamdı tapsırıp, ädildikti köşeden izdeymin» dep sot töreligine qarsılığın bildirdi. Qorğauşılardıñ sözinşe, qılmıstıq qwram men motiv, salmaqtı däleldiñ joqtığına qaramastan, qaysıbir müddeli toptıñ ıqpalımen osınday şeşim qabıldanğan boluı ıqtimal.

Islam Äbişev 2012 jılı AŞM Su resurstarı komitetiniñ törağası qızmetine tağayındaldı. 2013 jıldıñ şildesinde qızmetinen alastatıldı. 2014 jıldıñ şildesinde qaytadan komitet törağası qızmetine keldi. Al 2019 jılğı 14 naurızda Äbişevti Sıbaylas jemqorlıqqa qarsı is-qimıl agenttiginiñ qızmetkerleri twtqındadı.

Bwğan deyin «para aluğa ıñğay tanıttı» degen ayıppen belgili şeneunik Islam Äbişev küdikke ilinip, tergeu amaldarı ayaqtalıp, is sotqa joldanğan. El işinde «köp seriyalı küzgi komediya» atanğan iske qatıstı qwqıq qorğauşılar Äbişevtiñ «bölingen qarajattı ülken oyınşılarmen bölispey, byudjetke keri qaytarğanı» üşin «arnayı tapsırıs berilgen scenraiy» boyınşa ayıptap jatqanın aytqan bolatın. Äbişev sotına törelik etken sud'yanıñ advokat Abzal Qwspan «prokurordan da ötken ayıptauşı» ekenin mälimdegen edi. Är sot otırısın tikeley efirden üzbey qaraytın azamattıq qoğam ökilderi sud'ya Qajımwqan Mekemtastıñ sot otırısında özin wstauı men memlekettik tildi jetik meñgergenine kümänmen qaraydı. Bwğan sebep sud'ya Mekemtas oqığan eki bet qaulıda 70-ke tarta qate tabılğan. Mwnı Äbişevtiñ advokattarı men qorğauşıları tekserip anıqtağan.

"The Qazaq Times"