استانالىق بەلسەندى باس پروكۋراتۋراعا: «جاكىشەۆ پەن ەلشىباەۆ دەرەۋ بوساتىلسىن»

بۇگىن، اقپاننىڭ 13-ءى ەلوردالىق بەلسەندى بيبىگۇل تۇياقوۆا باس پروكۋراتۋرا عيماراتىنىڭ الدىندا قۇقىق قورعاۋشىلار «ساياسي تۇتقىن» دەپ سانايتىن مۇحتار جاكىشەۆتى بوساتىلۋىن تالاپ ەتىپ، جالعىز ادامدىق پيكەت وتكىزدى.

قولىنا «مۇحتار جاكىشەۆكە بوستاندىق! مەرزىمىنەن ەرتە بوساسىن» دەگەن جازۋى بار باننەر ۇستاپ شىققان جەرگىلىكتى ازاماتتىق بەلسەندى 2009 جىلدان بەرى تۇرمەدە وتىرعان مۇحتار جاكىشەۆتى جانە بىلتىر جاڭاوزەن جاستارىنىڭ جۇمىسسىزدىعى ماسەلەسىن تاباندى تۇردە كوتەرىپ، كەيىننەن بەس جىلعا سوتتالعان ەرجان ەلشىباەۆتى دەرەۋ قاماۋدان بوساتۋىن سۇرادى.

«قولداعى بار اقپاراتقا قاراعاندا مۇحتار جاكىشەۆ ءۇشىنشى رەت مەرزىمىنەن ەرتە بوساتۋ تۋرالى ءوتىنىش بەرىپ جاتىر. ونىڭ دەنساۋلىعىنا قاۋىپ ءتونىپ تۇر. قايتا-قايتا تۇرمەدە قۇلاپ قالىپ جاتقانىن ەستىدىم. سول سەبەپتى جاكىشەۆتى بوساتۋدى تالاپ ەتەمىن. …سونداي-اق ەلشىباەۆتىڭ اتىنا ەشكىم ارىز تۇسىرمەگەن. بۇرىنعى وقيعا بويىنشا سوتتادى. ءتىپتى «جاپا شەكتى» دەپ تاۋىپ اكەلىنگەن ادامنىڭ ءوزى وعان ارىز-شاعىمى جوعىن ايتتى. باس پروكۋراتۋرا پروتەست جاساسىن»، – دەيدى بيبىگۇل تۇياقوۆا ازاتتىققا بەرگەن كومەنتاريىندە.

“The Qazaq Times”