وبلىستىق سوت اقتاعان باتىربەكوۆتىڭ جازبا-ماقالاسىنا سارىاعاش سوتى ساراپتاما جاساتپاق

كەشە، اقپاننىڭ 5-ءى جالعان ايىپتاۋدان جاپا شەگىپ، بىرنەشە اي بويى ناقاق اباقتىدا وتىرعان ايماق ءجۋرناليسى امانگەلدى باتىربەكوۆتىڭ ۇستىنەن ءلايلا دارحانباەۆا تۇسىرگەن ارىز بويىنشا سارىاعاش اۋداندىق سوتى ارنايى ساراپتاما تاعايىندادى.

سۋديا بەرىك كايپوۆتىڭ ازاتتىققا ايتقان حابارعا قاراعاندا، بەلسەندى ءتىلشىنىڭ دارحانباەۆا تۋرالى جازعان جازباسى مەن «سارىاعاش-ينفو» گازەتىنە شىققان ماقالاسى ساراپتاماعا جولدانعان.

«زاڭعار مەدەت» قوعامدىق بىرلەستىگىنىڭ توراعاسى ءلايلا دارحانباەۆا ورىنبايقىزى ءتىلشى «الەۋمەتتىك جەلىسىنە جازبا جازىپ، گازەتىنە ماقالا جاريالاپ، ماعان جالا جاپتى، قورلادى» دەگەن ۋاجبەن باتىربەكوۆكە، سونداي-اق جازبانى بولىسكەن تاعى بىرنەشە ادامنىڭ ۇستىنەن دە ارىز تۇسىرگەن. سوت توراعاسى ارىزدانۋشىنىڭ سۇراۋى نەگىزىندە ول تۋرالى Facebook پاراقشاسىندا جازىلعان جازبا مەن «سارىاعاش-ينفو» گازەتىنە جاريالاعان ماقالاعا پسيحولوگيالىق-فيلولوگيالىق ساراپتاما تاعايىنداۋ تۋرالى قاۋلى شىعارىپتى.

بۇل سارىاعاش سوتىنىڭ وڭىردەگى ازاماتتىق بەلسەندىنىڭ ۇستىنەن قوزعالعان ەكىنشى ءىستى قاراۋى. بۇعان دەيىن جەرگىلىكتى شەنەۋنىك، كەلەس اۋداندىق ءبىلىم ءبولىمىنىڭ باستىعى باحتيار ابديەۆتىڭ «ار-نامىسىما ءتيىپ، قورلادى» دەگەن ارىزىمەن اۋدان سوتى 27 ايعا قاماۋ جازاسىن كەسىپ، ارتىنشا حالىقارالىق ۇيىمدار مەن قوعام بەلسەندىلەرى ارالاسىپ ءجۇرىپ تۇركىستان وبلىستىق سوتى اقتاعان بولاتىن.

وتكىر جازباسىنا بولا جەرگىلىكتى شەندىلەرگە جاعا بەرمەيتىن باتىربەكوۆتىڭ ۇستىنەن قايتا-قايتا ءىس اشىلۋى – قازاقستانداعى ءسوز بوستاندىعىنىڭ احۋالى، قىسىمعا ۇشىراعان مۇشكىل ءحالىنىڭ سيمۆولدىق كورىنىسىنە اينالعانىن اڭعارتادى دەيدى ساراپشىلار مەن ماماندار.

"The Qazaq Times"