ءجۋرناليستى سوتقا بەرگەن شەنەۋنىكتىڭ ءوزى ءىستى بولىپ جاتىر

بىرنەشە اي بويى جالعان جالامەن قاماۋدا بولعان جۋرناليست امانگەلدى باتىربەكوۆتىڭ ۇستىنەن ارىزدانۋشى كەلەس اۋداندىق ءبىلىم ءبولىمىنىڭ باسشىسى باقتيار ابديەۆتىڭ وزىنە قىلمىستىق ءىس قوزعالدى.

بۇگىن، 5 اقپاندا وبلىستىق پوليتسيا دەپارتامەنتىنىڭ ءباسپاسوز حاتشىسى سالتانات قاراكوزوۆانىڭ سوزىنە قاراعاندا، سارىاعاش اۋداندىق پوليتسيا باسقارماسى كەلەس اۋداندىق ءبىلىم ءبولىمىنىڭ باسشىسى باقتيار ابديەۆكە قاتىستى قىلمىستىق كودەكستىڭ 420-بابى بويىنشا («ساراپشىنىڭ، ماماننىڭ كورiنەۋ جالعان ايعاقتارى، قورىتىندىلارى نەمەسە قاتە اۋدارما») قىلمىستىق ءىس تىركەگەن. قازىر سوتقا دەيىنگى تەرگەۋ امالدارى ءجۇرىپ جاتقان كورىنەدى.

ازاتتىق راديوسى «قازاقستاننىڭ ءسوز بوستاندىعىنىڭ شەكتەلۋىنىڭ» سيمۆولىنا اينالعان ايماقتاعى ازاماتتىق بەلەندى، جۋرناليست امانگەلدى باتىربەكوۆ «جابىرلەنۋشى رەتىندە كورىنەۋ جالعان اقپارات بەرگەنى ءۇشىن» شەنەۋنىك ابديەۆتىڭ ۇستىنەن ارىز جازعانىن حابارلادى.

بۇعان دەيىن جەرگىلىكتى اكىمدىك قىزمەتكەرى باقتيار ابديەۆ «سارىاعاش-ينفو» گازەتىنىڭ رەداكتورى امانگەلدى باتىربەكوۆ «ار-نامىسىما ءتيىپ، قورلادى» دەپ سارىاعاش اۋداندىق سوتىنا شاعىمدانعان. اۋداندىق سوت 2019 جىلدىڭ 23 قىركۇيەگىندە ءجۋرناليستى قىلمىستىق كودەكستىڭ «جالا جابۋ» جانە «قورلاۋ» بابىمەن كىنالى دەپ تانىپ، 27 ايعا قاماۋعا جازا كەسكەن بولاتىن. ال بيىل 9 قاڭتاردا تۇركىستان وبلىستىق سوتى سارىاعاش اۋداندىق سوتىنىڭ ۇكىمىنىڭ كۇشىن جويىپ، باتىربەكوۆتى اقتادى.

بۇعان دەيىن كوپتەگەن حالىقارالىق ۇيىمدار مەن قۇقىق قورعاۋشىلار جوعارعى ينستانتسيالاردان قاماۋدا وتىرعان جۋرناليست باتىربەكوۆتى بوساتۋدى سۇراعان. ناقتىراق ايتقاندا، قازان ايىنىڭ  سوڭىندا بۇرىن حالىقارالىق «شەكاراسىز تىلشىلەر» (Reporters sans frontières/RSF) جانە «جۋرناليستەردى قورعاۋ كوميتەتى» (Committee to Protect Journalists/CPJ) ۇيىمدارى قازاقستان بيلىگىن ايماقتاعى بەلگىلى جۋرناليست امانگەلدى باتىربەكوۆتى دەرەۋ بوساتۋعا، ءسوز بوستاندىعىن شەكتەمەۋگە شاقىردى.

«جۋرناليستەردى قورعاۋ كوميتەتى» (CPJ) ۇيىمى «جالا جابۋ جانە قورلاۋ تۋرالى قىلمىستىق زاڭدارىن زايىرلىلىققا ءتان قۇندىلىقتارمەن جەتىلدىرۋ كەرەك، مۇنداي ماسەلەلەر ازاماتتىق ىستەر قاتارىندا قارالۋى ءتيىس» دەگەن بولاتىن.

RSF حالىقارالىق ۇيىمىنىڭ رەيتينگىسىندە قازاقستان ءسوز بوستاندىعى  بويىنشا 180 ەلدىڭ ىشىندە 158-ورىندا تۇر. سونداي-اق «ءادىل ءسوز» ءسوز بوستاندىعىن قورعاۋدىڭ حالىقارالىق قورىنىڭ ەسەبىنشە، «جۋرناليستەردىڭ زاڭدى كاسىبي قىزمەتىنە كەدەرگى جاساۋ» رەەسترىندە ءححى عاسىر باستالعالى بەرى، 2000 جىلدىڭ قاڭتارى-2019 جىلدىڭ قىركۇيەگى ارالىعىندا تىلشىلەر جۇمىسىنا 839 كەدەرگى كەلتىرۋ فاكتىسى تىركەلگەن.

"The Qazaq Times"