«عاسىر مامىلەسى»: اقش يەرۋساليمدى ءبولۋ تۋرالى قۇجاتتى جاريالايدى

The Wall Street Journal گازەتىنىڭ حابارلاۋىنشا، جاقىن ارادا اق ءۇي پالەستينا-يزرايل شيەلەنىسىن رەتتەۋ جوسپارىن ۇسىنباق. قۇجات بويىنشا تاراپتار جىلدار بويى تالاسقا تۇسكەن ايماقتاردى ءوزارا ءبولىپ الۋى ءتيىس.

يەرۋساليم مارتەبەسىن انىقتاۋ – پالەستينا-يزرايل قاقتىعىسىنداعى نەگىزگى ماسەلەنىڭ ءبىرى. 1967 جىلعى سوعىس كەزىندە يزرايلدىكتەر قالانىڭ شىعىس بولىگىن الدى. ولار يەرۋساليمدى ءيزرايلدىڭ «ءبىرتۇتاس جانە بولىنبەيتىن» استاناسى دەپ اتايدى. ال پالەستينالىقتار قالانىڭ شىعىس بولىگىن ءوز مەملەكەتىنىڭ استاناسى رەتىندە جاريالاعىسى كەلەدى. 2018 جىلدان باستاپ اقش پەن گۆاتەمالا ەلشىلىكتەرى يەرۋساليمدە جۇمىس ىستەپ تۇر.

دونالد ترامپ اتالعان ماسەلەگە قاتىستى «عاسىر مامىلەسىنە» نۇكتە قويىلاتىنىن حابارلاعان. سونداي-اق، ترامپ يزرايل پرەمەر-ءمينيسترى بينيامين نەتانياحۋ اقش ۇسىنعان باستاماعا قارسى بولمايتىنىن، ال پالەستينا تاراپى ۋاشينگتوننىڭ جوسپارىنا الداعى كۇندەرى قولداۋ بىلدىرەتىنىن ايتتى. سونىمەن قاتار، اق ءۇي باسشىسىنىڭ ايتۋىنشا، جوسپاردى كوپتەگەن اراب ەلدەرى دە قولدايدى.

2019 جىلى ماۋسىمنىڭ سوڭىندا اق ءۇي پالەستينا-يزرايل قاقتىعىسىن رەتتەۋ بويىنشا قۇجاتتا ەكونوميكالىق اسپەكتىلەر بار ەكەنىن مالىمدەدى. اتاپ ايتقاندا، پالەستينا مەن كورشى ەلدەرگە $50 ملرد.كولەمىندە ينۆەستيتسيا ءبولۋ قاراستىرىلعان. بىراق پالەستينا اكىمشىلىگى مەن بىرقاتار اراب ەلدەرى وسىنداي كوزقاراستى ورىنسىز دەپ، قۇجاتقا بويكوت جاريالادى.

ۋاشينگتون داۋلى ايماققا اينالعان يەرۋساليمدى ءيزرايلدىڭ تەرريتورياسىنا جاتقىزىپ وتىر. پالەستينا بولسا، بۇعان ءۇزىلدى-كەسىلدى قارسى. وسىعان وراي پالەستينالىقتاردىڭ جاقتاستارى گازا سەكتورىندا ورنالاسقان بۇۇ عيماراتىنىڭ الدىندا نارازىلىق اكتسياسىن ۇيىمداستىردى. شەرۋگە شىققاندار اقش ساياساتىنا قارسى ۇرانداتىپ تارتىپسىزدىك ورناتتى.

"The Qazaq Times"