ترامپ پەن ەردوعان جاھاندىق جاعدايدى تالقىلادى

اقش پرەزيدەنتى دونالد ترامپ پەن تۇركيا پرەزيدەنتى رەجەپ تايىپ ەردوعان ليۆيا قاقتىعىسى، سۇرياداعى داعدارىستى تالقىلادى.

اق ءۇي ءباسپاسوز حاتشىسىنىڭ ورىنباسارى دجادد دير Twitter-دەگى پاراقشاسىندا: «تەلەفون ارقىلى سويلەسكەن تاراپتار ليۆيا مەن سۇرياداعى جاعدايدى وڭتايلاندىرۋ، قاقتىعىستاردى توقتاتۋ جولدارىن تالقىلادى. پرەزيدەنت ترامپ جەرورتا تەڭىزىنىڭ شىعىس بولىگىندەگى جاعداي، تۇركيا مەن گرەكياداعى ميگراتسيالىق ماسەلەلەرگە توقتالدى»، – دەپ جازدى.

17 قاڭتاردا تۇركيا پرەزيدەنتى ليۆياعا اسكەر اتتاندىراتىنىن ايتقان بولاتىن. ەردوعان تۇركيانىڭ وڭتۇستىگىندە تۇراقتىلىقتى ساقتاۋ ءۇشىن ساياسي جانە اسكەري كۇشتىڭ بارلىق ءتۇرىن پايدالاناتىنىن ايتىپ، توعىز اي بويىنا ۇرىس قيمىلدارى جالعاسىپ كەلە جاتقان ليۆيا ماسەلەسىنە ارالاسۋىن توقتاتپايتىنىن مالىمدەگەن.

قازىرگى ۋاقىتتا ءسۇريادان تۇركيا مەن گرەكياعا اعىلعان بوسقىندار سانى كوپ. 24 قاڭتاردا گرەكيانىڭ ءىرى قالالارىندا جەرگىلىكتى تۇرعىندار بوسقىندارعا قارسى نارازىلىق شەرۋلەرىن وتكىزگەن. ميگرانتتار قاقتىعىسىنان، ەكونوميكالىق داعدارىستان شارشاعانىن ايتقان نارازىلار ەل اۋماعىن بوسقىنداردان بوساتۋىن تالاپ ەتتى. ويتكەنى مەملەكەتتە ميگرانتتارعا ارنالعان ورتالىق كوبەيىپ، جەرگىلىكتى تۇرعىنداردىڭ تۇرمىس-تىرشىلىگى قيىنداعان. 2016 جىلى ەۋروپالىق وداق پەن تۇركيا ورتاق شەشىمگە كەلگەن. ارنايى كەلىسسوزگە سايكەس، انكارا ميگرانتتاردىڭ ەۋروپا ەلدەرىنە قونىس اۋدارماۋىن قاتاڭ قاداعالاسا، ەو تۇركياعا 6 ملرد ەۋرو كولەمىندە قارجى بەرۋى ءتيىس بولاتىن. كەيىننەن ەردوعان وداق تاراپىنان تەك 3 ملرد ەۋرونىڭ بولىنگەنىن مالىمدەدى.

رەسمي مالىمەتتەر بويىنشا، تۇركيانىڭ وزىندە ازاماتتىق سوعىستان قاشقان 3,6 ميلليون سۇريالىق بوسقىن بار. ەۋرووداقتىڭ تۇركيامەن كەلىسسوزى گرەكيادا 2015 جىلدان باستاپ بوسقىنداردىڭ ارتۋىنا سەپ بولدى. لەسبوس ەلدىمەكەنىندەگى ميگرانتتار لاگەرىندە كۇنى بۇگىنگە دەيىن جەرگىلىكتى تۇرعىندار مەن بوسقىندار اراسىندا قاقتىعىستار ورىن الىپ كەلەدى. رەسمي مالىمەتتەر بويىنشا، شامامەن 24 مىڭ بوسقىن ەۋروپا اسۋ ماقساتىندا گرەكياعا قونىس اۋدارعان.

"The Qazaq Times"