ترامپ ەۋروپادان كەلگەندەردى ەلگە كىرگىزبەۋ تۋرالى شەشىم قابىلدادى

اقش پرەزيدەنتى دونالد ترامپ كوروناۆيرۋسقا بايلانىستى ەۋروپامەن كەمە قاتىناسى جانە اۆياتاسىمالداۋدى 30 كۇنگە توقتاتاتىنىن حابارلادى. بۇل شارالار جۇمادان باستالادى.

ترامپ حالىققا كوروناۆيرۋستىڭ تارالۋىنا بايلانىستى ارناعان ۇندەۋىندە «قاتاڭ، بىراق قاجەتتى شەكتەۋلەر» كوروناۆيرۋستى جۇقتىرۋدىڭ 460 وقيعاسى تىركەلگەن ۇلىبريتانياعا قاتىستى قولدانىلمايتىنىن ايتتى. سونداي-اق، ول كونگرەستى كوروناۆيرۋستىڭ اقش ەكونوميكاسىنا اسەرىمەن كۇرەس اياسىندا سالىق جۇكتەمەسىن جەڭىلدەتۋ شارالارىن قولدانۋعا شاقىردى.

پرەزيدەنت ترامپ 11 ناۋرىز كۇنگى مالىمدەمەسىندە ەۋروپا ەلدەرىنىڭ بيلىگىن ۆيرۋستىڭ تارالۋىمەن قاجەتتى دارەجەدە كۇرەسپەدى دەپ سىنادى. ونىڭ ايتۋىنشا، بىرنەشە اقش تۇرعىنىنا ەۋروپادان كەلگەندەردەن ۆيرۋس جۇققان.

كەشە دۇنيەجۇزىلىك دەنساۋلىق ساقتاۋ ۇيىمى كوروناۆيرۋس ينفەكتسياسىنىڭ تارالۋىن پاندەميا دەپ تانىدى. جەنەۆادا وتكەن بريفيننگ كەزىندە ۇيىم وكىلدەرى: «الداعى تاياۋ كۇندەرى جانە تاياۋ اپتادا COVID-19-ءتى جۇقتىرۋ فاكتىلەرى، ءولىم جاعدايلارى جانە زارداپ شەككەن ەلدەر سانى بۇدان دا ارتاتىنىن بولجاپ وتىرمىز. ءبىز COVID-19 ينفەكتسياسىنىڭ تارالۋىن پاندەميا دەپ سيپاتتاۋعا بولادى دەگەن تۇجىرىمعا كەلدىك»، – دەدى.

بۇگىنگى دەرەكتەر بويىنشا، الەمدە قاۋىپتى ۆيرۋستى جۇقتىرعاندار سانى 124997 ادامعا جەتكەن. قايتىس بولعاندار سانى – 4622 ادام. اقش-تا 1122 ادام قاتاڭ باقىلاۋعا الىنسا، 37 ادام ءولىم قۇشقان.

"The Qazaq Times"