مەملەكەت باسشىسى توقاەۆ پەن ۇكىمەت باسشىسى مامين. فوتو: اشىق دەرەككوز

بۇگىن ەلوردادا پرەزيدەنتتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا مينيسترلەر كابينەتى مەن پرەمەر-مينيسترگە بىرقاتار ەسكەرتۋ جاساپ، تاپسىرما جۇكتەدى.

«قۇرمەتتى جيىنعا قاتىسۋشىلار. بۇگىن وزدەرىڭىز كورىپ وتىرسىزدار، بەرىلگەن تاپسىرمالاردىڭ ءتيىستى دەڭگەيدە ورىندالماعانىنا سوگىس جاريالاعان جوقپىن. بىراق كەمشىلىكتەر جەتەرلىك. مىسالى، ءوز سوزىمدە ايتقانداي، حالىق تۇتىناتىن ەڭ قاجەتتى تاۋارلاردىڭ باعاسىن ءوسىرىپ جىبەرگەنى ءۇشىن قاتاڭ شارالار قولدانۋا بولار ەدى. جالپى العاندا سوگىس بەرۋ جاقسى ناتيجەگە جەتۋدىڭ اسا ءتيىمدى جولى ەمەس. بۇل مەنىڭ ناقتى ۇستانىمىم. سوندىقتان ۇكىمەت مۇشەلەرى جانە اكىمدەرگە كەمشىلىكتى تۇزەتۋگە مۇمكىندىك بەرىپ وتىرمىن. سول سەبەپتى بۇگىنگى جيىن بارىسىندا بەرىلگەن تاپسىرمالاردى زور جاۋاپكەرشىلىكپەن ورىنداۋ قاجەت. كوكتەمدە بۇل ماسەلەگە قايتا ورالامىز. سول كەزدە ءتۇرلى سەبەپتەرگە بايلانىستى وزدەرىنە جۇكتەلگەن مىندەتتەردى ءتيىستى دەڭگەيدە اتقارا الماعانداردى قىزمەتىنەن بوساتۋ جونىندە ناقتى شەشىم قابىلدايمىز. الدىمىزدا اۋقىمدى مىندەتتەر تۇر»، – دەدى پرەزيدەنت توقاەۆ.

«بيۋدجەتتىك ساياساتتىڭ تيىمدىلىگىن تىڭعىلىقتى زەردەلەۋ قاجەت. مەن يميدجدىك ءىس-شارالارعا بيۋدجەت شىعىستارىن قىسقارتۋدى تاپسىرعان ەدىم. ۇكىمەت شىعىستاردى 300 ملرد تەڭگەگە وڭتايلاندىردى. دەگەنمەن، مۇنى ماسەلەنى شەشۋدەگى العاشقى قادام دەپ سانايمىز»، – دەدى قازاقستان پرەزيدەنتى. سونىمەن قاتار مەملەكەت باسشىسى ءدال وسىنداي جۇمىستى كۆازيمەملەكەتتىك سەكتوردا دا جۇرگىزۋ قاجەتتىگىن اتاپ ءوتتى. «ءونىمسىز شىعىستاردى قىسقارتۋعا باعىتتالعان ءدال وسىنداي جۇمىستى كۆازيمەملەكەتتىك سەكتوردا دا جۇرگىزۋ قاجەت. ۇكىمەتكە 2020 جىلدىڭ 1 مامىرىنا دەيىن اتقارىلعان جۇمىستاردى بايانداۋدى تاپسىرامىن»، – دەدىقاسىم-جومارت توقاەۆ.

 «رەفورمالاردى جۇزەگە اسىرۋ قارقىنى باياۋ ءجۇرىپ جاتقانىن مويىنداۋ كەرەك. سوندىقتان ەلىمىزدىڭ ەكونوميكاسى ءۇشىن رەفورمالاردىڭ باعدارلامالارىن ازىرلەۋ ماڭىزدى دەپ سانايمىن. بىزگە نەگىزگى پروبلەمالاردى شەشۋگە اسەر ەتەتىن جاڭا ەكونوميكالىق باعام قاجەت. رەفورمالاردى جۇزەگە اسىرۋ ءۇشىن شەشىم قابىلداي ءبىلۋ قاجەت. سوندىقتان مەن ۇكىمەتتى شەشىم قابىلداۋعا شاقىرامىن»، – دەدى پرەزيدەنت.

مەملەكەت باسشىسى بۇگىنگى جيىن بارىسىندا بەرىلگەن تاپسىرمالاردى زور جاۋاپكەرشىلىكپەن ورىنداۋ قاجەتتىگىن ەسكەرتتى. توقاەۆ مەملەكەتتىك اپپاراتتىڭ شەشىمدى باياۋ قابىلدايتىنىن ايتىپ ءوتتى. «بۇلاي جۇمىس ىستەۋگە بولمايدى. رەفورمالاردى جۇزەگە اسىرۋ كەرەك. پرەزيدەنت شەنەۋنىكتەردى دۇرىس ءارى جىلدام جۇمىس ىستەۋگە ماجبۇرلەپ، باقىلاۋشى رەتىندە جۇرە المايدى. پرەمەر-مينيستر دە مۇنداي قارقىنمەن جۇمىس ىستەمەۋى قاجەت. ونىڭ الدىندا مۇلدە باسقا مىندەتتەر تۇر. سول سەبەپتى مەملەكەتتىك اپپارات ءوز جۇمىسىن ءتيىمدى ءارى جەدەل اتقارىپ وتىرۋى كەرەك»، – دەدى مەملەكەت باسشىسى.

“The Qazaq Times”