«اسقار مامين قازاق ءتىلىن ەلەمەي مە؟» (فوتو)

بۇگىن مەملەكەت باسشىسى قاسىم-جومارت توقاەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى وتكەنىن حابارلادىق. ۇكىمەت باستىعى وقىعان قورىتىندى بايانداما مەن تانىستىرعان پرەزەنتاتسياسىنىڭ ءتىلى كوپتىڭ كوڭىلىن كۇپتى ەتتى.

اسقار ءماميننىڭ پرەزيدەنتتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا سويلەگەن ءسوزىنىڭ 82,4%-ى  ورىسشا، 17,6%-ى  قازاقشا. ۇكىمەت باسشىسىنىڭ سايتىندا جاريالانعان بايانداما 2323 سوزدەن تۇرادى، ونىڭ تەك 410 ءسوزى عانا مەملەكەتتىك تىلدە. قازاقستان رەسپۋبليكاسىنىڭ ۇكىمەت جەتەكشىسىنىڭ قازاق تىلىنە قاتىستى كوزقاراسى كەز كەلگەن ءتىل جاناشىرىن ويلاندىرارى انىق. پرەمەردىڭ سلايد-پرەزەنتاتسياسى دا ورىس تىلىندە بەرىلگەن.

بۇل ماسەلە تەك پرەمەر-ءمينيستردىڭ عانا باسىندا ەمەس. كوپتەگەن شەنەۋنىكتەردەن باستاپ پرەزيدەنتتە دە بار «ەرەكشەلىك». وتكەن اپتادا قاسىم-جومارت توقاەۆ «300 اقوردالىق» كادردىڭ تۇساۋكەسەرىندە ەل جاستارىنا ۇندەۋ جاساعانى ەسىمىزدە. وندا اقوردا جاريالاعان 2564 سوزدەن تۇراتىن پرەزيدەنت ۇندەۋىنىڭ 1736-سى – ورىسشا، 828-ءى عانا قازاق تىلىندە بولعان ەدى. ياعني مەملەكەت باسشىسىنىڭ سپيچرايتەرى ءماتىننىڭ 67,7%-ىن ورىس تىلىندە دايىنداعان. بۇل ءبىرىنشى رەت ەمەس. جەلتوقساندا ۇلتتىق سەنىم كەڭەسىنىڭ ەكىنشى وتىرىسىنداعى باياندامانىڭ (3851 ءسوز) دا تەك 1288 ءسوزى (33,4%) عانا قازاق تىلىندە وقىلدى. بۇعان دەيىن قىركۇيەكتىڭ 2-ءسى توقاەۆ «قازاقستان حالقىنا جولداۋىنىڭ» تەك 25%-ى عانا مەملەكەتتىك تىلدە جازىلعان ەدى. ونداعى 5960 ءسوزدىڭ 1497-ءسى قازاق تىلىندە، ال 4463 ءسوزى ورىس تىلىندە. 75%-ى ورىس تىلىندە جاسالعان جولداۋ قازاقستان حالقىنا ارنالدى. سونداي-اق 16 تامىزداعى ءداستۇرلى تامىز كەڭەسىندە ايتىلعان «توسىن باياندامانىڭ»  29,4%-ى عانا مەملەكەتتىك تىلدە بولدى. توقاەۆتىڭ تاۋەلسىزدىك سارايىندا وقىعان كولەمدى مالىمدەمەسىندەگى 2414 ءسوزدىڭ 711-ءى عانا قازاق تىلىندە. 3/1-ىنە دە جەتپەيتىن بولىگى عانا مەملەكەتتىك تىلدە جاريالاندى.

پرەمەر-مينيستر تانىستىرعان باياندامانىڭ نەگىزگى ءبولىمى مەن پرەزەنتاتسيا ورىس تىلىندە جاسالعان:

“The Qazaq Times”