جاڭاوزەن جىگىتتەرى مۇناي كاسىپورىندارىنان قوسىمشا جۇمىس ورنىن اشۋدى سۇرادى. 20 قاڭتار 2019 جىل. فوتو: اشىق دەرەككوز

20 قاڭتار جاڭاوزەن قالاسىنىڭ جۇرتى جەرگىلىكتى اكىمدىك الدىنا جينالىپ، تۇرعىنداردى تۇراقتى جۇمىس ورىندارىمەن قامتاماسىز ەتۋدى تالاپ ەتتى. 200-گە جۋىق ازامات ايماقتاعى ماماندانعان سالا مۇناي كاسىپورىندارىنا جاڭا ۆاكانسيا اشۋىن سۇرايدى.

– ءبىز مۇندا تۇراقتى جۇمىستىڭ جوقتىعىنان جينالدىق. بارلىعى قىمباتتاپ جاتىر: ازىق-تۇلىك، گاز... ءبارى قىمبات. جاڭاوزەن جۇمىسسىزدىق بويىنشا ءبىرىنشى ورىندا. جوعارى جاقتان شەشپەسە، بولمايدى. كۇننەن-كۇنگە ۋشىعىپ بارادى. حالىقتىڭ جاعدايى ءماز ەمەس. بىزگە تۇراقتى جۇمىس كەرەك، – دەيدى نارازىلار.

نارازىلاردىڭ ءبىرى نۇرسۇلتان نۇرىموۆ ازاتتىققا بەرگەن كومەنتاريىندە:

– بۇل – تۇرعىندار جۇمىس تالاپ ەتكەن بيىلعى العاشقى جيىن. بىلتىر جاڭاوزەن تۇرعىندارى تۇراقتى جۇمىسقا تۇرعىزۋعا كومەكتەسۋدى سۇراپ، اكىمدىككە بىرنەشە رەت بارعان، بىراق ناتيجەسىز اياقتالعان. ...سوڭىنا دەيىن بارامىز. 2019 جىلى دا وسىنداي ۋادەلەر بەرىلگەن، بىراق ودان ماسەلە شەشىلمەدى. تاعى دا جينالامىز، تالاپ ەتە بەرەمىز، – دەيدى.

ونىڭ ايتۋىنشا، اكىم ورىنباسارى نارازى كوپشىلىكتى قابىلداپ، ماسەلەنى ءبىر اي كولەمىندە قاراستىراتىنىن مالىمدەگەن. دەگەنمەن جينالعاندار شەنەۋنىك سوزىنە كوڭىلى تولماي، تالابى جۇزەگە اسقانشا جينالا بەرەتىنىن جەتكىزگەن. ال جەرگىلىكتى بيلىك بۇعان «قازىر قالادا مۇناي كاسىپورىندارىندا بوس ورىن جوق، بىراق جۇمىسسىز تۇرعىنداردى مەملەكەتتىك مەكەمەلەر مەن سەرۆيس كاسىپورىندارىنا تۇرعىزۋعا تىرىساتىنىن» حابارلاعان.

قولجەتىمدى اقپاراتتارعا قاراعاندا، جاڭاوزەن قالاسى مەن ىرگەلەس ءبىردى-ەكىلى ەلدى مەكەندەردى قوسا ەسەپتەگەندە، وڭىردە 151 مىڭعا جۋىق ادام تۇرادى.

ەلدىڭ ەڭ رەاكتسياشىل ايماعى مۇنايلى ولكە بولعانىنا قاراماستان، تۇرعىنداردىڭ الەۋمەتتىك جاعدايى مەن جۇمىسسىزدىق ماسەلەسى شەشىم تابار ەمەس. بىلتىر جىل باسىندا دا جاڭاوزەندىك جاستار پرەزيدەنتكە دەيىن ۇندەۋ جولداپ، جۇمىس ورىندارىن اشۋدى سۇراعان. ون شاقتى رەت تالاپ جيىنىن وتكىزگەن. كەيىننەن نارازىلاردىڭ ەرەكشە كوزگە تۇسكەن بەلسەندىسى جۋىردا عانا وتباسى قۇرعان، تۇرمىسى مۇشكىل ەرجان ەلشىباەۆتى بىلتىر قازاندا سوت «بۇزاقىلىق» جانە «جاراقاتتاۋ» ايىبىمەن 5 جىل باس بوستاندىعىنان ايىردى. ال قۇقىق قورعاۋشىلار ونى ساياسي تۇتقىن قاتارىنا ەنگىزگەن. قازاقستاندا ادەتتە قاندايدا ءبىر قارسىلىق اكتسيانىڭ بەلسەندىلەرى ارتىنشا ءارتۇرلى ايىپتارمەن سوتتا ءجيى جاۋاپقا تارتىلىپ جاتادى.

"The Qazaq Times"