پرەزيدەنت توقاەۆ تاعى ءبىر موراتوري جاريالاماق

قازاقستان پرەزيدەنتى «ب» كورپۋسىنىڭ مەملەكەتتىك لاۋازىمدارىنا جۇمىسقا ورنالاسۋعا موراتوري جاريالاۋى مۇمكىن.

«اشىق نقا» سايتىندا جاريالانعان جارلىقتا: «ب» كورپۋسىنىڭ بوس مەملەكەتتىك اكىمشىلىك لاۋازىمدارىنا ورنالاسۋعا جالپى كونكۋرستاردى جاريالاۋعا 2021 جىلعى 1 قاڭتارعا دەيىن موراتوري ەنگىزىلسىن»، – دەلىنگەن.

ەڭبەك زاڭناماسىنا سايكەس مەملەكەتتىك بيۋدجەت قاراجاتى ەسەبىنەن ۇستالاتىن مەملەكەتتىك قىزمەتشىلەردىڭ شتات سانىن 2020 جىلدىڭ 1 ساۋىرىنەن باستاپ 5 پايىزعا قىسقارتۋ ۇسىنىلىپ وتىر. بۇل قۇجات 27 قاڭتارعا دەيىن قوعامدىق تالقىلاۋعا ۇسىنىلادى.

موراتوري ەنگىزىلمەيتىن ورگاندار قاتارىندا ادام قۇقىقتارى جونىندەگى ۇلتتىق ورتالىق; اۋىلدىق وكرۋگتەر اكىمدەرىنىڭ اپپاراتتارى; جوعارى سوت كەڭەسى; كونستيتۋتسيالىق كەڭەس; قورعانىس مينيسترلىگى; پارلامەنت پالاتالارىنىڭ اپپاراتتارى; پرەزيدەنت اكىمشىلىگى; پرەزيدەنتتىڭ ءىس باسقارماسى; پرەمەر-ءمينيستردىڭ كەڭسەسى; تۇڭعىش پرەزيدەنت – ەلباسىنىڭ كەڭسەسى; تۇڭعىش پرەزيدەنتتىڭ مۇراعاتى; ورتالىق سايلاۋ كوميسسياسى بار.

ايتا كەتەيىك، وسىعان دەيىن پرەزيدەنت قاسىم-جومارت توقاەۆ 2020 جىلدىڭ 1 قاڭتارىنان باستاپ 2023 جىلدىڭ 1 قاڭتارىنا دەيىن شاعىن كاسىپكەرلىك سۋبەكتىلەرىن تەكسەرۋگە موراتوري جاريالاعان بولاتىن. سونداي-اق 2020 جىلدىڭ 31 جەلتوقسانىنا دەيىن كۆازيمەملەكەتتىك سەكتور سۋبەكتىلەرىن قۇرۋعا موراتوري ەنگىزۋدى تاپسىردى.

"The Qazaq Times"