بولات باقاۋوۆ. فوتو: pavlodar.gov.kz

پرەزيدەنت قاسىم-جومارت توقاەۆتىڭ جارلىعىمەن «اتىشۋلى اكىم» بولات باقاۋوۆ پاۆلودار وبلىسىنىڭ اكىمى قىزمەتىنەن بوساتىلدى. بۇل تۋرالى اقوردانىڭ سايتىندا جاريالاندى.

بۇگىننەن باستاپ ابىلقايىر سقاقوۆ پاۆلودار وبلىسى اكىمىنىڭ قىزمەتىنە تاعايىندالدى.

وسىعان دەيىن قر ۇقك پاۆلودار وبلىسىنىڭ اكىمى بولات باقاۋوۆقا قاتىستى قىلمىستىق ءىس قوزعاعانىن حابارلاعان بولاتىن. باقاۋوۆ قىلمىستىق كودەكستىڭ 362-بابى 4-بولىگى 3-تارماعى بويىنشا قىلمىس جاسادى دەگەن ايىپپەن كۇدىككە ءىلىنىپ وتىر. اتالمىش باپتار وزىنە جانە وزگە ازاماتتار مەن ۇيىم ءۇشىن پايدا تابۋ ماقساتىندا قىزمەتتىك وكىلەتتىگىن اسىرا پايدالانۋ دەگەندى بىلدىرەدى. مۇنداي قىلمىس جاساعانى ءۇشىن مال-مۇلكى تاركىلەنىپ، 5-تەن 10 جىلعا دەيىن سوتتالادى جانە قانداي دا ءبىر لاۋازىمدى اتقارۋعا تىيىم سالىنادى.

سوت پروتسەسى كەزىندە باقاۋوۆ ءىسى تۋرالى ەگجەي-تەگجەيلى باياندالدى. مەملەكەتتىك ايىپتاۋدىڭ ايتۋىنشا، 2019 جىلدىڭ جەلتوقسانىندا وبلىس اكىمىنە جشس-ءنى تەكسەرۋ كەزىندە سالىقتىق زاڭنامالاردىڭ بۇزىلعانى انىقتالىپ، 200 ميلليون تەڭگەدەن اسا سالىقتىڭ الىنۋى مەن سالىق تولەۋدەن ماقساتتى تۇردە بۇلتارعانىنا قاتىستى سوتقا دەيىنگى تەرگەۋدىڭ باستالعانى تۋرالى اقپارات جەتەدى.

«بولات باقاۋوۆ «AksuTransLogistic» جشس-ءنىڭ يەسى بولىپ تابىلاتىن ءوز تۋىسىنىڭ مۇددەسى ءۇشىن، ياعني، باسقا جەكە تۇلعانىڭ پايداسى ءۇشىن بىرنەشە مارتە زاڭسىز تۇردە وزىنە بەرىلگەن قۇقىق پەن قۇزىرەتتى اسىرا پايدالانىپ، پاۆلودار وبلىستىق مكد-ءنىڭ جاۋاپتى تۇلعالارىنان شىنايى قورىتىندىنى جاسىرىپ، ارتىق الىنعان سومانى 3-5 ميلليون تەڭگەگە دەيىن ازايتىپ كورسەتۋدى تالاپ ەتكەن»، – دەدى مەملەكەتتىك ايىپتاۋشى.

"The Qazaq Times"