فرانتسيادا شەرۋشىلەر پرەزيدەنتكە شابۋىل جاساماق بولدى

فرانتسيادا شەرۋشىلەر پرەزيدەنت ەممانۋەل ماكرونعا شابۋىل جاساماق بولعان، – دەپ حابارلايدى ۆۆس.

ماكرون پاريجدەگى «بۋف-ديۋ-نور» تەاترىنا ايەلىمەن بىرگە بارىپ، قويىلىمدى كورىپ وتىرعاندا شەرۋشىلەر عيماراتقا لاپ قويعان. بىراق مەملەكەت باسشىسىنىڭ كۇزەتشىلەرى مەن ءتارتىپ ساقشىلارى شۇعىل قيمىلداپ، پرەزيدەنتتى قۇتقارىپ قالدى.

فرانتسيادا زەينەتاقى رەفورماسىنا قارسى نارازىلىق شەرۋلەرى بىلتىردان بەرى جالعاسىپ كەلەدى. جەلتوقساندا مۇعالىمدەر، قوعامدىق كولىك جۇرگىزۋشىلەرى، پوليتسەيلەر، سوت قىزمەتكەرلەرى، مەديتسينا قىزمەتكەرلەرى، اۆياديسپەتچەرلەر جانە باسقا دا كوپتەگەن ماماندىق وكىلدەرى جاپپاي ەرەۋىلگە شىققان. سالدارىنان كوپتەگەن مەكتەپتەردە وقۋ توقتاتىلىپ، كولىك قاتىناسى بۇزىلدى.

نەگىزىنەن فرانتسيادا ونداعان زەينەتاقى باعدارلامالارى بار. بۇل باعدارلامالار مەملەكەتكە وراسان شىعىن اكەلەتىنىن ايتقان ماكرون، بىرىڭعاي زەينەتاقى رەفورماسىن ۇسىنىپ وتىر. پرەزيدەنتتىڭ جوسپارى بويىنشا ءار جۇمىس ىستەگەن كۇنگە ارنايى بالل جۇيەسى ەنگىزىلەدى جانە زەينەتاقىنىڭ مولشەرى جيناقتالعان ۇپايلار نەگىزىندە ەسەپتەلەدى.

سوڭعى ون جىلدا فرانتسياداعى زەينەت جاسى 60-تان 62-گە دەيىن ءوستى. دەگەنمەن، بۇل دامىعان ەلدەر اراسىنداعى ەڭ تومەن كورسەتكىشتەردىڭ ءبىرى سانالادى. ۇلىبريتانيادا زەينەت جاسى – 66 جىل.

ۇسىنىلىپ وتىرعان ماكرو-رەفورما زەينەتاقى جاسىن ودان ءارى ارتتىرۋى مۇمكىن. تولىق زەينەتاقى الۋ ءۇشىن فرانتسۋزدارعا 64 جاسقا دەيىن جۇمىس ىستەۋگە تۋرا كەلەدى.

1995 جىلى فرانتسيادا ورىن العان ەڭ ءرى ەرەۋىل دە زەينەتاقى رەفورماسىنا قارسى وتكەن بولاتىن. ەرەۋىل سالدارىنان ەلدەگى ترانسپورت جۇيەسىندە ءۇش اپتالىق كوللاپس ورىن العان.

"The Qazaq Times"