اقش پرەزيدەنتى دونالد ترامپ. فوتو: اشىق دەرەككوز

اقش كونگرەسىنىڭ جوعارعى پالاتاسى دونالد ترامپقا قاتىستى يمپيچمەنت پروتسەسىن رەسمي تۇردە قاراستىرۋدى باستادى.

Reuters اگەنتتىگىنىڭ حابارلاۋىنشا، يمپيچمەنتكە قاتىستى العاشقى وتىرىس 21 قاڭتاردا سەناتورلار وتكىزەدى. سەنات ترامپقا تاعىلعان ايىپتاردىڭ ناقتى باپتارىن جاريالاعان. وعان سايكەس اق ءۇي باسشىسىنا ءوز لاۋازىمىن اسىرا پايدالاندى جانە كونگرەستىڭ تەرگەۋ جۇمىسىنا كەدەرگى جاسادى دەگەن ايىپ تاعىلدى.

وتكەن اپتادا ترامپقا قارسى يمپيچمەنت سەناتتا داۋىسقا سالىنىپ، بەكىتىلگەن بولاتىن. وكىلدەر پالاتاسى پرەزيدەنت ترامپتى ايىپتايتىن كونگرەسمەندەردىڭ قۇرامىن دا بەكىتتى.

بىلتىر شىلدەدەن باستاپ اقش پرەزيدەنتىنە قارسى يمپيچمەنت جاريالاۋ تۋرالى ماسەلەلەر قارالىپ كەلەدى. وندا ترامپ ۋكراينانىڭ جاڭا سايلانعان پرەزيدەنتى ۆلاديمير زەلەنسكيمەن تەلەفون ارقىلى سويلەسكەن كەزدە جو بايدەننىڭ ۇلى حانتەر بايدەننىڭ ۇستىنەن جەمقورلىق ايىبى بويىنشا ءىس قوزعاۋدى تالاپ ەتىپ، ەگەر زەلەنسكي ۇكىمەتى بۇلاي جاساماسا ۋكرايناعا بەرىلەتىن 400 ملن دوللار قۇنىنا يە اسكەري كومەكتى كەشىكتىرەتىنىن ايتقان. ترامپتىڭ بۇل ارەكەتى «قىزمەت مۇمكىندىگىن پايدالانىپ، ۋكرايناعا قىسىم ءتۇسىردى» دەپ ايىپتالعان بولاتىن.

ەگەر وسى ارەكەتى تولىق دالەلدەنسە، وندا اقش پرەزيدەنتىن قىزمەتىنەن قالدىرۋعا تولىق نەگىز بار. سەبەبى، ول ۋكراينادان ايىپتاۋدى تالاپ ەتكەن بايدەن دەموكراتيالىق پارتيانىڭ ۇمىتكەرى جو بايدەننىڭ ۇلى. ترامپ ءوز ارەكەتى ارقىلى قارسىلاسىنىڭ بەدەلىن ءتۇسىرۋدى ماقسات ەتكەن دەگەن بولجامدار دا بار. بىراق، پرەزيدەنت ترامپ ءوز كەزەگىندە اكەلى-بالالى بايدەندەردى زاڭسىز ارەكەتتەرمەن ايىپتاعان. ترامپ بايدەندى قىزمەت مۇمكىندىگىنەن اسىرا پايدالانىپ، ۋكراينا قاۋىپسىزدىك قىزمەتكەرلەرىنە قىسىم ءتۇسىرىپ، ۇلىنا قارسى قىلمىستىق ءىستى كۇشپەن جاپتىرعان دەگەن ايىبىن تاعىپ وتىر.

"The Qazaq Times"