ينگا يمانباي «جاس الاش»-تىڭ جاڭا سانىن شىعاردى

بۇگىن، جاقىندا عانا باس رەداكتورى اۋىسقان «جاس الاش» گازەتىنىڭ رەداكتسياسىنا بارىپ جاڭا باسشىنى ينگا يمانباي قارىنداسىمىزدى قۇتتىقتاپ، الداعى جۇمىسىنا ساتتىلىك تىلەپ قايتتىق. گازەتتىڭ جاڭا سانىن قولىمىزعا الىپ، «جاس الاشتىڭ» «جورعاسىنان جاڭىلماعانىن» بىلگەندەي بولدىق.
«گازەت – حالىقتىڭ كوزى، قۇلاعى ءھام ءتىلى» دەيدى ۇلى احاڭ. احمەت بايتۇرسىنۇلىنىڭ وسى ءسوزىن تولىقتاي دالەلدەي الاتىن ەلىمىزدەگى ساناۋلى باسىلىمنىڭ ءبىر جانە بىرەگەيى «جاس الاش» ءجۇز جىلعا تارتا تاريحىندا ءبىراز دۇنيەنى قاۋزاپتى. كەشەگى كەڭەستىك زامانداعى قىزىل ۇكىمەتتىڭ جۇرگىزەتىن قۇرال بولا تۇرىپ قازاق جۋرناليستيكاسىندا سونى ءبىر مەكتەپ قالىپتاستىرا ءبىلدى. ارىسى احمەت بايتۇرسىنۇلى، بەيىمبەت مايلين، سىماعۇل سادۋاقاسوۆ، ساكەن سەيفۋللين، ءىلياس جانسۇگىروۆ، جۇسىپبەك ايماۋتوۆ، مۇحتار اۋەزوۆتاردان باستاۋ العان باسىلىم، وتكەن عاسىردىڭ ورتاسىنان اۋا بۇگىندە ەلىمىزدەگى «شەرحاننىڭ شەكپەنىنەن شىققان» شىققان ۇلكەن ءبىر جۋرناليستەر قوسىنىن جاساقتادى.
ەگەمەندىك العاننان باستاپ قازاقتىڭ قام-قايعىسىن قال قادىرىنشە جەتكىزىپ كەلە جاتقان باسىلىم جاڭا عاسىردىڭ تابالدىرىعىن اتتاي سالا ازاماتتىق قوعام مەن تاۋەلسىز جۋرناليستيكانىڭ قالىپتاسۋىنا ەڭبەك ەتكەن قازاق ءتىلدى باسىلىمداردىڭ كوشىن باستادى.
اتالمىش گازەتتىڭ باسىندا بۇرىندارى ءمۇيىزى قاراعايداي دەپ اتالاتىن اتاۋلى تۇلعالار باسقارسا، بەلگىلى قاعام قايراتكەرى، ءجۇرناليست رىسبەك سارسەنبايۇلىنان كەيىن گازەت باسشىلىعى جاستاردىڭ قولىنا ءوتىپ ارىپتەسىمىز رۋسلان ەربوتا كەلدى. ەلىمىزدەگى تاۋەلسىز باسىلىمدارعا دەگەن قيدالانىپ تۇراتىن قيىن كەزەڭدە گازەتتىڭ بار تيراجىن جوعالتپاي ونىڭ جانىنا دەربەس ينتەرنەت باسىلىمىن، تاۋەلسىز وي اتاي الاتىن جۋرناليستەر قوسىنىن قالىپتاستىردى. رۋسلانعا بۇگىنگىدەي قيىن كەزەڭدە «جاس الاشتاي» ەل شىندىعىن اشىق ايتا الاتىن باسىلىمنىڭ وشاعىن وشىرمەي حال قادىرىنشە مازداتىپ كەتكەنىنە ريزاشىلىعىمىزدى بىلدىرە وتىرىپ، جاڭا كەلىپ جاتقان ينگا يمانبايعا ساتتىك تىلەيمىز.
«جاس الاشتىڭ» جاڭا سانىن شولىپ شىققانىمىزدا:
اۋەلدە ينگا يمانبايدىڭ «دينارا قۇلىباەۆاعا – 5 ميلليارد دوللار، كوپ بالالى انالارعا – 11 مىڭ تەڭگە» اتتى حالىقتىڭ جوعىن جوقتاپ، بۇگىنگى الەۋمەتتىك جاعدايدى جەتكىزە جازعان ماقالاسىن وقىدىق. ودان ارى اسەل جاڭاباەۆانىڭ «ءسىز كىمسىز، ج مىرزا؟» اتتى ساراپتامالىق ماقالاسىندا وتكەن 30 جەلتوقسانداعى Bek Air-دىڭ اۆياكاتاستروفىنا، باسشىلىعىنا جانە بىزگە بەيمالىم ءبىراز تۇستارىنا ارناپ سارابدال ساراپتاما جاساپتى. گازەتتىڭ قاي بەتىن اشىپ، قاي باعانىنا كوز سالساڭىزدا قارا قازاقتىڭ قامى. گازەت  اينىماپتى. جاڭا باسشى دا الدىڭعىلاردىڭ انىق ھام اشىق جولىن ساقتاپتى.  باس قالادان باستاپ رەسپۋبليكانىڭ بار ايماعىنان اقپارت بەرگەن گازەتكە عۇمىر تىلەپ، جاڭا باسشىنىڭ العاشقى سانىنا ىرزالىقپەن ارى قارايعى ىستەرىنە ساتتىلىك، الداعى ۋاقىتتا دا ازاماتتىق قوعامنىڭ، تاۋەلسىز جۋرناليستيكانىڭ، تاۋەلسىز باسىلمنىڭ شىراقشىسى بولىپ قالا بەرۋىنە  تىلەكتەستىك ءبىلدىرىپ قايتتىق.

عاسىرلىق گازەتتىڭ تاريحى تامىرلانىپ، قايمانا قازاققا ەتەر قىزمەتى ارتا ءتۇسسىن!

"The Qazaq Times"