اقش يرانداعى رەجيمدى وزگەرتۋدى ماقسات ەتپەيدى، بىراق ەلدەگى جاعدايدى مۇقيات قاداعالاپ وتىرادى. بۇل تۋرالى اق ءۇي باسشىسى دونالد ترامپ ۆيسكونسيندەگى كەزدەسۋدە مالىمدەدى. تىكەلەي ترانسلياتسيانى امەريكالىق تەلەارنالار جۇرگىزدى.

ترامپ سوزىندە: «يراندىقتاردىڭ بارلىعى دەرلىك ەرەۋىلگە شىقتى. مۇنداي بۇرىن-سوڭدى بولماعان. ولار رەجيم قولدان جاساپ وتىرعان قۋعىن-سۇرگىنىنە نارازىلىق ءبىلدىرىپ، جارقىن بولاشاقتى، ۇلى ادامداردىڭ بيلىك ەتۋىن تالاپ ەتىپ وتىر. حالىق بيلىكتىڭ يران بايلىعىن توناپ، زورلىق-زومبىلىق جانە سوعىس جاساۋىنان شارشادى. مەن يران ۇكىمەتىنە نارازىلىق بىلدىرۋشىلەردى قۋعىنداماۋدى، ولتىرۋگە جول بەرمەۋ كەرەكتىگىن ەسكەرتەمىن. يراندى بۇكىل الەم باقىلاپ وتىر»، — دەدى.

ترامپتىڭ ايتۋىنشا، «مىڭداعان نارازىلىق بىلدىرۋشىلەر» قازىردىڭ وزىندە قۇربان بولعان. «ءبىز يران حالقىن جانە ولاردىڭ بوستاندىق ءۇشىن كۇرەسىن قولدايمىز. يران رەجيمىن وزگەرتۋدى ماقسات ەتپەيمىز»، — دەپ اياقتادى ءسوزىن.

بىلتىر 15 قاراشادا يراندا گاز باعاسىن ليترىنە 30 مىڭ ريالعا (شامامەن $0,2) دەيىن كوتەرۋ تۋرالى ۇكىمەت قاۋلىسى كۇشىنە ەندى. بۇل جانارماي قۇنىن ءۇش ەسەگە ارتتىرۋدى بىلدىرەدى. وسىدان كەيىن نارازىلىق اكتسيالارى بىرقاتار قالالاردا ءوتتى. دەمونسترانتتار بانكتەردىڭ كەڭسەلەرى مەن جانارماي قۇيۋ بەكەتتەرىن ورتەدى. وسى اپتادا تەھراندا يراننىڭ اۋە شابۋىلىنا قارسى قورعانىس جۇيەلەرى 8 قاڭتاردا ۋكراينالىق ۇشاقتى اتىپ جىبەرگەنىنەن كەيىن بىرقاتار نارازىلىق شەرۋلەرى ءوتتى.

"The Qazaq Times"