يران جوعارى سوتى ترامپقا قارسى شاعىم تۇسىرمەك

يران جوعارى سوتى اقش پرەزيدەنتى دونالد ترامپقا قارسى شاعىم ءتۇسىرىپ، ايىپ تاقپاق. بۇل تۋرالى «تاسنيم» اگەنتتىگى حابارلادى.

اگەنتتىك تاراتقان جاڭالىقتا يران جوعارى سوتىنىڭ ناقتى قاي ورگانعا شاعىم تۇسىرەتىنى ازىرگە بەلگىسىز دەلىنگەن.

اقش ءوز اسكەري بازالارىنا جاسالعان شابۋىلدان كەيىن 11 قاڭتاردا يرانعا قارسى جاڭا سانكتسيالار ەنگىزگەن بولاتىن. ەكونوميكالىق شەكتەۋلەر وندىرىستىك، توقىما، تاۋ-كەن جانە قۇرىش قۇيۋ سالالارىنا قارسى باعىتتالدى. وسى ۋاقىتقا دەيىن مەتاللۋرگيا سانكتسيالار سالىنباعان يراننىڭ سوڭعى ەكسپورتتىق سالاسى ەدى.

قاتاڭ قاۋلىعا ىلىككەندەر قاتارىندا يران ۇلتتىق قاۋىپسىزدىك كەڭەسىنىڭ حاتشىسى الي شامحاني، يران كارۋلى كۇشتەرى قولباسشىسىنىڭ ورىنباسارى رەزا اشتياني، يسلام رەۆوليۋتسياسى كورپۋسىنىڭ «باسيدج» جاساعىنىڭ باسشىسى گولەمرەزا سۇلەيماني بار. ۋاشينگتون قىتاي مەن سەيشەل ارالدارىندا ورنالاسقان 17 تاۋ-كەن جانە مەتالل كومپانياسىنا، مەتالل ساۋداسىمەن اينالىسقان كەمەگە دە سانكتسيا سالدى.

سانكتسيادان بولەك، اق ءۇي باسشىسى دونالد ترامپ يران رەجيمىنىڭ قوسىمشا تابىس كوزدەرىنە شەكتەۋ قويدى. بۇل شەكتەۋلەر يران ەكونوميكاسىنا وراسان زور شىعىن اكەلدى. اقش مالىمەتىنشە، يران ەكسپورتتان تۇسەتىن تابىستىڭ 80%-نان ايىرىلعان.

ەسكە سالا كەتەيىك، اقش-تىڭ باعداتتاعى ەلشىلىگى الدىندا 31 جەلتوقساندا نارازىلىق شاراسى بولىپ، شەرۋشىلەردىڭ الدى ەلشىلىك عيماراتىنا شابۋىلداعان. امەريكا بۇل نارازىلىقتىڭ ارتىندا يران تۇر دەپ ەسەپتەيدى. نارازىلىق اقش كۇشتەرىنىڭ يراكتاعى جانە سۇرياداعى شابۋىلىندا شيت مۇسىلماندارى قازا تاپقانى تۋرالى مالىمەت تاراعان سوڭ تۇتانعان ەدى.

"The Qazaq Times"