وسى اپتا تايۋاندا (تايۆان) قاۋىرت سايلاۋ دايىندىعى وتۋدە. بىراق، تايبەي (تايبەي) تارابى قىتايدىڭ الەۋمەتتىك مەديا ارقىلى سايلاۋ ناتيجەسىنە اسەر ەتۋىنەن الاڭداپ وتىر. تايۋاننىڭ بۇلاي الاڭداۋى نەگىزسسىز ەمەس. تايۋاننىڭ پرەزيدەنت سايلاۋى جاقىنداعان سايىن، قازىرگى پرەزيدەنت تساي يىڭۆىن حانىمدى ايىپتاعان ۆيدەو جولدامالار كوبەيىپ كەتكەن.

تايۋان پرەزيدەنت سايلاۋى تۋرالى ساياسي بولجامداردىڭ باسىم كوبى قازىرگى پرەزيدەنت تساي حانىمنىڭ جەڭىپ شىعۋى مۇمكىن دەپ كورسەتەدى. پرەزيدەنت تسايدىڭ تايۋان دەربەستىگى تۋرالى ۇستانىمى سايلاۋشىلار جاعىنان كوبىرەك قولداۋ تاۋىپ تۇر. ونسىز دا تساي يىڭۆىن بيلىگىن تۇسىندا تايۋاننىڭ دەربەستىككە كوبىرەك ۇمتىلعانى بىلايعى جۇرتقا بەلگىلى. وسىعان بايلانىستى، كوممۋنيستىك قىتاي بيلىگى تايۋانداعى دەموكراتيالىق سايلاۋ ناتيجەسىن بۇرمالاۋعا كۇش سالۋى دا مۇندا تۇر. سەبەبى، رەسمي بەيجىڭ تايۋاندى ءوزىنىڭ ءبىر پروۆينتسياسى رەتىندە كورسەتەدى جانە شەت مەملەكەتتەردىڭ تايۋانمەن تىكەلەي ديپلوماتيالىق قارىم-قاتىناس ورناتۋىنا قارسى.

جاقىندا YouTube جەلىسىندە پرەزيدەنت تسايدى ايىپتاعان ۆيدەو جازبالار كوبەيگەن. سونىڭ قاتارىندا ءبىر بلوگەر تايۋان اكتسەنتىندەگى قىتاي تىلىندە تساي يىڭۆىندى ساتقىن رەتىندە ايىپتايدى. ول «تايۋان سىندى سۇيىكتى جەرىمىزدى اقش پەن جاپونياعا ساتىپ جىبەردى» دەپ ايىپتاپ، ونى «ساياسي قۋىرشاق» دەپ كورسەتەدى. بلوگەر ءوزىن كوممۋنيستىك پارتيامەن ەش قاتىسى جوق، تايۋاندىق پاتريوت رەتىندە كورسەتۋگە تىرىسادى. الايدا، بۇنداي ۇندەۋلەردىڭ كوبەيىپ كەتۋى كۇمان تۋعىزباي قويمايدى. ونسىز دا كوممۋنيستىك قىتاي بيلىگىنىڭ ميلليونداعان بلوگەرلەردى جالداپ ەل ىشىندەگى جانە شەتەلدەگى الەۋمەتتىك پىكىرگە ىقپال ەتۋگە كۇش سالاتىن ارەكەتتەرى بۇعان دەيىن دە بەلگىلى.

تايۋان پرەزيدەنت جۋرناليستەرگە جاساعان مالىمدەمەسىندە بەيجىڭ بيلىگىنىڭ تايۋانداعى سايلاۋعا ارالاسىپ وتىرعانىن ايىپتادى جانە قىتاي بيلىگىنىڭ تايۋان تۋرالى ۇستانىمىن تاعى ءبىر رەت سىنعا الدى. كەشە اقش مەم. دەپارتامەنتى وتكىزگەن بريفينگتە دە تايۋاننىڭ پرەزيدەنت سايلاۋى تۋرالى ءسوز بولدى. وندا اقش تارابى ناتيجەسىنىڭ قالاي بولعانىنا قاراماستان تايۋاننىڭ دەموكراتيالىق سايلاۋىنىڭ ءادىل ءارى اشىق ءوتۋىن قاداعالايتىنىن، دەموكراتيالىق تاڭداۋعا قولداۋ كورسەتەتىنىن جەتكىزگەن.

“The Qazaq Times”