قازاقستان پرەزيدەنتى قاسىم-جومارت توقاەۆ. فوتو: اقوردا

پرەزيدەنت قاسىم-جومارت توقاەۆ پارسى شىعاناعىنداعى احۋالعا بايلانىستى كەڭەس وتكىزدى. بۇل تۋرالى اقوردانىڭ ءباسپاسوز قىزمەتى حابارلادى.

جيىنعا پرەزيدەنت اكىمشىلىگى باسشىلىعى، پرەمەر-ءمينيستردىڭ ورىنباسارى، قاۋىپسىزدىك كەڭەسى حاتشىسى، ۇلتتىق قاۋىپسىزدىك كوميتەتى توراعاسى، سىرتقى ىستەر ءمينيسترى، قورعانىس ءمينيسترى، ىشكى ىستەر ءمينيسترى جانە قارۋلى كۇشتەر باس شتابى باستىعى قاتىستى. كەڭەستە سىرتقى ىستەر ءمينيسترى مۇحتار تىلەۋبەردى مەن باسقا دا ۆەدومستۆو باسشىلارى تاياۋ شىعىستاعى قازىرگى احۋال تۋرالى باياندادى.

ەل پرەزيدەنتى پارسى شىعاناعى ايماعىنداعى احۋالدىڭ كۇرت شيەلەنىسۋىنە الاڭداۋشىلىق ءبىلدىرىپ، اتالعان ءىس-قيمىلدارعا قاتىسۋشى تاراپتاردىڭ بارىنشا ۇستامدىلىق تانىتۋى قاجەتتىگىن ايتىپ، قاقتىعىستاردى ديپلوماتيالىق ءادىس-تاسىلدەرمەن، ەڭ الدىمەن، بۇل ىسكە بۇۇ ارالاستىرا وتىرىپ، سونداي-اق ەكىجاقتى بايلانىستار مەن كەلىسسوزدەر ارقىلى رەتتەۋ مۇمكىن ەكەنىن اتاپ ءوتتى.

كەڭەس قورىتىندىسى بويىنشا قازاقستاننىڭ تاياۋ شىعىستاعى ەلشىلىكتەرى مەن ونداعى قىزمەتكەرلەردىڭ قاۋىپسىزدىگىن قامتاماسىز ەتۋدى، ەلىمىزدەگى شەتەلدىك ديپلوماتيالىق وكىلدىكتەر مەن كومپانيالار كەڭسەلەرىنىڭ قاۋىپسىزدىگىن ساقتاۋ ءۇشىن شارالار قابىلداۋدى، مەملەكەتىمىزدىڭ ۇلتتىق مۇددەسىنە قاتىستى ماڭىزدى اقپاراتتاردى الۋ جانە تالداۋ جۇمىستارىن كۇشەيتۋدى تاپسىردى. حالىقارالىق احۋالدىڭ شيەلەنىسۋى جاعدايىندا قازاقستاننىڭ الەۋمەتتىك-ەكونوميكالىق دامۋ جانە قورعانىس الەۋەتىن كۇشەيتۋ ماسەلەلەرىنە ەرەكشە كوڭىل بولىنەدى.

ەسكە سالا كەتەيىك، يسلام رەۆوليۋتسياسى ساقشىلار كورپۋسىنىڭ «قۇدس كۇشتەرى» ارنايى جاساعىنىڭ قولباسشىسى سۇلەيماني 3 قاڭتاردا باعداتتاعى اقش-تىڭ اۋە شابۋىلى كەزىندە مەرت بولعان. ونى ولتىرۋگە اقش پرەزيدەنتى دونالد ترامپ بۇيرىق بەرگەن. «قۇدس كۇشتەرى» يراننىڭ سىرتتاعى اسكەري وپەراتسيالارىنا قاتىسقان. بۇعان دەيىن اقش-تان «كەك الاتىنىن» مالىمدەگەن يران 8 قاڭتاردا اقش-تىڭ يراكتاعى بىرقاتار نىساندارىنزىمىرانمەن اتقىلادى. قازىرگى ۋاقىتتا ەكى ەل بايلانىسى ۋشىعىپ تۇر.

"The Qazaq Times"