تۇركيا شەكاراسىنا 200-250 مىڭ ميگرانت كەلە جاتىر، — دەپ حابارلايدى «انادولى» اگەنتتىگى.

ءسۇريانىڭ سولتۇستىك اۋداندارىنداعى جاعداي تۋرالى پىكىر بىلدىرە كەلە تۇركيا پرەزيدەنتى رەجەپ تايىپ ەردوعان وسىلاي ءمالىم ەتتى. تۇركيا باسشىسىنىڭ ايتۋىنا قاراعاندا، كوش تىزگىنىن توقتاتۋ ءۇشىن قاجەتتى شارالار قولعا الىنۋدا. الايدا بۇل ادام ومىرىنە قاتىستى ءىس بولعاندىقتان، كوشتى توقتاتۋ وڭاي شارۋا ەمەس. تۇركيا قازىردىڭ وزىندە بەس ميلليونعا تارتا بوسقىننىڭ ۇيىنە اينالعان. تۇركيا باسشىسى ولاردىڭ ءتورت ميلليونى سۇريالىقتار ەكەنىن ەسكە سالدى.

قازىرگى ۋاقىتتا تۇركيادا ازاماتتىق سوعىستان قاشقان 3,6 ميلليون سۇريالىق بوسقىن بار. ۆۆس مالىمەتىنشە، تۇركيا «تەررورلىق ۇيىم» رەتىندە تانىعان كۇردتەر قوسىنى تۇرىك اسكەرلەرىن شەكارادان وتكىزگىسى كەلمەيدى. سول سەبەپتى تاراپتار اراسىندا قاقتىعىستار ءجيى ورىن الىپ وتىر.

ءسۇريا ۇكىمەتى رەسەي اۆياتسياسىنىڭ قولداۋىمەن يدليبتە كوتەرىلىسشىلەرمەن سوعىس باستاعان. تۇرىك بيلىگى ءسۇريانىڭ سولتۇستىك-باتىس پروۆينتسياسىنداعى اۋىر شايقاس تۇركياعا بوسقىنداردىڭ جاڭا لەگىن اكەلەدى دەپ قاۋىپتەنۋدە. وسىعان بايلانىستى، بوسقىندار مەن بەيبىت تۇرعىنداردىڭ سۇرياداعى قاۋىپسىزدىگىن قامتاماسىز ەتۋگە قولداۋ كورسەتەتىن بىردەن-ءبىر مەملەكەت اقش بولعاندىقتان، تۇركيا اتالعان ماسەلەنى امەريكالىق اسكەرلەرمەن بىرلەسە شەشپەك. العاشقى قادام قىركۇيەكتىڭ سوڭىنا جوسپارلانىپ وتىر، دەيدى ەردوعان.

2016 جىلى ەۋروپالىق وداق پەن تۇركيا ورتاق شەشىمگە كەلگەن. ارنايى كەلىسسوزگە سايكەس، انكارا ميگرانتتاردىڭ ەۋروپا ەلدەرىنە قونىس اۋدارماۋىن قاتاڭ قاداعالاسا، ەو تۇركياعا 6 ملرد ەۋرو كولەمىندە قارجى بەرۋى ءتيىس بولاتىن. كەيىننەن ەردوعان وداق تاراپىنان تەك 3 ملرد ەۋرونىڭ بولىنگەنىن مالىمدەدى.

"The Qazaq Times"