دەرەكتەر حرونيكاسى: الماتىداعى ۇشاق اپاتىنىڭ جاي-جاپسارى

بۇگىن  تاڭەرتەڭ ساعات 7:22-دە Bek Air ۇشاعى الماتى اۋەجايىنان ءبىر شاقىرىم قاشىقتىقتا تالعار اۋدانىنا قاراستى گۇلدالا اۋىلىنداعى يەسىز ەكى قاباتتى ۇيگە قۇلاعان. جالپى 15 جولاۋشى قازا تاپقان. 

• ساعات 9:28 شاماسىندا ازاماتتىق اۆياتسيا كوميتەتى ««قازىرگى ۋاقىتتا انىقتالعان قازا تاپقاندار سانى – 7 ادام. ۇكىمەت باسشىسىنىڭ تاپسىرماسى بويىنشا ۆيتسە-رەمەر باسقاراتىن ۇكىمەتتىك كوميسسيا قۇرىلدى. كوميسسيا قۇرامىنا ينۆەستيتسيالار جانە دامۋ مينيسترلىگىنىڭ جانە باسقا مەملەكەتتىك ورگانداردىڭ وكىلدەرى كىرەدى. كوميسسيا وقيعا ورنىنا بارادى. اپاتتىڭ ناقتى سەبەپتەرى انىقتالاتىن بولادى»،– دەگەن حابار تاراتتى.

Bek Air ۇشاعى ۇشۋ بارىسىندا تاۋعا قاراي بۇرىلعانى تۋرالى مالىمەت. فوتو: Telegram جەلىسى

• ۇشاق بورتىندا 95 جولاۋشى جانە 5 ەكيپاج مۇشەسى بولعانى تۋرالى اقپارات بەلگىلى بولدى.
• ساعات 9:41-دە رەسپۋبليكالىق توتەنشە جاعدايلار كوميتەتى «وسى ۋاقىتقا دەيىن ۇشاقتىڭ اپاتىنان 9 ادام قازا تاپتى, سونىمەن قوسا 9 ادام زارداپ شەككەن، ونىڭ 6-اۋى بالا» دەگەن اقپارات جاريالادى.

ۇشاق اپاتقا ۇشىراعان ماڭدا جاۋاپتى مەكەمەلەر جۇمىس ىستەپ جاتىر. 27 جەلتوقسان 2019 جىل. فوتو: الەۋمەتتىك جەلى

• ءدال سول ۋاقىتتا، 9:42 كەتكەندە مەملەكەت باسشىسى قاسىم-جومارت توقاەۆ ءوزىنىڭ تۋيتتەر پاراعىندا ۇشاق اپاتىنىنان قازا بولعانداردىڭ جاقىندارى مەن تۋىستارىنا كوڭىل ايتىپ، زارداپ شەككەندەرگە كومەكتەسۋگە ۋادە بەردى. سونداي-اق توتەنشە جاعدايدىڭ سەبەپ-سالدارى تولىق انىقتالىپ، جاۋاپتىلار قاتاڭ جازاعا تارتىلاتىنىن جازدى.

• 9:47 مينۋت وتكەندە الماتى قالالىق اكىمدىگى زارداپ شەككەندەر 4 قالالىق كلينيكالىق اۋرۋحانا مەن بالالارعا شۇعىل مەديتسينالىق كومەك كورسەتۋ ورتالىعىنا جىبەرىلگەنىن حابارلادى.
• 9:48 كەزى. Bek Air اۋە كومپانياسىنىڭ ۆەب-سايتىندا جانە الەۋمەتتىك جەلىلەردەگى اككاۋنتتارىندا اپات جانە ۇشاقتا بولعان جولاۋشىلار ءتىزىمى تۋرالى ءالى دە ەشبىر اقپارات  بەرىلمەدى.
• ازاماتتىق اۆياتسيا كوميتەتىنىڭ شەشىمىمەن ەرتەڭگىلىك 9:50-دە Fokker-100 مودەلەگى ۇشاقتاردىڭىڭ قازاقستانداعى رەيستەرى توقتاتىلدى.
• ساعات 10:21 شاماسىندا الماتى اكىمدىگى ءوزىنىڭ تەلەگرامم ارناسىندا Bek Air اۆياكومپانياسىنىڭ ۇشاعىنىڭ اپاتقا ۇشىراۋى سالدارىنان 14 ادامنىڭ قازا تاپقانى تۋرالى حابارلادى. ال ورتالىق كوممۋنيكاتسيالار قىزمەتىندە وتكەن بريفينگتە اكىمدىك وكىلى قازا تاپقاندار سانى 12 ادامعا دەيىن كوبەيگەنىن مالىمدەدى.

دەنساۋلىق ساقتاۋ ءمينيسترى ءبىرتانوۆتىڭ اتىنا جولدانعان اپات جونىندەگى اقپارات بەرىلگەن قۇجات الەۋمەتتىك جەلىدە تاراپ كەتتى. فوتو: Telegram جەلىسى

• توتەنشە جاعدايلار كوميتەتى ساعات 10:30 شاماسىندا اپاتتان كوز جۇمعان 7 ادامنىڭ ەسىمىن جاريالادى:

1. استانوۆ نيكولاي 1971 جىلى تۋعان
2. حايداروۆ ر.، 1940 ج.ت.
3. قاليەۆ باۋىرجان، 1974 ج.ت.
4. كارىباەۆ بازارحان، 1974 ج.ت.
5. مۋراتباەۆ مارات، 1961 ج.ت.
6. نۇرباەۆ اباي، 1982 ج.ت.
7. يسينا ا.

• 10:33 وتكەندە الماتى اكىمدىگىنىڭ حابارلاۋىنشا، جارالانعان 23 جولاۋشى قالالىق 4 اۋرۋحاناعا جەتكىزىلگەن. ونىڭ 8-ءى كامىلەت جاسىنا تولماعان بالالار مەن جاسوسپىرىمدەر. ءتورت اي جانە ءبىر جاستاعى ەكى بالانىڭ ەسىمدەرى ءالى بەلگىسىز. زارداپ شەگۋشىلەر سىنىق، كونتۋزيا، جابىق باس سۇيەك-مي جاراقاتتارى ءارتۇرلى جاعدايىندا قابىلدانعان.

الەۋمەتتىك جەلىدە تاراعان زارداپ شەككەندەر ءتىزمى. فوتو: Telegram جەلىسى

• 10:45-تە ءىىم تاراتقان دەرەك بويىنشا، وقيعا ورنىندا قۇتقارۋ جۇمىستارىنا 976 ادام مەن 70 تەحنيكا قۇرالى، 33 جەدەل جاردەم بريگاداسى جۇمىلدىرىلعان.
• كۇندىز 10:58-دە زارداپ شەگۋشىلەردىڭ سانى 35-كە جەتكەنى، ونىڭ 22-ءسىنىڭ جاعدايى وتە اۋىر ەكەنى حابارلاندى. وقيعا ورنىندا 14 ادامنىڭ قايتىس بولعانى بەلگىلى بولدى.
• ساعات 11:07 وتكەندە  ينۆەستيتسيالار جانە دامۋ مينيسترلىگى اپاتقا ۇشىراعان Bek Air اۋە كومپانياسىنىڭ ۇشاعىنداعى 93 ادامنىڭ ءتىزىمىن جاريالادى. 93 ادامنىڭ 3-ەۋى بالا جانە 5-ەۋى ەكيپاج مۇشەسى.
• كۇندىز 10:58-دە زارداپ شەگۋشىلەردىڭ سانى 35-كە جەتكەنى، ونىڭ 22-ءسىنىڭ جاعدايى وتە اۋىر ەكەنى حابارلاندى. وقيعا ورنىندا 14 ادامنىڭ قايتىس بولعانى بەلگىلى بولدى.
• 11:09-دا قوعامدىق ومبۋدسمەن ارۋجان ساين جانە دەنساۋلىق ساقتاۋ باسقارماسى زارداپ شەككەن جولاۋشىلارعا قان قۇيۋعا دونور رەتىندە ەرىكتىلەر قاجەتتىگى تۋرالى حابارلاندىرۋ جاسادى. اتالعان حابارلاندىرۋدان كەيىن الماتىلىقتار جاپپاي قان ورتالىعىنا اعىلا باستادى.

اپاتتان زارداپ شەككەندەرگە قان وتكىزۋگە كەلگەن قالا تۇرعىندارى. 27 جەلتوقسان 2019 جىل. فوتو: الەۋمەتتىك جەلى

• 11:18 شاماسىندا قازاقستاننىڭ ەكس-پرەزيدەنتى نازارباەۆ جولاۋشىلار ۇشاعىنىڭ اپاتقا ۇشىراۋىنا بايلانىستى كوڭىل ايتۋ جەدەلحاتىن جولدادى.

«الماتى اۋەجايىنان ۇشىپ شىققان «Bek Air» اۋە كومپانياسى ۇشاعىنىڭ اپاتقا ۇشىراۋى سالدارىنان قازا تاپقاندار مەن زارداپ شەككەندەر جايلى حاباردى زور كۇيزەلىسپەن قابىلدادىم. قايعىعا ورتاقتاسا وتىرىپ، قازا بولعانداردىڭ تۋىستارى مەن جاقىندارىنا كوڭىل ايتامىن. بارلىق زارداپ شەككەندەردىڭ تەزىرەك ساۋىعىپ كەتۋىن تىلەيمىن»، - دەلىنگەن جەدەلحاتتا.

• قالا اكىمدىگىنىڭ ءباسپاسوز قىزمەتىنىڭ حابارلاۋىنشا، ساعات 11:20 كەزىندە شاھار باسشىسى باقىتجان ساعىنتاەۆ ۇشاق اپاتقا ۇشىراعان وقيعا ورنىنا بارىپ، كەيىن زارداپ شەككەندەر جەتكىزىلگەن ءۇش قالالىق اۋرۋحانادا بولعان.
• ينۆەستيتسيالار جانە دامۋ مينيسترلىگىنىڭ  باسپاسوز حاتشىسى ماديار ۋاقپاەۆ ساعات 11:35-تە Bek Air اۋە كومپانياسىنىڭ قىزمەتى توقتاتىلعانىن مالىمدەدى.
• 11:40 شاماسىندا قالالىق دەنساۋلىق ساقتاۋ باسقارماسى تىلەۋحان ابىلداەۆتىڭ سوزىنشە، وقيعا ورنىندا 14 ادام, 4 اۋرۋحانادا ءبىر قىز قايتىس بولعانى ناقتىلاندى. زارداپ شەككەن 12 ادامنىڭ جاعدايى وتە اۋىر. سونىمەن قاتار 50 جولاۋشى اۋرۋحاناعا جەتكىزىلگەندىگى بەلگىلى بولدى.
• ساعات 11:48 مينۋت وتكەندە ەلوردا اكىمى التاي كولگىنوۆ تۋيتتەر پاراعىندا  اۋىر اپاتتان قازا تاپقان جولاۋشىلاردىڭ تۋىستارىنا كوڭىل ايتتى.

"اۋەجايدا كريزيستىك ورتالىق اشىلدى،توتەنشە جاعدايلار دەپارتامەنتىنىڭ شۇعىل ارەكەت ەتۋ شتابى قۇرىلدى.تەل: 24-52-12, 24-51-71.ەلوردا اۋەجايىندا پسيحولوگيالىق كومەك كورسەتىلۋدە", – دەدى ول.

• 12:09-دا Informburo.kz اقپاراتتىق پلاتفورماسىنىڭ باسشىلىعى اپاتقا ۇشىراعان Bek Air ۇشاعىندا جولاۋشىلار قاتارىندا بەلگىلى جۋرناليست جانە شىعارۋشى رەداكتور دانا كرۋگلوۆا قايتىس بولعانى تۋرالى سۋىت حابار جەتكىزدى. اقپارات قۇرالىنىڭ باس رەداكتورى ميحايل دوروفەەۆ:

«دانا كرۋگلوۆا ناعىز جۋرناليست بولاتىن. ونىڭ ماقالالارى رەزونانس تۋدىرىپ، بارلىق رەداكتسيا ءۇشىن ۇلگى بولا ءبىلدى. دانا جىل باسىندا شىعارۋشى رەداكتور بولىپ، 1 جەلتوقساندا زەرتتەۋ-تالداۋ ءبولىمىن باسقارۋعا كىرىسىپ ەدى. دانا ادال، باتىل، سونىمەن بىرگە وبەكتيۆتى، بايسالدى بولدى. قارالى حابار ءبارىمىز ءۇشىن اۋىر قايعى بولدى»، – دەدى.

دانا كرۋگلوۆا. فوتو: Informburo.kz

ءبىزدىڭ رەداكتسيا ۇجىمى دا وقىس جاعدايدا باقيل بولعاندارمەن بىرگە 35 جاستاعى ارىپتەسىمىزدىڭ وتباسى مەن جاقىندارىنا قايعىرىپ، كوڭىل ايتامىز.

• 12:21-دە ءىىم ءباسپاسوز قىزمەتى "ادامداردىڭ ولىمىنە قاتىستى ءىىم سوتقا دەيىنگى تەرگەۋ شارالارىن قر قىلمىستىق كودەكسىنىڭ 344-بابى ("تەمiرجول، اۋە، تەڭىز نەمەسە وزەن كولiگi ءجۇرىسى نەمەسە ولاردى پايدالانۋ قاۋiپسiزدiگi قاعيدالارىن بۇزۋ") بويىنشا جۇرگىزىپ جاتىر",  – دەگەن حابار تاراتتى.
• تۇسكە تاياۋ 12:26 شاماسىندا Bek Air اۋە كومپانياسى جاساعان ارنايى مالىمدەمە جاريالاندى. كومپانيا سايتىندا:

"قۇرمەتتى قازاقستاندىقتار! قايعىلى جاعدايعا بايلانىستى Bek Air كومپانياسى اتىنان كوڭىل ايتامىز. قازىرگى ۋاقىتتا ءبىز وقيعا ورنىندا جۇمىس ىستەپ جاتقانداردان رەسمي مالىمەت كۇتىپ وتىرمىز. سىزدەردەن انونيم حابارلامالارعا نازار اۋدارماۋلارىڭىزدى سۇرايمىن، سەبەبى ولار الاياقتىق ماقساتتا تارالۋى مۇمكىن. ءوتىنىش، رەسمي اقپارات كۇتىڭىزدەر", – دەلىنگەن.

• ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى 12:28-دە اپاتقا ۇشىراعان Bek Air ۇشاعىنىڭ ەكيپاج مۇشەلەرى تۋرالى حابارلادى. اۋە كەمەسىنىڭ كاپيتانى – مۇراتباەۆ مارات عانيۇلى، 1961 جىلى 7 ناۋرىزدا تۋعان. ATPL كاپيتانىنىڭ №000179 كۋالىگى، 2024 جىلدىڭ 26 ​​ساۋىرىنە دەيىن جارامدى. ەكىنشى پيلوت – مولداكۇلوۆ مەيىرجان عاينۋللاۇلى، 1965 جىلى 4 مامىردا تۋعان. ATPL №000796 سەرتيفيكاتى، 2022 جىلدىڭ 6 ناۋرىزىنا دەيىن جارامدى. بورت جولسەرىكتەرى: ۆاليۋلينا م.، ساحوۆ م.ا.، وسمانوۆ ر.د. بولعان.
• 12:35 وتكەندە الماتى قالاسى توتەنشە جاعدايلار دەپارتامەنتى باستىعىنىڭ ورىنباسارى ەرلان الىبەكوۆ اۋەجايدا وتكەن بريفينگتە وقيعا ورنىنداعى قۇتقارۋ جۇمىستارىنىڭ اياقتالعانىن ايتىپ، ۇشاقتا ەشكىم قالماعانىن جەتكىزدى.
• تۇستە، ناقتىراق ايتقاندا ساعات 12:50-دە مەملەكەت باسشىسى توقاەۆ الماتى ماڭىندا ۇشاق اپاتىنان ادامداردىڭ قازا بولۋىنا بايلانىستى 27 جەلتوقسان "جالپىۇلتتىق ازا تۇتۋ كۇنى" دەپ جاريالادى.

پرەزيدەنت توقاەۆتىڭ ءباسپاسوز حاتشىسى بەرىك ءۋالي تاراتقان حابار. 27 جەلتوقسان 2019 جىل. فوتو: Facebook جەلىسى

• قازاقستاننىڭ توتەنشە جاعداي كوميتەتى 13:09-دا اتى-ءجونى انىقتالعان 12 مارقۇمنىڭ ءتىزىمىن جاريالادى:
  1. مۋراتباەۆ مارات گانيەۆيچ، 1962 جىلى تۋعان، اۆياتسيالىق كوماندير
  2. استاشوۆ نيكولاي اندرەەۆيچ، 1971 ج.ت.
  3. قايداروۆ رۋستام ەسىمحانۇلى، 1940 ج.ت.
  4. قاليەۆ باۋىرجان سەرىكۇلى، 1974 ج.ت.
  5. كارىباەۆا بازارحان، 1951 جىلى تۋعان
  6. يسينا ارشات
  7. نۇربەكوۆ اباي جاۋعاشتايۇلى، 1986 ج.ت.
  8. امانجول سانيا
  9. كرۋگلوۆا دانا ارىستانبايقىزى، 1984 ج.ت.، اۋەجايدا
  10. تۋماتوۆ قايىرحان يديقانبەكۇلى، 1955 ج.ت.، اۋەجايدا
  11. وسپانوۆا يمينا فاتيەۆنا، 1963 ج.ت.، اۋرۋحانادا
  12. انۋفريەۆ ۆالەري، اۋرۋحانادا قايتىس بولدى.
• تۇستە 13:15-تە ىشكى ىستەر مينيسترلىگى تاراتقان مالىمەت بويىنشا، اپاتقا ۇشىراعان Bek Air ۇشاعىندا 4 شەتەل ازاماتى بولعان. ونىڭ ەكەۋى ۋكراينا ازاماتى، سونىمەن قاتار قىرعىزستان مەن قىتاي ازاماتتارى كورىنەدى.
• ساعات 13:28 مينۋت وتكەندە الماتى قالالىق №4 كلينيكالىق اۋرۋحاناسىنىڭ باس دارىگەرى مىندەتىن اتقارۋشى ايمان بايسۇلتانوۆا 19 ادامنىڭ سەگىزى رەانيماتسيا بولىمىندە جاتقانىن حابارلادى. ول:

- 11 ادام اۋرۋحاناعا وتە اۋىر جاعدايدا جەتكىزىلدى. ولار رەانيماتسيا بولىمىنە جاتقىزىلدى. قازىرگى كەزدە 6 وپەراتسيا جاسالدى. 8 ناۋقاس رەانيماتسيا بولىمىندە جاتىر. ەكى ادام كوز جۇمدى. تۋىستارىنا حابار بەرىلدى. قازا بولعانداردىڭ وتباسىنا كوڭىل ايتامىز، – دەدى.

• ۆيتسە-پرەمەر رومان سكليار 14:00-دە ۇشاق اپاتىنىڭ بولجالدى سەبەبى – تەحنيكالىق اقاۋ جانە ۇشقىشتىڭ قاتەسى دەپ مالىمدەدى.
• ساعات 14:37 وتكەندە پۋتين توقاەۆقا كوڭىل ايتۋ جەدەلحاتىن جولدادى.«جاقىندارىنان ايىرىلعان ادامداردىڭ قايعىلارىنا ورتاقتاسامىز جانە بارلىق زارداپ شەككەندەردىڭ تەزىرەك ساۋىعىپ كەتۋىنە تىلەكتەسپىز»، – دەلىنگەن.
• ءتۇس اۋا 15:00-دە قىرعىزستان پرەزيدەنتى سوورونباي جەەنبەكوۆ «قىرعىز رەسپۋبليكاسىنىڭ جانە ءوز اتىمنان قازا تاپقانداردىڭ جاقىندارى مەن تۋىستارىنا كوڭىل ايتامىن، قايعىعا ورتاقپىز. زارداپ شەككەندەردىڭ تەز جازىلىپ كەتۋىنە تىلەكتەسپىز» دەپ، كوڭىل ايتتى.
• مەملەكەت باسشىسى قاسىم-جومارت توقاەۆ  اقوردادا الماتى ماڭىنداعى ۇشاق اپاتىنا بايلانىستى شۇعىل كەڭەيتىلگەن  كەڭەس وتكىزدى. ۇشاق اپاتىنىڭ سەبەپتەرىن ەگجەي-تەگجەيلى انىقتاۋ جونىندە جانە قازا تاپقانداردىڭ ارقايسىسىنا 4 ميلليون تەڭگەدەن قولداۋ تولەمى بەرىلەتىنى تۋرالى ناقتى تاپسىرمالار بەردى.

اقورداداعى كەزەكتەن تىس كەڭەس. 27 جەلتوقسان 2019 جىل. ەلوردا. فوتو: اقوردا

"The Qazaq Times"