«قارالىپ جاتىر»: مينيستر قازاقستاندا اەس سالۋ جونىندە مالىمدەمە جاسادى

ۇكىمەت وتىرىسىندا ەنەرگەتيكا ءمينيسترى نۇرلان نوعاەۆ ەلىمىزدە اتوم ەلەكتر ستانتسياسىن سالۋ ماسەلەسىنە قاتىستى پىكىرىن ءبىلدىردى.

نۇرلان نوعاەۆ: «بۇگىنگە دەيىن قانداي پوزيتسيادا بولساق، ءالى سونى ۇستانىپ وتىرمىز. ازىرگە قارالىپ جاتىر. ەنەرگەتيكا مينيسترلىگىنىڭ پوزيتسياسى مىناداي بولدى: ەنەرگيانىڭ قوسىمشا كوزدەرى باردا ءبىز بۇل ماسەلەنى قارايمىز. ال قازىرگى تاڭدا رەسپۋبليكا ەنەرگيامەن ءوزىن-ءوزى قامتىپ وتىر. ءتىپتى ەلەكتر ەنەرگيانىڭ ءبىر بولىگى ەكسپورتتالادى. جاقىندا اتىراۋ وبلىسىندا ەركىن ەكونوميكالىق اۋماقتا رەسپۋبليكالىق ماڭىزداعى 310 مەگاۆاتتىق قاراباتان گاز-قۇبىرلى ەلەكتر ستانتسياسى پايدالانۋعا بەرىلدى. اەس قۇرىلىسىن جۇرگىزۋ ماسەلەسىن جابىلدى دەۋگە كەلمەيدى، قانداي ساتىدا تۇردى – ءالى سوندا»، – دەپ مالىمدەدى.

قازاقستان استاناسى نۇر-سۇلتاندا اەس قۇرىلىسىن رەسەيلىك تەحنولوگيامەن جۇرگىزۋدى كرەملدەگى كەزدەسۋى كەزىندە ەل پرەزيدەنتى قاسىم-جومارت توقاەۆقا رەسەي پرەزيدەنتى ۆلاديمير پۋتين ۇسىنعان بولاتىن. 3 ساۋىردە وتكەن جيىندا پۋتين توقاەۆ ەكەۋى «بەيبىت اتوم سالاسىنداعى سەرىكتەستىك» جايلى تالقىلاعانىن ايتقان. ونىڭ سوزىنشە، «ۋران ءوندىرۋ جانە بايىتۋ بويىنشا قازاقستان مەن رەسەيدىڭ بىرلەسكەن التى ونەركاسىبى جۇمىس ىستەيدى».

قازاقستاندا سالىنۋى ىقتيمال اتوم ەلەكتر ستانتسياسىنا (اەس) ارنالعان اۋماق رەتىندە الماتى وبلىسىنداعى ۇلكەن اۋىلى مەن شىعىس قازاقستان وبلىسىنداعى كۋرچاتوۆ قالاسى تاڭدالعان. اتالعان مالىمدەمەدەن كەيىن، قازاقستان ازاماتتارى ستانتسيادان تونەتىن وراسان زور قاۋىپتى ايتىپ، اەس قۇرىلىسىنان باس تارتۋدى تالاپ ەتتى.

"The Qazaq Times"