فوتو: https://it-tuner.ru

قر ىشكى ىستەر مينيسترلىگى جەكە كۋالىك پەن بانك كارتالارىن WhatsApp ارقىلى جولداۋ قاۋىپتى دەپ ەسكەرتۋ جاسادى.  

قر ءىىم قىلمىستىق پوليتسيا دەپارتامەنتىنىڭ كيبەرقىلمىسقا قارسى كۇرەس ورتالىعى باستىعىنىڭ ورىنباسارى رۇستەم دۇيسەتاەۆ ۆەدومستۆودا وتكەن ءباسپاسوز ءماسليحاتىندا: «قاۋىپسىزدىك ءۇشىن كىلت سوزدەردى (الەۋمەتتىك جەلىدە نەمەسە تەلەفوندا) ءجيى وزگەرتىپ تۇرعان ءجون. سەبەبى، قازىر قولىڭىزداعى تەلەفوندا ءبارى ساقتالادى. ومىرىڭىزدە ءبىر رەت بولسىن، WhatsApp ارقىلى جەكە كۋالىكتىڭ سۋرەتىن جىبەرگەن بولارسىزدار. كەي جاعدايدا ازاماتتار بانك كارتالارىنىڭ دا سۋرەتىن جولدايدى. مۇندايدان ساقتانۋ كەرەك. ويتكەنى، بۇل قۇجاتتاردىڭ كوشىرمەسىمەن-اق ونلاين-ساۋدا جاساي بەرۋگە بولادى. ينتەرنەتتى پايدالانۋدىڭ قاراپايىم ەرەجەلەلەرىن ساقتاعان دۇرىس»، – دەپ مالىمدەدى.

وسىعان دەيىن ءىىم وكىلدەرى ينتەرنەت-الاياقتىقتىڭ باسىم بولىگى ترانسشەكارالىق سيپاتقا يە ەكەنىن اتاپ وتكەن بولاتىن. مالىمەتتەر بويىنشا، قولعا الىنعان شارالاردىڭ ارقاسىندا بيىل وسىنداي مىڭعا تارتا قىلمىس اشىلعان. وسى قىلمىستارعا قاتىستى 388 ادام ۇستالدى. ولاردىڭ 160-ى ەكى نەمەسە ودان دا كوپ قىلمىسقا قاتىسى بار دەگەن كۇدىككە ىلىنگەن.

"The Qazaq Times"